ନୂଆଦିଲ୍ଲୀ: କେନ୍ଦ୍ର ଗୃହ ମନ୍ତ୍ରଣାଳୟ ବୁଧବାର ଦିନ ପଶ୍ଚିମବଙ୍ଗରେ ୩୨ ଭାରତୀୟ ଜନତା ପାର୍ଟି (ବିଜେପି) ନେତାଙ୍କ ସୁରକ୍ଷା ପ୍ରତ୍ୟାହାର କରିନେଇଛି। ଗୃହ ମନ୍ତ୍ରଣାଳୟର ସମୀକ୍ଷା କମିଟି ଏକ ତାଲିକା ପ୍ରକାଶ କରିଛି, ଯେଉଁଥିରେ ଗତ ବର୍ଷ ଲୋକସଭା ନିର୍ବାଚନରେ ହାରିଥିବା କିଛି ବିଜେପି ନେତାଙ୍କ ନାମ ରହିଛି।
ଇଣ୍ଡିଆନ୍ ଏକ୍ସପ୍ରେସ ରିପୋର୍ଟ ଅନୁଯାୟୀ, ୩୨ ଜଣଙ୍କ ମଧ୍ୟରେ ପୂର୍ବତନ କେନ୍ଦ୍ର ମନ୍ତ୍ରୀ ଜନ୍ ବାର୍ଲା, ପୂର୍ବତନ ସାଂସଦ ଦଶରଥ ତିର୍କି, ବିଜେପି ନେତା ଶଙ୍କୁଦେବ ପଣ୍ଡା ଏବଂ ପୂର୍ବତନ ଆଇପିଏସ୍ ଅଧିକାରୀ ଦେବଶିଷ ଧର ଅଛନ୍ତି। ତୃଣମୁଲ କଂଗ୍ରେସ (ଟିଏମସି) ସାଂସଦ ଅଭିଷେକ ବାନାର୍ଜୀଙ୍କ ଠାରୁ ହାରିଥିବା ଡାଇମଣ୍ଡ ହାର୍ବର ଲୋକସଭା ନିର୍ବାଚନ ମଣ୍ଡଳୀର ପ୍ରାର୍ଥୀ ଅଭିଜୀତ ଦାସ, ଡାଇମଣ୍ଡ ହାର୍ବର ପୂର୍ବତନ ବିଧାୟକ ଦୀପକ ହଲଧର, ବିଜେପିର ବୋଲପୁର ଲୋକସଭା ନିର୍ବାଚନ ପ୍ରାର୍ଥୀ ପିଆ ସାହା ଏବଂ ଜାଙ୍ଗିପୁର ଲୋକସଭା ନିର୍ବାଚନମଣ୍ଡଳୀରୁ ବିଜେପି ପ୍ରାର୍ଥୀ ଧନଞ୍ଜୟ ଘୋଷ ମଧ୍ୟ ଏହି ତାଲିକାରେ ଅଛନ୍ତି।
ଅଭିଜିତ୍ ଦାସ କ’ଣ କହିଲେ?:
ସେ କହିଛନ୍ତି ଯେ, “ମୁଁ ହରିଦ୍ୱାରରେ ଅଛି, ମୁଁ ଏ ବିଷୟରେ କିଛି ଜାଣି ନାହିଁ। ମୁଁ ଏପର୍ଯ୍ୟନ୍ତ କୌଣସି ବାର୍ତ୍ତା ପାଇ ନାହିଁ। ଏହା ଏକ ନିତିଦିନିଆ ବିଷୟ, ପ୍ରତି ତିନିମାସରେ କେନ୍ଦ୍ର ଗୃହ ମନ୍ତ୍ରଣାଳୟ ଏ ସମ୍ପର୍କରେ ଏକ ତାଲିକା ପ୍ରକାଶ କରେ। ସେମାନଙ୍କର ଏକ ପ୍ରୋଟୋକଲ୍ ଅଛି। ପୁନର୍ବାର ସେମାନେ ସୁରକ୍ଷା ପ୍ରଦାନ କରୁଛନ୍ତି। ଗତ ୬.୫ ବର୍ଷ ମଧ୍ୟରେ ମୁଁ ଏହା ଅନେକ ଥର ଦେଖିଛି। କିଛି ଦିନ ପୂର୍ବରୁ ୨୦ ଜଣଙ୍କ ନାମ ଥିବା ଏକ ତାଲିକା ଆସିଥିଲା, ପୁଣି ଅନେକ ଲୋକଙ୍କୁ ସୁରକ୍ଷା ଦିଆଯାଇଥିଲା।”
ବିଜେପି ସାଂସଦ କ’ଣ କହିଛନ୍ତି?:
ଏହି ଘଟଣା ଉପରେ ପ୍ରତିକ୍ରିୟା ରଖି ବିଜେପି ସାଂସଦ ତଥା ରାଜ୍ୟ ମୁଖପାତ୍ର ସମିକ ଭଟ୍ଟାଚାର୍ଯ୍ୟ ଗଣମାଧ୍ୟମକୁ କହିଛନ୍ତି ଯେ, “ଏହା ନିୟମିତ ଅଟେ। କାହାକୁ ଏବଂ କେତେବେଳେ ସୁରକ୍ଷା ଯୋଗାଇ ଦିଆଯିବ, ତାହା କେନ୍ଦ୍ର ସ୍ଥିର କରିଥାଏ। ସେତେବେଳେ ଗୃହ ମନ୍ତ୍ରଣାଳୟ ନିଶ୍ଚିତ ଭାବରେ ଅନୁଭବ କରିଥଲା ଯେ, ନେତାମାନେ ସୁରକ୍ଷା ଆବଶ୍ୟକ କରନ୍ତି। ଏ ବିଷୟରେ ରାଜନୀତି କରିବାର କିଛି ନାହିଁ।”