ନୂଆଦିଲ୍ଲୀ: ଦେଶର ପ୍ରତ୍ୟେକ ଜିଲ୍ଲାରେ ଅତି କମରେ ଗୋଟିଏ ଆଦର୍ଶ ଗ୍ରାମ ପଞ୍ଚାୟତ ପ୍ରତିଷ୍ଠା କରିବା ଉଦ୍ଦେଶ୍ୟରେ ପଞ୍ଚାୟତିରାଜ ମନ୍ତ୍ରଣାଳୟ ପକ୍ଷରୁ ୨୦୨୫ ମାର୍ଚ୍ଚ ୫ ତାରିଖରେ ନୂଆଦିଲ୍ଲୀ ଠାରେ ଆଦର୍ଶ ମହିଳା ଅନୁକୂଳ ଗ୍ରାମ ପଞ୍ଚାୟତ ଉପରେ ଜାତୀୟ ସମ୍ମିଳନୀ ଆୟୋଜନ କରାଯାଇଥିଲା। ଅନ୍ତର୍ଜାତୀୟ ମହିଳା ଦିବସ ୨୦୨୫ ପାଳନର ଏକ ଅଂଶ ଭାବରେ ଆୟୋଜିତ ଏହି ଜାତୀୟ ସମ୍ମିଳନୀରେ ଦେଶର ବଛାବଛା ଗ୍ରାମ ପଞ୍ଚାୟତର ୧୫୦୦ରୁ ଅଧିକ ନିର୍ବାଚିତ ପ୍ରତିନିଧି ଓ କର୍ମକର୍ତ୍ତା ଶାରୀରିକ ଓ ଆଭାଷୀ ମାଧ୍ୟମରେ ଅଂଶଗ୍ରହଣ କରିଥିଲେ। ଏହି କାର୍ଯ୍ୟକ୍ରମରେ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ରାଷ୍ଟ୍ରମନ୍ତ୍ରୀ ଶ୍ରୀମତୀ ଅନୁପ୍ରିୟା ପଟେଲ ଏବଂ କେନ୍ଦ୍ର ପଞ୍ଚାୟତିରାଜ ରାଷ୍ଟ୍ରମନ୍ତ୍ରୀ ପ୍ରଫେସର ଏସ୍ ପି ସିଂହ ବାଘେଲ ଉପସ୍ଥିତ ଥିଲେ।
ଏହି କାର୍ଯ୍ୟକ୍ରମରେ ସଚିବ ବିବେକ ଭରଦ୍ୱାଜ ଏବଂ ଅତିରିକ୍ତ ସଚିବ ସୁଶୀଲ କୁମାର ଲୋହାନୀଙ୍କ ସମେତ ବିଭିନ୍ନ ମନ୍ତ୍ରଣାଳୟ/ବିଭାଗ, ରାଜ୍ୟ ଗ୍ରାମ୍ୟ ଉନ୍ନୟନ ଓ ପଞ୍ଚାୟତିରାଜ ପ୍ରତିଷ୍ଠାନ (ଏସଆଇଆରଡି ଏବଂ ପିଆର) ଏବଂ ଜାତିସଂଘ ଜନସଂଖ୍ୟା ପାଣ୍ଠି (ୟୁଏନ୍ଏଫପିଏ) ସମେତ ଅନ୍ତର୍ଜାତୀୟ ସଂଗଠନର ପ୍ରତିନିଧିମାନେ ଅଂଶଗ୍ରହଣ କରିଥିଲେ। ଜାତୀୟ ସମ୍ମିଳନୀରେ ଆଦର୍ଶ ମହିଳା ଅନୁକୂଳ ଗ୍ରାମ ପଞ୍ଚାୟତ ପାଇଁ ଆଭାଷୀ ପ୍ରଶିକ୍ଷଣ କାର୍ଯ୍ୟକ୍ରମ ଏବଂ ଭାରତରେ ଏହି ମହିଳା ଅନୁକୂଳ ଗ୍ରାମ ପଞ୍ଚାୟତ ଗୁଡ଼ିକର ଅଗ୍ରଗତି ଆକଳନ କରିବା ପାଇଁ ଏକ ବ୍ୟାପକ ରିଅଲ ଟାଇମ୍ ମନିଟରିଂ ଡ୍ୟାସବୋର୍ଡ ସମେତ ବିଭିନ୍ନ ପଦକ୍ଷେପର ଶୁଭାରମ୍ଭ କରାଯାଇଥିଲା। ତୃଣମୂଳ ସ୍ତରରେ ମହିଳାଙ୍କ ଅଂଶଗ୍ରହଣ ଏବଂ କଲ୍ୟାଣକୁ ଆକଳନ କରିବା, ବିଶ୍ଳେଷଣ କରିବା ଏବଂ ଉନ୍ନତ କରିବା ପାଇଁ ଏହି ଡିଜିଟାଲ ପ୍ଲାଟଫର୍ମ ହେଉଛି ଏକ ବୈଷୟିକ ହସ୍ତକ୍ଷେପ। ଡ୍ୟାସବୋର୍ଡ ଦେଶର ମହିଳା ନେତ୍ରୀମାନଙ୍କୁ ସମର୍ଥନ କରିବା ପାଇଁ ବାସ୍ତବ ସମୟ ଅନ୍ତଦୃଷ୍ଟି ଏବଂ ତଥ୍ୟ -ଚାଳିତ ହସ୍ତକ୍ଷେପର ପ୍ରତିବଦ୍ଧତା ଦେଇଛି।
କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ରାଷ୍ଟ୍ରମନ୍ତ୍ରୀ ଶ୍ରୀମତୀ ଅନୁପ୍ରିୟା ପଟେଲ ତାଙ୍କ ଅଭିଭାଷଣରେ ମହିଳା ଓ ଶିଶୁମାନଙ୍କୁ ସହାୟତା କରିବା ପାଇଁ କେନ୍ଦ୍ର ସରକାରଙ୍କ ବିଭିନ୍ନ ସ୍ୱାସ୍ଥ୍ୟ ପଦକ୍ଷେପ ସମ୍ପର୍କରେ ବିସ୍ତୃତ ବିବରଣୀ ଉପସ୍ଥାପନ କରିଥିଲେ। ସେ କହିଥିଲେ ଯେ କେନ୍ଦ୍ର ସରକାରଙ୍କ ଯୋଜନାଗୁଡ଼ିକ ଯେପରି ଅଧିକ ଦୁର୍ବଳ ବର୍ଗର ଲୋକଙ୍କ ପାଖରେ ପହଂଚିପାରିବ ସେଥିରେ ମହିଳା ନିର୍ବାଚିତ ପ୍ରତିନିଧିମାନଙ୍କର ପ୍ରମୁଖ ଭୂମିକା ରହିଛି। ପ୍ରତ୍ୟେକ ଗ୍ରାମ ପଞ୍ଚାୟତରେ ଏକ ଗ୍ରାମ ସ୍ୱାସ୍ଥ୍ୟ, ପରିମଳ ଏବଂ ପୋଷଣ କମିଟି ରହିଛି ଯାହା ଗୋଷ୍ଠୀ ସ୍ୱାସ୍ଥ୍ୟ ପାଇଁ ଏକ ସୁଦୃଢ଼ ଢାଞ୍ଚା ପ୍ରସ୍ତୁତ କରେ ବୋଲି କେନ୍ଦ୍ର ରାଷ୍ଟ୍ରମନ୍ତ୍ରୀ ଆଲୋକପାତ କରିଥିଲେ। ଆୟୁଷ୍ମାନ ଆରୋଗ୍ୟ ମନ୍ଦିରରେ ବୃଦ୍ଧାବସ୍ଥାରେ ଯତ୍ନ, ଦାନ୍ତର ଯତ୍ନ, କ୍ୟାନସର, ଟେଲିମେଡିସିନ୍ ସମେତ ବିଭିନ୍ନ ରୋଗର ଯାଂଚ ସମେତ ୧୨ ପ୍ରକାର ଚିକିତ୍ସା ସେବା ଉପଲବ୍ଧ ରହିଛି।
ସେ କହିଥିଲେ ଯେ ମହିଳା ପ୍ରଧାନମାନେ ସେମାନଙ୍କ ପଞ୍ଚାୟତକୁ ସରକାରଙ୍କ ଏହି ପଦକ୍ଷେପ ବିଷୟରେ ସକ୍ରିୟ ଭାବରେ ସଚେତନ କରିବା ଆବଶ୍ୟକ ଯାହା ଦ୍ୱାରା ଅଧିକରୁ ଅଧିକ ଲୋକ ଉପକୃତ ହୋଇପାରିବେ। ଅନୁପ୍ରିୟା ପଟେଲ ଜନନୀ ସୁରକ୍ଷା ଯୋଜନା ଏବଂ ଜନନୀ ଶିଶୁ ସୁରକ୍ଷା କାର୍ଯ୍ୟକ୍ରମ ଭଳି କାର୍ଯ୍ୟକ୍ରମ ଉପରେ ଗୁରୁତ୍ୱାରୋପ କରିଥିଲେ ଯାହା ମାତୃ ଓ ଶିଶୁ ସ୍ୱାସ୍ଥ୍ୟ, ସଂସ୍ଥାଗତ ପ୍ରସବକୁ ପ୍ରୋତ୍ସାହିତ କରିବା ଏବଂ ସୁରକ୍ଷିତ ମାତୃତ୍ୱର ପରମ୍ପରାକୁ ପ୍ରତିଷ୍ଠା ଉପରେ ଗୁରୁତ୍ୱ ଦେଇଥାଏ। ଗ୍ରାମସ୍ତରରେ ସ୍ୱାସ୍ଥ୍ୟ ସମ୍ବନ୍ଧୀୟ ପଦକ୍ଷେପର ସଫଳତା