ରଣପୁର: ଅଯୋଧ୍ୟା ଯାହାଙ୍କ ଘର, ମର୍ଯ୍ୟାଦା ପୁରଷୋତ୍ତମ ସେ ରାମ। ଆଜି ପବିତ୍ର ଶ୍ରୀରାମ ନବମୀ। ସବୁଠି ଉତ୍ସାହ ଆନନ୍ଦ। ରାମଭକ୍ତିରେ ଭିଜିଛନ୍ତି ଶ୍ରଦ୍ଧାଳୁ। ଭବ୍ୟ ଦିବ୍ୟ ରାମନବମୀ ପାଇଁ ଉତ୍ସବ ମୁଖର ହୋଇଛି ଗାଁ ଠାରୁ ସହର। ରାମଧ୍ୱନୀରେ କମ୍ପୁଛି ଗଗନ ପବନ। ଝଲସୁଛି ରାମ ମନ୍ଦିର, ମଠ।
ନୟାଗଡ ଜିଲ୍ଲା ରଣପୁରରେ ବଜରଙ୍ଗୀ ଦଳ ତରଫରୁ ସ୍ୱତନ୍ତ୍ର କାର୍ଯ୍ୟକ୍ରମର ଆୟୋଜନ ହୋଇଛି। ଧୁମଧାମ୍ରେ ପାଳନ ହେଉଛି ଦିବ୍ୟ ଉତ୍ସବ। ରଣପୁରରେ ପ୍ରାୟ ୩୦ ପ୍ରକାର ମେଢ଼ ଦ୍ୱାରା ଶୋଭାଯାତ୍ରା କରିଯିବ ବୋଲି ବଜରଙ୍ଗୀ ଦଳର ସଦସ୍ୟ ଅଶୋକ ତୋଟାଳ କହିଛନ୍ତି। ଏହି ଶୋଭାଯାତ୍ରା ଆଜି ଦିନ ୩ ଟାରେ ଆରମ୍ଭ ହେବ।
ତୋରଣ ଓ ପତାକାରେ ଝଲସୁଛି ରଣପୁର ବଡ଼ ଦାଣ୍ଡ। ପ୍ରଭୁ ଶ୍ରୀରାମଙ୍କ ଜନ୍ମଦିନ ପାଇଁ ଉତ୍ସବମୁଖର ହୋଇ ଉଠିଛି ବିଭିନ୍ନ ମନ୍ଦିର ସମତେ ରଣପୁର ଅଞ୍ଚଳ। ଭକ୍ତମାନେ କିଭଳି ଶୃଙ୍ଖଳିତ ଭାବେ ଦର୍ଶନ କରିବେ ସେଥିପାଇଁ ବ୍ୟବସ୍ଥା ହୋଇଛି ବୋଲି ବଜରଙ୍ଗୀ ଦଳ ସୂଚନା ଦେଇଛି।
ଅଲୌକିକ ଚରିତ୍ର ପ୍ରଭୁ ଶ୍ରୀରାମ- ଭାରତୀୟ ଧର୍ମ ଓ ସଂସ୍କୃତିରେ ପୁରୁଷୋତ୍ତମ ଶ୍ରୀରାମଚନ୍ଦ୍ର ଏକ ଅନନ୍ୟ ଚରିତ୍ର। ପୁରାଣରେ ବର୍ଣ୍ଣିତ ହୋଇଛି ଜଳନ୍ଧର ଦୈତ୍ୟ ପାଇଁ ହିଁ ପ୍ରଭୁ ଶ୍ରୀରାମ ଅବତାର ନେଇ ଧରାବତରଣ କରିଥିଲେ। ପ୍ରବଳପ୍ରତାପୀ ଅସୁରଶ୍ରେଷ୍ଠ ଜଳନ୍ଧର ଧରାକୁ ସରା ମଣୁଥିଲା ଓ ତାର ପତ୍ନୀ ବୃନ୍ଦାବତୀ ଖୁବ୍ ସୁନ୍ଦରୀ, ସତୀ ଓ ଗୁଣବତୀ ଥିଲା। ସେଇ ଗର୍ବରେ ଜଳନ୍ଧର ଉନ୍ମତ୍ତ ହୋଇ ଦେବକୂଳକୁ ଭୟଭୀତ କରାଇଥିଲେ। ସମସ୍ତେ ତ୍ରାହି ତ୍ରାହି ଡାକ ଦେଲେ। ତ୍ରେତୟା ଯୁଗରେ ନୟନାଭିରାମ ପ୍ରଭୁ ଶ୍ରୀରାମଚନ୍ଦ୍ର ରାଜା ଦଶରଥଙ୍କ ପୁତ୍ର ଭାବରେ ଅଯୋଧ୍ୟାରେ ଜନ୍ମ ନେଲେ। ଅନନ୍ତ ଗୁଣର ଅଧିକାରୀ ଥିଲେ ସେ ପୁରୁଷୋତ୍ତମ। ସତ୍ୟ, ଧର୍ମ, ଦୟା, କ୍ଷମା, ଶାନ୍ତି, ତେଜ, ପ୍ରେମର ଏକ ମୂର୍ତ୍ତିମନ୍ତ ଅବତାର ସେ।