ନୂଆଦିଲ୍ଲୀ: ଆଜି ସଂସଦର ଶୀତକାଳୀନ ଅଧିବେଶନର ଶେଷ ଦିନ। ଆଜି ଯେତେବେଳେ ଲୋକସଭା ପ୍ରକ୍ରିୟା ଆରମ୍ଭ ହେଲା, ସେତେବେଳେ ବାଚସ୍ପତି ଓମ ବିର୍ଲା ସାଂସଦମାନଙ୍କୁ ସଂସଦର ସମ୍ମାନ ଏବଂ ମର୍ଯ୍ୟାଦା ବଜାୟ ରଖିବାକୁ ପରାମର୍ଶ ଦେଇଥିଲେ। ବାଚସ୍ପତି ଏହା ମଧ୍ୟ କହିଥିଲେ ଯେ, ସଂସଦ ପରିସରରେ ବାରମ୍ବାର ବିରୋଧ କରିବା ଉଚିତ୍ ନୁହେଁ, ନଚେତ୍ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପଡ଼ିବ। ପ୍ରଥମେ ସମସ୍ତ ସାଂସଦ ବନ୍ଦେ ମାତରମ ପାଇଁ ଛିଡା ହୋଇଥିଲେ। ଏହା ପରେ ଲୋକସଭାର ପ୍ରକ୍ରିୟା ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ରଖାଯାଇଥିଲା।
ରାଜ୍ୟସଭାର ପ୍ରକ୍ରିୟା ମଧ୍ୟ ମଧ୍ୟାହ୍ନ ୧୨ ପର୍ଯ୍ୟନ୍ତ ମୁଲତବୀ ରଖାଯାଇଥିଲା। ଗତକାଲି ସଂସଦରେ ଏକ ବଡ଼ ଧରଣର ଉତ୍ତେଜନା ଦେଖାଦେଇଥିଲା। ଆଜି ବି ସଂସଦ ପରିସରରେ ରାହୁଲ ଗାନ୍ଧୀଙ୍କ ବିରୋଧରେ ବିଜେପି ବିରୋଧ କରୁଛି। ବିରୋଧୀ ଦଳ ପକ୍ଷରୁ ମଧ୍ୟ ପ୍ରଦର୍ଶନ କରାଯାଇଛି।
ଗୁରୁବାର ସଂସଦରେ ବିକ୍ଷୋଭ ପ୍ରଦର୍ଶନ ବେଳେ ଓଡ଼ିଶାର ବାଲେଶ୍ଵର ସାଂସଦ ପ୍ରତାପ ଷଡଙ୍ଗୀ ଏବଂ ଉତ୍ତରପ୍ରଦେଶର ଫାରୁଖବାଦର ବିଜେପି ସାଂସଦ ମୁକେଶ ରାଜପୁତ ଆହତ ହୋଇଛନ୍ତି। ଏହି ପ୍ରସଙ୍ଗରେ ବିରୋଧୀ ଓ ବିଜେପି ସାଂସଦମାନେ ପରସ୍ପରକୁ ଦୋଷାରୋପ କରି ଅଭିଯୋଗ କରିଥିଲେ।
ଏହି ପ୍ରସଙ୍ଗରେ କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ବିରୋଧରେ ଏଫଆଇଆର ମଧ୍ୟ ଦାଖଲ କରାଯାଇଛି। ବିରୋଧୀଦଳ ନେତା ରାହୁଲ ଗାନ୍ଧୀଙ୍କ ବିରୋଧରେ ଏଫଆଇଆର ଉପରେ କଂଗ୍ରେସ ସାଂସଦ ପ୍ରିୟଙ୍କା ଗାନ୍ଧୀ କହିଛନ୍ତି ଯେ, “ସମଗ୍ର ଦେଶ ଏହା ଦେଖୁଛି, ସେମାନେ ରାହୁଲ ଗାନ୍ଧୀଙ୍କ ବିରୋଧରେ ଅନେକ ମାମଲା ଦାୟର କରିଛନ୍ତି। ସେମାନେ ନୂଆ ଏଫଆଇଆର ଆଣି ମିଛ କହୁଛନ୍ତି … ଏହା ହେଉଛି ସେମାନଙ୍କର ନିରାଶାର ସ୍ତର।”