କୁ ସୁନିଶ୍ଚିତ କରିବା ପାଇଁ ପଞ୍ଚାୟତସ୍ତରୀୟ ସହଯୋଗ ଗୁରୁତ୍ୱପୂର୍ଣ୍ଣ ବୋଲି ସେ କହିବା ସହିତ ଏହା ଉଲ୍ଲେଖ କରିଥିଲେ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ “ସଶକ୍ତ ମହିଳା, ସଶକ୍ତ ପଞ୍ଚାୟତ ସଶକ୍ତ ଭାରତ”ର ସ୍ୱପ୍ନକୁ ସୁଦୃଢ଼ କରିଥାଏ।
ନେତୃତ୍ବ ଦକ୍ଷତା ବିକାଶ ପାଇଁ ସ୍ବତନ୍ତ୍ର ପ୍ରଶିକ୍ଷଣ ଲାଗି କେନ୍ଦ୍ର ପଞ୍ଚାୟତିରାଜ ରାଷ୍ଟ୍ରମନ୍ତ୍ରୀ ପ୍ରଫେସର ଏସ୍ ପି ସିଂହ ବାଘେଲ ୭୭୦ଟି ଆଦର୍ଶ ମହିଳା ଅନୁକୂଳ ଗ୍ରାମ ପଞ୍ଚାୟତ ଅର୍ଥାତ୍ ପ୍ରତି ଜିଲ୍ଲାରେ ଗୋଟିଏ ମଡେଲ୍ ଗ୍ରାମ ପଞ୍ଚାୟତ ଚୟନ କରିବାକୁ ଘୋଷଣା କରିଛନ୍ତି। ପ୍ରଧାନମନ୍ତ୍ରୀ ଜୀବନ ଜ୍ୟୋତି ବୀମା ଯୋଜନା, ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନା, ବିଧବା ଓ ଦିବ୍ୟାଙ୍ଗଙ୍କ ପାଇଁ ପେନସନ ଯୋଜନା, ଆୟୁଷ୍ମାନ ଭାରତ ଏବଂ ଅଙ୍ଗଦାନ ଭଳି ପଦକ୍ଷେପକୁ କାର୍ଯ୍ୟକାରୀ କରିବାରେ ନେତୃତ୍ୱ ନେବାକୁ ପ୍ରଫେସର ବାଘେଲ ମହିଳା ଗ୍ରାମ ପ୍ରଧାନମାନଙ୍କୁ ଅନୁରୋଧ କରିଥିଲେ।
ପଞ୍ଚାୟତିରାଜ ମନ୍ତ୍ରଣାଳୟର ସଚିବ ବିବେକ ଭରଦ୍ୱାଜ ଗୁରୁତ୍ୱାରୋପ କରିଥିଲେ ଯେ ଆଦର୍ଶ ମହିଳା ଅନୁକୂଳ ଗ୍ରାମ ପଞ୍ଚାୟତ କାର୍ଯ୍ୟକ୍ରମ ଜୀବନର ସମସ୍ତ କ୍ଷେତ୍ରରେ ମହିଳା ଏବଂ ବାଳିକା ଅଂଶଗ୍ରହଣକୁ ପ୍ରୋତ୍ସାହିତ କରିବା ପାଇଁ ଏକ ଗଭୀର, ଫଳପ୍ରଦ ହସ୍ତକ୍ଷେପ ପ୍ରତିନିଧିତ୍ୱ କରେ। ମହିଳାମାନେ ଅନ୍ତର୍ନିହିତ ଭାବେ ନେତୃତ୍ୱ ନେବା ଏବଂ ସେମାନଙ୍କ ଆକାଂକ୍ଷା ପୂରଣ କରିବାରେ ସହଜରେ ସକ୍ଷମ ଅଟନ୍ତି ବୋଲି ସେ କହିଥିଲେ ଏବଂ ସମାଜ ଏବଂ ପଂଚାୟତଗୁଡ଼ିକୁ ସହାୟକ ପରିବେଶ ସୃଷ୍ଟି କରିବାକୁ ସେ ଆହ୍ୱାନ ଦେଇଥିଲେ ଯାହା ମହିଳାମାନଙ୍କୁ ଜାତୀୟ ଅଭିବୃଦ୍ଧି ପାଇଁ ସେମାନଙ୍କର ସମ୍ଭାବନାକୁ ସମ୍ପୂର୍ଣ୍ଣ ଭାବରେ ଉପଯୋଗ କରିବାରେ ସକ୍ଷମ କରିବ।
