ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଦିଗପହଣ୍ଡି ଅଞ୍ଚଳର ଜନୈକା ନାବାଳିକା ସହ ନିକଟସ୍ଥ ସାହାସପୁର ଗ୍ରାମର ଚନ୍ଦନ ସ୍ବାଇଁ ନାମକ ଜଣେ ଯୁବକଙ୍କ ପ୍ରେମ ସମ୍ପର୍କ ରହିଥିଲା। ଗତ କିଛି ଦିନ ତଳେ ଯୁବକ ଜଣକ ଉକ୍ତ ନାବାଳିକାକୁ ବିବାହର ପ୍ରଲୋଭନ ଦେଖାଇ କନ୍ଧମାଳ ଜିଲ୍ଲା ବାଲିଗୁଡା ନେଇ ଗୋଟିଏ ଭଙ୍ଗା ଘରେ ରଖି ଦୁଷ୍କର୍ମ କରିଥିଲା। ଏହି ଭଳି ପରିସ୍ଥିତିରେ ନାବାଳିକା ଜଣକ ଆପତ୍ତି କରିବାରୁ ଯୁବକ ଜଣକ ନାବାଳିକାକୁ ସେଠାରେ ଛାଡି ଫେରାର ହୋଇଯାଇଥିଲା।
ସେପଟେ ନାବାଳିକା ଝିଅର ସନ୍ଧାନ ନମିଳିବାରୁ ବାପା ଗତ ରବିବାର ଦିନ ଦିଗପହଣ୍ଡି ଥାନା ରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ପୋଲିସ ମାମଲା ନଂ ୧୭୬/୨୫ ଅନୁଯାୟୀ ମକଦ୍ଦମା ରୁଜୁ କରି ଘଟଣାର ତଦନ୍ତ ଚଳାଇଥିବା ବେଳେ ତଦନ୍ତ ଅଧିକାରୀ ଏସ୍ ଆଇ ସୋଫିଆ ମିଶ୍ର କୌଣସି ସୁତ୍ରରୁ ଖବର ପାଇ ଶେରଗଡ଼ ବସଷ୍ଟାଣ୍ଡରେ ବୁଲୁଥିବା ଅବସ୍ଥାରେ ନାବାଳିକାକୁ ଧରିଥିଲେ। ନାବାଳିକାକୁ ଜେରା କରିବା ପରେ ପୋଲିସ ଘଟଣା ବିଷୟରେ ଜାଣିପାରିଥିଲା ଓ ଅଭିଯୁକ୍ତ ଚନ୍ଦନକୁ ତା’ର ଗାଁ ସାହାପୁରସ୍ଥିତ ବାସଭବନରୁ ଉଠାଇ ଆଣିଥିଲା। ଉଭୟଙ୍କୁ ଡ଼ାକ୍ତରୀ ମାଇନା କରି ଅଭିଯୁକ୍ତକୁ ଭାରତୀୟ ନ୍ୟାୟ ସଂହିତା ର ବିଭିନ୍ନ ଦଫାରେ ଗିରଫ କରି କୋର୍ଟ ଚାଲାଣ କରାଯାଇଛି।