ନୂଆଦିଲ୍ଲୀ: ବିଶ୍ବ ଅଡିଓ ଭିଜୁଆଲ ଆଣ୍ଡ ଏଣ୍ଟରଟେନମେଣ୍ଟ ଶିଖର ସମ୍ମିଳନୀ (ୱେଭ୍ସ)କୁ ୨୦୨୫ରେ ‘ରିଲ୍ ମେକିଂ’ ଚ୍ୟାଲେଞ୍ଜକୁ ଜବରଦସ୍ତ ପ୍ରତିକ୍ରିୟା ମିଳିଛି, ଯେଉଁଥିରେ ଭାରତ ଏବଂ ଅନ୍ୟ ୨୦ଟି ଦେଶରୁ ୩,୩୭୯ ପଞ୍ଜୀକରଣ ହୋଇଛି।
ଭାରତରେ ସୃଜନ କରନ୍ତୁ
ୱେଭ୍ସ ୨୦୨୫ ଅଧୀନରେ ଏକ ପ୍ରମୁଖ ପଦକ୍ଷେପ ଭାବରେ ଆରମ୍ଭ ହୋଇଥିବା ଏହି ପ୍ରତିଯୋଗିତା ଗଣମାଧ୍ୟମ ଏବଂ ମନୋରଞ୍ଜନର ଏକ ବିଶ୍ୱ କେନ୍ଦ୍ର ଭାବରେ ଭାରତର ବଢୁଥିବା ପ୍ରଭାବକୁ ରେଖାଙ୍କିତ କରିବା ସହିତ ଦେଶର ଦ୍ରୁତ ବିସ୍ତାରିତ ଡିଜିଟାଲ ନିର୍ମାତା ଅର୍ଥନୀତିକୁ ମଧ୍ୟ ପ୍ରତିଫଳିତ କରୁଛି। ଏହା ଭାରତ ସରକାରଙ୍କ ‘ ଭାରତରେ ସୃଜନ କରନ୍ତୁ’ ଦୃଷ୍ଟିକୋଣ ସହ ଯୋଡ଼ି ହୋଇ ଦେଶ ତଥା ଅନ୍ୟ ଦେଶର ପ୍ରତିଭାମାନଙ୍କୁ ସଶକ୍ତ କରୁଛି।
ଏହି ପ୍ରତିଯୋଗିତାରେ ଆଫଗାନିସ୍ତାନ, ଆଲବେନିଆ, ଯୁକ୍ତରାଷ୍ଟ୍ର ଆମେରିକା, ଆଣ୍ଡୋରା, ଆଣ୍ଟିଗୁଆ ଓ ବାରବୁଡା, ବାଂଲାଦେଶ, ସଂଯୁକ୍ତ ଆରବ ଏମିରେଟ୍ସ, ଅଷ୍ଟ୍ରେଲିଆ ଓ ଜର୍ମାନୀ ଭଳି ଦେଶରୁ କ୍ରିଏଟରମାନେ ଅଂଶଗ୍ରହଣ କରିଛନ୍ତି। ଏହି ବିଶ୍ୱସ୍ତରୀୟ ପହଞ୍ଚ ଭାରତର ସୃଜନଶୀଳ କ୍ଷେତ୍ରର ବଢୁଥିବା ପ୍ରଭାବ ଏବଂ ବିଶ୍ୱବ୍ୟାପୀ ବିଷୟବସ୍ତୁ ନିର୍ମାତାମାନଙ୍କ ପାଇଁ ଏକ ପ୍ରମୁଖ ପ୍ଲାଟଫର୍ମ ଭାବରେ ଓ୍ବେଭ୍ସର ମହତ୍ତ୍ୱକୁ ସୂଚାଇଥାଏ।
ତୱାଙ୍ଗରୁ ପୋର୍ଟ ବ୍ଲେୟାର: ସାରା ଦେଶରେ ବଢିଚାଲିଥିବା କାହାଣୀ କହିବାର ଧାରା
