ବାଣପୁର (ସୀତାରାମ ଅଗ୍ରୱାଲ): ଆଜି ଖୋର୍ଦ୍ଧାର ନୂତନ ଏସପି ସାଗରିକା ନାଥ ବାଣପୁର ଥାନା ଗସ୍ତରେ ଆସି ପ୍ରଥମେ ମା’ ଭଗବତୀଙ୍କ ଦର୍ଶନ କରିଥିଲେ। ମା’ଙ୍କୁ ଦର୍ଶନ କରିବା ସହ ମନ୍ଦିରରେ ସେ ପୂଜାର୍ଚ୍ଚନା କରିଥିଲେ। ବେଢାରେ କିଛି ସମୟ ଅତିବାହିତ କରିବା ସହ ମନ୍ଦିରର ସୁରକ୍ଷା ବିଷୟରେ ଏସପି ତଦାରଖ କରିଥିଲେ।
ଶାରଦୀୟ ପୂଜା ଉପଲକ୍ଷେ ମନ୍ଦିରରେ ଭକ୍ତଙ୍କ ପ୍ରବଳ ଭିଡ଼ ହେବାକୁ ଥିବା ବେଳେ ଭକ୍ତଙ୍କ ଶୃଙ୍ଖଳିତ ଦର୍ଶନକୁ ଗୁରୁତ୍ୱ ଦେବା ସହ ଏଦିଗରେ ନିଆଯାଇଥିବା ପଦକ୍ଷେପ ବିଷୟରେ ସ୍ଥାନୀୟ ପୋଲିସ ଅଧିକାରୀଙ୍କଠାରୁ ସେ ପଚାରି ବୁଝିଥିଲେ। ଏହାପରେ ଏସପି ବାଣପୁର ଥାନାକୁ ଯାଇ ବିଭିନ୍ନ ବ୍ୟବସ୍ଥା ପରଖିଥିଲେ।
ଏହି ଅବସରରେ ଥାନାର ସମସ୍ତ ପୋଲିସ କର୍ମଚାରୀମାନେ ନୂତନ ଏସପିଙ୍କୁ ଗାର୍ଡ ଅଫ ଅନର ପ୍ରଦାନ କରିଥିଲେ। ବାଣପୁର ଥାନାର ଆଇନ ଶୃଙ୍ଖଳା ସ୍ଥିତି ଉପରେ ଏକ ଛୋଟ ବୈଠକରେ ଏସପି ଭାଗ ନେଇଥିଲେ। ତତସହିତ ଥାନାକୁ ଆସୁଥିବା ନାଗରିକମାନଙ୍କ ଅଭିଯୋଗର ତ୍ୱରିତ ପଞ୍ଜିକରଣ, ଉତ୍ତମ ବ୍ୟବହାର, ବୟସ୍କ ଓ ମହିଳା ନାଗରିକଙ୍କୁ ତ୍ୱରିତ ସେବା ପ୍ରଦାନ କରିବା ଆଦି ବିଷୟ ଉପରେ ଅଧିକାରୀଙ୍କୁ ନୂତନ ଏସପି ପରାମର୍ଶ ଦେଇଥିଲେ।
ଏସପି ଙ୍କ ଏହି ଗସ୍ତ ବେଳେ ବାଲୁଗାଁ ଏସଡିପିଓ ଶୁଭ୍ରାଂଶୁ ଶେଖର ମିଶ୍ର, ବାଣପୁର ଆଇଆଇସି ରମେଶ କୁମାର ଦେବତା ଏବଂ ବାଲୁଗାଁ ଆଇଆଇସି ଜୟପ୍ରକାଶ ପରିଡ଼ା ଉପସ୍ଥିତ ଥିଲେ।