କଲିକତା: ପଶ୍ଚିମବଙ୍ଗ ଗସ୍ତ ସମୟରେ ଟିଏମସି ସରକାରଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଟାର୍ଗେଟ କରିଛନ୍ତି। ଯାହା ପରେ ରାଜ୍ୟ ମୁଖ୍ୟମନ୍ତ୍ରୀ ମମତା ବାନାର୍ଜୀ ତାଙ୍କ ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି ଯେ, ବଙ୍ଗଳା ବିରୁଦ୍ଧରେ ବୟାନବାଜି ଠିକ୍ ନୁହେଁ। ଅପରେସନ ସିନ୍ଦୁର ଏବଂ ପହଲଗାମ ଆତଙ୍କବାଦୀ ଆକ୍ରମଣ ଉପରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି ଯେ, “ପ୍ରଧାନମନ୍ତ୍ରୀ ମୋଦି ଆଜି ଯାହା କହିଛନ୍ତି ତାହା ଶୁଣି ଆମେ କେବଳ ଆଶ୍ଚର୍ଯ୍ୟ ହୋଇନାହୁଁ, ବରଂ ଏହା ଶୁଣିବା ଦୁର୍ଭାଗ୍ୟଜନକ।”
ପ୍ରଧାନମନ୍ତ୍ରୀ ମୋଦୀଙ୍କୁ ମମତା ବାନାର୍ଜୀଙ୍କ ଚ୍ୟାଲେଞ୍ଜ:
ବଙ୍ଗଳା ମୁଖ୍ୟମନ୍ତ୍ରୀ କହିଛନ୍ତି ଯେ, “ସମ୍ପୂର୍ଣ୍ଣ ବିରୋଧୀ ଦଳ ବିଶ୍ୱରେ ଦେଶକୁ ପ୍ରତିନିଧିତ୍ୱ କରୁଛନ୍ତି, ସେମାନେ ଦେଶର ଜାତୀୟ ସ୍ୱାର୍ଥକୁ ସୁରକ୍ଷା ଦେବା ପାଇଁ ଏକ ସାହସିକ ପଦକ୍ଷେପ ନେଇଛନ୍ତି। କିନ୍ତୁ ପ୍ରଧାନମନ୍ତ୍ରୀ ମୋଦୀ ଏବଂ ତାଙ୍କ ନେତାମାନେ କହୁଛନ୍ତି ଯେ, ସେମାନେ ମଧ୍ୟ ଅପରେସନ ସିନ୍ଦୁର ପରି ଅପରେସନ ବେଙ୍ଗଲ କରିବେ। ଯଦି ସେମାନଙ୍କ ପାଖରେ ଆସନ୍ତାକାଲି ନିର୍ବାଚନ ଲଢ଼ିବାର ସାହସ ଅଛି, ତେବେ ମୁଁ ସେମାନଙ୍କୁ ଚ୍ୟାଲେଞ୍ଜ କରୁଛି, ଆମେ ପ୍ରସ୍ତୁତ ଏବଂ ବଙ୍ଗଳା ଆପଣଙ୍କ ଚ୍ୟାଲେଞ୍ଜକୁ ଗ୍ରହଣ କରିବାକୁ ପ୍ରସ୍ତୁତ।”
ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି ଯେ, ଆମର ପ୍ରତିନିଧି ଅଭିଷେକ ବାନାର୍ଜୀ ମଧ୍ୟ ବିଦେଶ ଯାଇଥିବା ପ୍ରତିନିଧି ଦଳରେ ଅଛନ୍ତି ଏବଂ ସେ ପ୍ରତିଦିନ ଆତଙ୍କବାଦ ବିରୁଦ୍ଧରେ କହୁଛନ୍ତି। ସେ ଟାର୍ଗେଟ କରି କହିଥିଲେ ଯେ, ଆପଣ (ପ୍ରଧାନମନ୍ତ୍ରୀ ମୋଦୀ) ଏହି ସମୟରେ ବିରୋଧୀଙ୍କୁ ଦୋଷ ଦେବାକୁ ଚାହୁଁଛନ୍ତି, ଯାହା ଦ୍ଵାରା ବିଜେପି ଜୁମଲା ପାର୍ଟିର ନେତାଙ୍କ ପରି ରାଜନୀତିକରଣ କରାଯାଇପାରିବ।
ବଙ୍ଗଳାର ମୁଖ୍ୟମନ୍ତ୍ରୀ କହିଛନ୍ତି ଯେ, “ପ୍ରଧାନମନ୍ତ୍ରୀ ମୋଦୀ ମିଛ କହୁଛନ୍ତି। ସେମାନେ ଦେଶକୁ ଲୁଟନ୍ତି ଏବଂ ଫେରାର ହୋଇଯା’ନ୍ତି। ଏପରି କଥା କହିବା ଭଲ ଲାଗୁନାହିଁ। ଯଦିଓ ମୋର ଅପରେସନ ସିନ୍ଦୁର ଉପରେ କୌଣସି ମନ୍ତବ୍ୟ ନାହିଁ, କିନ୍ତୁ ଦୟାକରି ମନେରଖନ୍ତୁ ଯେ ପ୍ରତ୍ୟେକ ମହିଳାଙ୍କ ସମ୍ମାନ ଅଛି। ଆତଙ୍କବାଦ ବିରୁଦ୍ଧରେ ଆମେ କେନ୍ଦ୍ରକୁ ସମର୍ଥନ କରୁଥିବା ସମୟରେ ପ୍ରଧାନମନ୍ତ୍ରୀ ମୋଦୀ ପଶ୍ଚିମବଙ୍ଗର ସମାଲୋଚନା କରୁଛନ୍ତି। ସେମାନଙ୍କର ନୀତି ହେଉଛି ବିଭାଜନ କର ଏବଂ ଶାସନ କର। ରାଜନୈତିକ ଉଦ୍ଦେଶ୍ୟ ରଖି କେନ୍ଦ୍ର ଅପରେସନ ସିନ୍ଦୁରର ନାମ ଦେଇଛି।”
ଅଲିପୁରଦ୍ଵାରରେ ଏକ ସାଧାରଣ ସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ବଙ୍ଗଳାର ଲୋକମାନେ ଆଉ ଟିଏମସି ସରକାରଙ୍କ ବ୍ୟବସ୍ଥା ଉପରେ ବିଶ୍ୱାସ କରନ୍ତି ନାହିଁ। ଏଠାକାର ଲୋକଙ୍କ ପାଖରେ ଏବେ କେବଳ କୋର୍ଟ ଉପରେ ନିର୍ଭର କରିବାକୁ ପଡୁଛି, ତେଣୁ ସମଗ୍ର ବଙ୍ଗଳାରେ ଚିତ୍କାର ଶୁଭୁଛି, ଏଭଳି ନିଷ୍ଠୁର ସରକାର ଦରକାର ନାହିଁ।”