ଏହି ଚ୍ୟାଲେଞ୍ଜ ପାଇଁ ତୱାଙ୍ଗ (ଅରୁଣାଚଳ ପ୍ରଦେଶ), ଦିମାପୁର (ନାଗାଲାଣ୍ଡ), କାର୍ଗିଲ (ଲଦାଖ), ଲେହ, ସୋପିଆନ (କଶ୍ମୀର), ପୋର୍ଟ ବ୍ଲେୟାର (ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜ), ତେଲିଆମୋରା (ତ୍ରିପୁରା), କସରାଗଡ (କେରଳ) ଏବଂ ଗ୍ୟାଙ୍ଗଟକ୍ (ସିକ୍କିମ) ସମେତ ଭାରତର ବିବିଧ ଏବଂ ଦୂରନ୍ତ ସ୍ଥାନରୁ ଏଣ୍ଟ୍ରି ମିଳିଛି। ଛୋଟ ସହର ଏବଂ ଉଦୀୟମାନ ସୃଜନଶୀଳ କେନ୍ଦ୍ରଗୁଡିକରୁ “ରିଲ୍ ମେକିଂ” ଚ୍ୟାଲେଞ୍ଜ ପ୍ରତିଯୋଗିତାର ଦୃଢ଼ ପ୍ରତିକ୍ରିୟା ଭାରତର ସମୃଦ୍ଧ କାହାଣୀ ପରମ୍ପରା ଏବଂ ବଢୁଥିବା ଡିଜିଟାଲ ନିର୍ମାତା ଇକୋସିଷ୍ଟମକୁ ପ୍ରତିଫଳିତ କରୁଛି।
ଏହି ଚ୍ୟାଲେଞ୍ଜରେ ୨୦ ବର୍ଷରୁ ଅଧିକ ବୟସର ଅଂଶଗ୍ରହଣକାରୀମାନଙ୍କୁ “ବିକଶିତ ଭାରତ”, ଭାରତର ସାମ୍ପ୍ରତିକ ବୈଷୟିକ ଏବଂ ଭିତ୍ତିଭୂମି ଅଗ୍ରଗତି ଉପରେ ଆଲୋକପାତ କରିବା ଏବଂ “ଇଣ୍ଡିଆ @ ୨୦୪୭” ରେ ଏହି କ୍ଷେତ୍ରରେ ଦେଶର ଭବିଷ୍ୟତ ବିକାଶର ପରିକଳ୍ପନା କରିବା ଭଳି ବିଷୟବସ୍ତୁ ଉପରେ ରିଲ୍ ତିଆରି କରିବାକୁ ପଡିବ। ଏହି ବିଷୟବସ୍ତୁଗୁଡ଼ିକ କାହାଣୀକାରମାନଙ୍କୁ ୩୦-୬୦ ସେକେଣ୍ଡର କ୍ଷୁଦ୍ର ଚଳଚ୍ଚିତ୍ର ମାଧ୍ୟମରେ ଭାରତର ଉଦ୍ଭାବନ ଯାତ୍ରାକୁ ପ୍ରଦର୍ଶନ କରିବା ପାଇଁ ଏକ ପ୍ଲାଟଫର୍ମ ପ୍ରଦାନ କରେ, ଯାହା ଦେଶର ପ୍ରଗତି ପାଇଁ ସେମାନଙ୍କର ସୃଜନଶୀଳତା ପ୍ରଦର୍ଶନ କରେ।
ରିଲ୍ ମେକିଂ ଚ୍ୟାଲେଞ୍ଜର ବିଜେତାଙ୍କୁ କେତେକ ସ୍ବତନ୍ତ୍ର ସୁଯୋଗ ମିଳିବ, ଯେଉଁଥିରେ ରହିଛି:
୨୦୨୫ରେ ଏକ ମେଟା ଦ୍ବାରା ଆୟୋଜିତ ଇଭେଣ୍ଟ ଏବଂ ରିଲ୍ସ୍ ମାଷ୍ଟରକ୍ଲାସ୍ ପାଇଁ ନିମନ୍ତ୍ରଣ।
ୱେଭ୍ସ ୨୦୨୫ରେ ସେମାନଙ୍କ ପାଇଁ ସମସ୍ତ ଖର୍ଚ୍ଚ ବହନ କରାଯିବ, ଯେଉଁଠାରେ ସେମାନଙ୍କୁ ସମ୍ମାନିତ କରାଯିବ।