କେରଳ, ଓଡ଼ିଶା ଏବଂ ରାଜସ୍ଥାନର ସଫଳ ଆଞ୍ଚଳିକ ଗ୍ରାମ ପଞ୍ଚାୟତ ମଡେଲରୁ ପ୍ରେରଣା ନେଇ ୟୁଏନ୍ଏଫପିଏର କାର୍ଯ୍ୟକ୍ରମ ମୁଖ୍ୟ ଡ. ଦୀପା ପ୍ରସାଦ ମହିଳାଙ୍କ ସୁରକ୍ଷା ଓ ସଶକ୍ତୀକରଣ ସୁନିଶ୍ଚିତ କରିବାରେ ସ୍ଥାନୀୟ ପ୍ରଶାସନର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଥିଲେ। ମହିଳା ଓ ଶିଶୁଙ୍କ ସୁରକ୍ଷା ପାଇଁ ସମର୍ପିତ ଭିଜିଲାନ୍ସ କମିଟି କେରଳର ଜାଗରଥା ସମିତି, ବାଲ୍ୟ ବିବାହ ଭଳି ସାମାଜିକ କୁସଂସ୍କାର ରୋକିବା ଉଦ୍ଦେଶ୍ୟରେ ଓଡ଼ିଶାର ପଦକ୍ଷେପ ଏବଂ ମହିଳା ଅନୁକୂଳ ଓ ଶିଶୁ ଅନୁକୂଳ ଗ୍ରାମ ପଞ୍ଚାୟତର ବିକାଶ ପାଇଁ ରାଜସ୍ଥାନ ପଞ୍ଚାୟତିରାଜ ବିଭାଗ ସହ ୟୁଏନ୍ଏଫପିଏର ସହଯୋଗ ଉପରେ ସେ ଆଲୋକପାତ କରିଥିଲେ।
ଏହି ଜାତୀୟ ସମ୍ମିଳନୀ ମହିଳା – କେନ୍ଦ୍ରିକରୁ ମହିଳା ନେତୃତ୍ୱାଧୀନ ବିକାଶ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ, ଯାହା ଗତ ଏଗାର ବର୍ଷ ମଧ୍ୟରେ ହୋଇଥିବା ଅଗ୍ରଗତିକୁ ପ୍ରତିଫଳିତ କରୁଛି । ଏହି ଯାତ୍ରାରେ ଏକ ପ୍ରମୁଖ ମାଇଲଖୁଣ୍ଟ ହେଉଛି ମହିଳା ସଂରକ୍ଷଣ ବିଲ୍ (ନାରୀ ଶକ୍ତି ବନ୍ଦନ ଅଧିନିୟମ) ପ୍ରଣୟନ, ଏକ ଐତିହାସିକ ଆଇନ ଯାହା ଶୌଚାଳୟ, ସ୍ୱଚ୍ଛ ଇନ୍ଧନ, ଋତୁସ୍ରାବ ପରିଚ୍ଛନ୍ନତା, ଶିକ୍ଷା, ପୁଷ୍ଟି ଇତ୍ୟାଦି ମୌଳିକ ପଦକ୍ଷେପ ସହିତ ନୀତି ନିର୍ଦ୍ଧାରଣରେ ମହିଳାଙ୍କ ଅଧିକ ଅଂଶଗ୍ରହଣକୁ ସୁନିଶ୍ଚିତ କରେ , ଯାହା ମହିଳାଙ୍କ ମୌଳିକ ଆବଶ୍ୟକତାକୁ ବ୍ୟାପକ ଭାବରେ ପୂରଣ କରେ।
ଆସନ୍ତା ୮ ତାରିଖରେ ଦେଶର ସମସ୍ତ ଗ୍ରାମ ପଞ୍ଚାୟତରେ ଦେଶବ୍ୟାପୀ ମହିଳା ଗ୍ରାମସଭା ଆୟୋଜନ କରାଯିବାର କାର୍ଯ୍ୟକ୍ରମ ରହିଛି। ଏହା ତୃଣମୂଳ ସ୍ତରରେ ଆଦର୍ଶ ମହିଳା ଅନୁକୂଳ ଗ୍ରାମ ପଞ୍ଚାୟତ କାର୍ଯ୍ୟକ୍ରମର ଉଦ୍ଦେଶ୍ୟକୁ ଆଗକୁ ବଢ଼ାଇବା ପାଇଁ ଏକ ପ୍ଲାଟଫର୍ମ ଭାବରେ କାର୍ଯ୍ୟ କରିବ ଏବଂ ଲିଙ୍ଗଗତ ସମାନତା ଏବଂ ସ୍ଥାୟୀ ଗ୍ରାମୀଣ ବିକାଶ ପାଇଁ ପ୍ରତିବଦ୍ଧତାକୁ ସୁଦୃଢ଼ କରିବ।
