ନୂଆଦିଲ୍ଲୀ: ‘ଅପରେସନ୍ ସିନ୍ଦୂର’ ସମୟରେ ପାକିସ୍ତାନ ଉପରେ ଭାରତୀୟ ସେନାର ସଠିକ୍ କାର୍ଯ୍ୟାନୁଷ୍ଠାନ ବିଷୟରେ ଗଣମାଧ୍ୟମକୁ ସୂଚନା ଦେଇଥିବା ସେନା ଅଧିକାରୀ କର୍ଣ୍ଣେଲ ସୋଫିଆ କୁରେଶୀଙ୍କ ବିରୋଧରେ ମଧ୍ୟପ୍ରଦେଶ ସରକାରଙ୍କ ମନ୍ତ୍ରୀ ବିଜୟ ଶାହ ଏକ ଆପତ୍ତିଜନକ ବୟାନ ଦେଇଥିଲେ। ଏହି ମାମଲାରେ ସୁପ୍ରିମକୋର୍ଟ ମନ୍ତ୍ରୀ ବିଜୟ ଶାହାଙ୍କ କ୍ଷମା ପ୍ରାର୍ଥନାକୁ ଖାରଜ କରିଛନ୍ତି। ଏହା ସହିତ ଶୁଣାଣି ସମୟରେ ମନ୍ତ୍ରୀ ବିଜୟ ଶାହଙ୍କୁ ସୁପ୍ରିମକୋର୍ଟ ଭର୍ତ୍ସନା କରିଛନ୍ତି।
ଶ୍ରୀ ଶାହାଙ୍କ ଓକିଲ କହିଛନ୍ତି ଯେ, ମନ୍ତ୍ରୀ କ୍ଷମା ମାଗିଛନ୍ତି। ଯାହା ଉପରେ ଜଷ୍ଟିସ ସୂର୍ଯ୍ୟକାନ୍ତ କହିଥିଲେ ଯେ, ଏହା କି ପ୍ରକାରର କ୍ଷମା ପ୍ରାର୍ଥନା। ସୁପ୍ରିମକୋର୍ଟ କହିଛନ୍ତି ଯେ, ଆପଣ ଜଣେ ପବ୍ଲିକ ଫିଗର, କଥା ହେବା ସମୟରେ ଆପଣଙ୍କ ଶବ୍ଦ ପ୍ରତି ସତର୍କ ରୁହନ୍ତୁ। ସୁପ୍ରିମକୋର୍ଟ କହିଛନ୍ତି ଯେ, ଆମକୁ କ୍ଷମା ମାଗିବାର ଆବଶ୍ୟକତା ନାହିଁ, ଏହା ଅବମାନନା ନୁହେଁ। ଆମେ ଏହାକୁ ଆଇନ ଅନୁଯାୟୀ ପରିଚାଳନା କରିପାରିବୁ। କେବଳ କୋର୍ଟ ଆସୁଥିବାରୁ ଆପଣ କ୍ଷମା ମାଗୁଛନ୍ତି।
ସୁପ୍ରିମକୋର୍ଟ କହିଛନ୍ତି ଯେ, ଆମେ ଏକ SIT ଗଠନ କରୁଛୁ, ଏଥିରେ ତିନି ଜଣ IPS ଅଧିକାରୀ ରହିବେ – ଯେଉଁମାନେ MP ବାହାରର ହେବେ। ଆମେ ଏହି ବିଷୟ ଉପରେ ସତର୍କ ନଜର ରଖିବୁ। ଆପଣ ଯାହା କହିଛନ୍ତି, ତା’ର ପରିଣାମ ଭୋଗିବାକୁ ପଡିବ। SITରେ ତିନି ଜଣ IPS ଅଧିକାରୀଙ୍କ ମଧ୍ୟରେ ଜଣେ ମହିଳା ଅଧିକାରୀ ରହିବେ। ମଙ୍ଗଳବାର ସକାଳ ୧୦ ଟା ସୁଦ୍ଧା SIT ଗଠନ କରାଯିବା ଉଚିତ। ସୁପ୍ରିମକୋର୍ଟ SITକୁ ମେ ୨୮ ତାରିଖ ସୁଦ୍ଧା ଏକ ସ୍ଥିତି ରିପୋର୍ଟ ଦାଖଲ କରିବାକୁ କହିଛନ୍ତି।