ଅନ୍ତର୍ଜାତୀୟ କଣ୍ଟେଣ୍ଟ କ୍ରିଏଟର ପ୍ରତିଯୋଗିତାରେ ଅଂଶଗ୍ରହଣ କରିବା ପାଇଁ ମନ୍ତ୍ରଣାଳୟ ଫାଇନାଲିଷ୍ଟମାନଙ୍କୁ ସହାୟତା ପ୍ରଦାନ କରିବ।
ବିଜେତା ରିଲଗୁଡ଼ିକର ପ୍ରଦର୍ଶନ ସମ୍ମାନଜନକ ୱେଭ୍ସ ହଲ୍ ଅଫ୍ ଫେମ୍, ଅଫିସିଆଲ୍ ୱେଭ୍ସ ୱେବସାଇଟ୍ ଏବଂ ସୋସିଆଲ ମିଡିଆ ପ୍ଲାଟଫର୍ମରେ ହେବ।
‘ମେକ୍ ଇନ୍ ଇଣ୍ଡିଆ, ମେକ୍ ଫର୍ ଦି ୱାର୍ଲ୍ଡ‘
ଓ୍ବେଭସ୍ ୨୦୨୫ ପାଇଁ ପ୍ରେରଣା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟି ଏବଂ ମିଶନରୁ ନିଆଯାଇଛି, ଯାହାର ଉଦ୍ଦେଶ୍ୟ ଭାରତର ସୃଜନଶୀଳ ସାମର୍ଥ୍ୟକୁ ଏକ ନୂତନ ବିଶ୍ୱ ପରିଚୟ ପ୍ରଦାନ କରିବା ଏବଂ ଗଣମାଧ୍ୟମ, ମନୋରଞ୍ଜନ ଏବଂ କଣ୍ଟେଣ୍ଟ ସୃଷ୍ଟି ପାଇଁ ଭାରତକୁ ଏକ ପ୍ରମୁଖ ଗନ୍ତବ୍ୟସ୍ଥଳ ଭାବରେ ପ୍ରତିଷ୍ଠା କରିବା। ଏହି ଶିଖର ସମ୍ମିଳନୀ ଉଦୀୟମାନ ଧାରା ଉପରେ ଆଲୋଚନା କରିବା, ସହଯୋଗକୁ ପ୍ରୋତ୍ସାହିତ କରିବା, ଭାରତର ସମୃଦ୍ଧ ସୃଜନଶୀଳ ଇକୋସିଷ୍ଟମ୍ ପ୍ରଦର୍ଶନ କରିବା ଏବଂ ପ୍ରଧାନମନ୍ତ୍ରୀଙ୍କ ‘ମେକ୍ ଇନ୍ ଇଣ୍ଡିଆ, ମେକ୍ ଫର୍ ଦି ୱାର୍ଲ୍ଡ’ ପରିକଳ୍ପନାକୁ କାର୍ଯ୍ୟକାରୀ କରିବା ପାଇଁ ଶିଳ୍ପନେତା, ଅଂଶୀଦାର ଏବଂ ଉଦ୍ଭାବକମାନଙ୍କୁ ଏକାଠି କରିବ।
ବର୍ତ୍ତମାନ ସୁଦ୍ଧା ଭାରତର ପ୍ରାୟ ସମଗ୍ର ଅଞ୍ଚଳ ଏବଂ ଅନ୍ୟ ୨୦ଟି ଦେଶର ଅଂଶଗ୍ରହଣ ରେ ଏହି ରିଲ୍ ମେକିଂ ଚ୍ୟାଲେଞ୍ଜ ଭାରତର ବିବିଧ ଏବଂ ଗତିଶୀଳ ବର୍ଣ୍ଣନାରେ କାହାଣୀର ଦୃଶ୍ୟଚିତ୍ରର ପ୍ରମାଣ, ଯାହା ବିଶ୍ୱ ଗଣମାଧ୍ୟମ ଏବଂ ମନୋରଞ୍ଜନ ଶିଳ୍ପରେ ଏକ ଶକ୍ତିଶାଳୀ ଦେଶ ଭାବରେ ଭାରତର ସ୍ଥିତିକୁ ସୁଦୃଢ଼ କରିଥାଏ।