ନୂଆଦିଲ୍ଲୀ: ଭାରତ ପୁଣି ଥରେ ପାକିସ୍ତାନକୁ ମିଳିତ ଜାତିସଂଘରେ ଘେରିଛି। ମିଳିତ ଜାତିସଂଘ ସୁରକ୍ଷା ପରିଷଦରେ ଶାନ୍ତି ବଜାୟ ରଖିବା ପ୍ରସଙ୍ଗରେ ଆଲୋଚନା ଚାଲିଥିବା ବେଳେ ଭାରତକୁ ଏକ ଭଲ ସୁଯୋଗ ମିଳିଥିଲା। ଏଠାରେ ପାକିସ୍ତାନ ପୁଣି ଥରେ ଜାମ୍ମୁ କାଶ୍ମୀର ପ୍ରସଙ୍ଗ ଉଠାଇଥିଲା। ତେବେ ଏଥର ମଧ୍ୟ ଭାରତ ପଡୋଶୀ ଦେଶକୁ ଏକ ଦର୍ପଣ ଦେଖାଇ ଏହାକୁ କଡା ଭର୍ତ୍ସନା କରିଛି।
ବାସ୍ତବରେ ଭାରତର ସ୍ଥାୟୀ ପ୍ରତିନିଧୀ ରାଷ୍ଟ୍ରଦୂତ ହରିଶ ପି ପାକିସ୍ତାନକୁ ଟାର୍ଗେଟ କରିଛନ୍ତି ଏବଂ କହିଛନ୍ତି ଯେ, ପାକିସ୍ତାନ ଆମ ଜାମ୍ମୁ କାଶ୍ମୀର ଉପରେ ବାରମ୍ବାର ଭିତ୍ତିହୀନ ତଥା ଅନାବଶ୍ୟକ ବିବୃତ୍ତି ଦେଇଥାଏ। ପାକିସ୍ତାନର ମିଥ୍ୟା ଦାବିକୁ କିମ୍ବା ଆତଙ୍କବାଦ ବିସ୍ତାର କରିବାର ନୀତିକୁ ଏଭଳି ବିବୃତ୍ତି ସଠିକ୍ ବୋଲି ପ୍ରମାଣିତ କରିପାରିବ ନାହିଁ।
ଭାରତ ମଧ୍ୟ ସ୍ପଷ୍ଟ ଶବ୍ଦରେ କହିଛି ଯେ, ପାକିସ୍ତାନ ଜମ୍ମୁ-କଶ୍ମୀରର କିଛି ଅଂଶକୁ ବେଆଇନ ଭାବେ ଦଖଲ କରିଛି ଏବଂ ତାଙ୍କୁ ସେହି ଅଞ୍ଚଳ ଛାଡିବାକୁ ପଡିବ। ଛୋଟ ଚିନ୍ତାଧାରା ଏବଂ ଦେଶକୁ ବିଭାଜନ କରିବାର ନୀତି ଛାଡି ଶାନ୍ତି ଆଡକୁ ପାଦ ଦେବା ଉଚିତ ବୋଲି ପାକିସ୍ତାନକୁ ହରିଶ ପରାମର୍ଶ ଦେଇଛନ୍ତି।
ମିଳିତ ଜାତିସଂଘରେ ଅନୁଷ୍ଠିତ ଏହି ବୈଠକରେ ଭାରତ ଏକ ଦୃଢ ବାର୍ତ୍ତା ଦେଇ କହିଛି ଯେ, ‘ସେମାନେ ଯେଉଁ ପିଓକେ (ପାକିସ୍ତାନ ଅକ୍ତିଆର କରିଥିବା କାଶ୍ମୀର) ରେ ବସିଛନ୍ତି, ତାହ ସେମାନଙ୍କୁ ଛାଡିବାକୁ ପଡିବ, ଏହା ପାକିସ୍ତାନ ଏହା ବୁଝିବା ଉଚିତ। ଯଦି ପାକିସ୍ତାନ ଶାନ୍ତି ଚାହୁଁଛି, ତେବେ ପ୍ରଥମେ ଆତଙ୍କବାଦ ଏବଂ ଘୃଣା ବିସ୍ତାର କରିବା ବନ୍ଦ କରିବାକୁ ପଡ଼ିବ।
ଭାରତ ଏହା ମଧ୍ୟ କହିଛି ଯେ, ଆମେ ପାକିସ୍ତାନ ସହ ଭଲ ସମ୍ପର୍କ ଚାହୁଁ, କିନ୍ତୁ ଆତଙ୍କବାଦକୁ ଶେଷ କରିବା ଏବଂ ଶାନ୍ତି ପରିବେଶ ସୃଷ୍ଟି କରିବା ପାକିସ୍ତାନର ଦାୟିତ୍ଵ ଅଟେ ଯାହା ଦ୍ଵାରା ଦୁଇ ଦେଶ ମଧ୍ୟରେ ଏକ ପ୍ରକାର ଆଲୋଚନା ସମ୍ଭବ ହୋଇପାରିବ। ଶେଷରେ ଭାରତ ମଧ୍ୟ ମିଳିତ ଜାତିସଂଘ ପରି ମଞ୍ଚରେ ନିଜର ଛୋଟ ରାଜନୀତି ନକରିବାକୁ ପାକିସ୍ତାନକୁ ପରାମର୍ଶ ଦେଇଛି। ପୁରୁଣା ବିବାଦକୁ ଛାଡି ଏଠାରେ ଆମକୁ ଶାନ୍ତି ବିଷୟରେ କହିବାକୁ ପଡିବ। ମୋଟ ଉପରେ ଭାରତ ପୁନର୍ବାର ପାକିସ୍ତାନକୁ ମନେ ପକାଇ ଦେଇଛି ଯେ, ଏହାର ଅବୈଧ ଦଖଲ କୌଣସି ପରିସ୍ଥିତିରେ ଜାରି ରହିପାରିବ ନାହିଁ।
