ନୂଆଦିଲ୍ଲୀ: ଶନିବାର ଦିନ ପାକିସ୍ତାନ ଅଧିକୃତ କାଶ୍ମୀରରେ ବିଦ୍ୟୁତ୍ ଓ ଅଟା ମୂଲ୍ୟ ବୃଦ୍ଧି ନେଇ ବିକ୍ଷୋଭ ପ୍ରଦର୍ଶନକାରୀ ଏବଂ ପୋଲିସ ମଧ୍ୟରେ ହିଂସାତ୍ମକ ସଂଘର୍ଷ ଘଟିଛି। ପିଓକେରେ ପୋଲିସ ଏବଂ ପ୍ରଦର୍ଶନକାରୀଙ୍କ ମଧ୍ୟରେ ହୋଇଥିବା ଏହି ହିଂସାତ୍ମକ ସଂଘର୍ଷରେ ଜଣେ ସାଧାରଣ ନାଗରିକଙ୍କ ମୃତ୍ୟୁ ଘଟିଛି। ଏଥିରେ କ୍ରୋଧିତ ପ୍ରଦର୍ଶନକାରୀ ଜଣେ ପୋଲିସ କର୍ମଚାରୀଙ୍କୁ ପିଟିପିଟି ହତ୍ୟା କରିଦେଇଛନ୍ତି।
ପାକିସ୍ତାନ ଅଧିକୃତ କାଶ୍ମୀରର ରାଜଧାନୀ ମୁଜାଫରବାଦରେ ଏହି ପ୍ରଦର୍ଶନକାରୀଙ୍କୁ ନିୟନ୍ତ୍ରଣ କରିବା ପାଇଁ ପୋଲିସ ଲୁହବୁହା ଗ୍ୟାସ ଗୁଳି ଛାଡିଥିଲା, ଏହା ପରେ ଲୋକଙ୍କ କ୍ରୋଧ ଆହୁରି ବଢିଯାଇଥିଲା ଏବଂ ଏହି ବିରୋଧ ଏକ ହିଂସାତ୍ମକ ରୂପ ନେଇଥିଲା।
ଧର୍ମଘଟ ଭୟ ହେତୁ ପାକିସ୍ତାନ ପ୍ରଶାସନିକ କାଶ୍ମୀର ସରକାର ସଂପୂର୍ଣ୍ଣ ପିଓକେ ରେ ଧାରା ୧୪୪ ଲାଗୁ କରିଥିଲେ। ଏହା ସହିତ ୧୦ ଏବଂ ୧୧ ମଇରେ ସମସ୍ତ ବିଦ୍ୟାଳୟରେ ଛୁଟି ଘୋଷଣା କରାଯାଇଥିଲା।
ମୁଜାଫରବାଦ ଏବଂ ମିରପୁର ଡିଭିଜନର ବିଭିନ୍ନ ଅଞ୍ଚଳରେ ରାତିରେ ହୋଇଥିବା ଚଢାଉରେ ବହୁ ନେତା ଓ କର୍ମୀଙ୍କୁ ପୋଲିସ ଗିରଫ କରିଥିଲା। ଏହା ପରେ ଶୁକ୍ରବାର ଦିନ ଧର୍ମଘଟ ଡକାଯାଇଥିଲା। ବର୍ତ୍ତମାନ ପୋଲିସ ଘଟଣାକୁ ନିୟନ୍ତ୍ରଣ କରିବାକୁ ଚେଷ୍ଟା କରୁଛି।
ପିଓକେ ରେ ବଡ ବିରୋଧ ପ୍ରଦର୍ଶନ କରାଯାଉଛି ଏବଂ ଏକ ସାମରିକ ଗୁପ୍ତଚର ଗାଡିକୁ ମଧ୍ୟ ନଷ୍ଟ କରିଦିଆଯାଇଛି।