ଭୁବନେଶ୍ୱର: ଆପଣ ପ୍ୟାକେଟ୍ କ୍ଷୀର କିଣି ଖାଉଛନ୍ତି କି? ହୁସିଆର, କ୍ଷୀରରେ ହେଉଛି ଅପମିଶ୍ରଣ। ଏକ ଲିଟଲ କେମିକାଲରେ ପ୍ରସ୍ତୁତ ହେଉଛି ୫୦୦ ଲିଟର କ୍ଷୀର। ଆଉ ସେଥିରେ ମିଶୁଛି ଏକ୍ସପରୀ ସାକାରିନ୍। ଆପଣ ଚାହିଁଲେ ବି କୌଣସି ଉପାୟରେ ଜାଣି ପାରିବେ ନାହିଁ, ଏହା ଅସଲି କି ନକଲି। କ୍ଷୀର ପରି ବାସ୍ନା ଏବଂ କ୍ଷୀରର ସ୍ୱାଦ ରହିଥିଲେ ମଧ୍ୟ ତାହା ଯେ କୌଣସି ପଶୁର କ୍ଷୀର ନୁହେଁ, ଏକଥା ପ୍ରାମାଣିତ ହୋଇଛି। ଖାଲି ସେତିକି ନୁହେଁ, ଏଥିରେ ପାଉଡର ମିଶାଇ ସେଥିରୁ ପ୍ରସ୍ତୁତ କରାଯାଉଛି ପନିର। ଏହି ଘଟଣା ଲୋକ ଲୋଚନକୁ ଆସିବା ପରେ ସମଗ୍ର ଦେଶରେ ଏବେ ହଇଚଇ ସୃଷ୍ଟି ହୋଇଛି। ଏପରି ଅପମିଶ୍ରଣ କରି ଅନେକ ଘରୋଇ କଂପାନୀ କ୍ଷୀର, ଦହି, ପନିର ଆଦି ଦୁଗ୍ଧ ଜାତୀୟ ପଦାର୍ଥ ବଜାରରେ ବିକ୍ରି କରୁଥିବା ଖବର ଜାତୀୟ ଗଣମାଧ୍ୟମରେ ପ୍ରଚାର ପ୍ରସାର ହେବା ପରେ ସାଧାରଣ ଲୋକଙ୍କ ମଧ୍ୟରେ ଉଦ୍ବେଗ ପ୍ରକାଶ ପାଇଛି।
ଏହି ଫଟୋକୁ ଦେଖିଲେ ସହଜରେ ଜାଣି ପାରିବେ ଯେ ଖାଲି ପାଣିରେ କେମିକାଲ ଓ ଏକପାରୀ ଶାକାରିନି ମିଶ୍ରଣରେ ପ୍ରସ୍ତୁତ ହେଉଛି କ୍ଷୀର।
ଓମ୍ଫେଡ୍ ହେଉଛି ରାଜ୍ୟ ସରକାରଙ୍କ ପରିଚାଳନାଧୀନ ଏକ ସମବାୟ ସଂସ୍ଥା। ଓଡିଆ ଅସ୍ମିତା ସହିତ ଓମ୍ଫେଡ୍ ଜଡିତ। କାରଣ ଏଥିରେ ରାଜ୍ୟର ଲକ୍ଷ ଲକ୍ଷ ଦୁଗ୍ଧ ଚାଷୀଙ୍କର ଭାଗ୍ୟ ଓ ଭବିଷ୍ୟତ ନିହିତ ରହିଛି। ଅପରପକ୍ଷେ ଚାଷୀଙ୍କଠାରୁ ଦୁଗ୍ଧ ସଂଗ୍ରହ ହେବା ପରେ ଏଥିରେ କୌଣସି ଅପମିଶ୍ରଣ ହେବାର ସୁଯୋଗ ନାହିଁ। ଓମ୍ଫେଡ୍ ଅତ୍ୟାଧୁନିକ ଜ୍ଞାନ କୌଶଳ ପ୍ରୟୋଗ କରି ଦୁଗ୍ଧର ପ୍ରକ୍ରିୟାକରଣ କରୁଛି। ଓମ୍ଫେଡ୍ ଦ୍ୱାରା ପ୍ରସ୍ତୁତ ଗୁଆଘିଅ ମହାପ୍ରଭୁ ଜଗନ୍ନାଥଙ୍କ ନିକଟରେ ଭୋଗ ହେଉଛି।
ରାଜ୍ୟ ସରକାର ତଥା ଓମ୍ଫେଡ୍ ସଦାସର୍ବଦା ଦୁଗ୍ଧ ଜାତ ଉତ୍ପାଦର ଶୁଦ୍ଧତା, ସ୍ୱଚ୍ଛତା ଓ ଗୁଣବତା ଉପରେ ଗୁରୁତ୍ୱାରୋପ କରିଆସୁଛି। ଓମ୍ଫେଡ୍ ଦ୍ୱରା ପ୍ରସ୍ତୁତ ସମସ୍ତ ଉତ୍ପାଦ ଉତମ ଗୁଣମାନର ଏବଂ ସ୍ୱାସ୍ଥ୍ୟକର ଏଥିରେ କୌଣସି ସଂଦେହ ନାହିଁ।
ଓମ୍ଫେଡ୍ ଉତ୍ପାଦର ଗୁଣାତ୍ମକମାନରେ କୌଣସି ସାଲିସ୍ କରାଯିବ ନାହିଁ ବୋଲି କହିଛନ୍ତି ପରିଚାଳନା ନିର୍ଦେଶକ ବିଜୟ ଅମୃତା କୁଲାଙ୍ଗେ। ଏଣୁ ଖାଉଟିମାନେ ଓମ୍ଫେଡ୍ ଉତ୍ପାଦ ନିସଂଦେହରେ ନେବା ପାଇଁ ପରାମର୍ଶ ଦେଇଛନ୍ତି ପରିଚାଳନା ନିର୍ଦେଶକ।