ନୂଆଦିଲ୍ଲୀ: ସୂଚନା ଓ ପ୍ରସାରଣ ମନ୍ତ୍ରଣାଳୟ ମଙ୍ଗଳବାର ନୂଆଦିଲ୍ଲୀର ବିଜ୍ଞାନ ଭବନରେ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳ ସୂଚନା ଓ ଲୋକସମ୍ପର୍କ (ଆଇ ଆଣ୍ଡ ପିଆର) ସଚିବମାନଙ୍କର ଏକ ଉଚ୍ଚସ୍ତରୀୟ ସମ୍ମିଳନୀର ଆୟୋଜନ କରିଛି। କେନ୍ଦ୍ର ସୂଚନା ଓ ପ୍ରସାରଣ ରାଷ୍ଟ୍ରମନ୍ତ୍ରୀ ଡକ୍ଟର ଏଲ୍. ମୁରୁଗନ, ସୂଚନା ଓ ପ୍ରସାରଣ ସଚିବ ସଞ୍ଜୟ ଜାଜୁ ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ସମ୍ମିଳନୀରେ ଉଦବୋଧନ ଦେଇଛନ୍ତି। ଗଣ ଯୋଗାଯୋଗ କ୍ଷେତ୍ରରେ କେନ୍ଦ୍ର-ରାଜ୍ୟ ସମନ୍ୱୟକୁ ସୁଦୃଢ଼ କରିବା, ପ୍ରେସ୍ ସେବା ପୋର୍ଟାଲ୍ ଏବଂ ଇଣ୍ଡିଆ ସିନେ ହବ୍ ର ପୂର୍ଣ୍ଣାଙ୍ଗ କାର୍ଯ୍ୟକାରିତା ସୁନିଶ୍ଚିତ କରିବା ତଥା ଚଳଚ୍ଚିତ୍ର ଭିତ୍ତିଭୂମି ବିକାଶ ଓ ବିଭିନ୍ନ କ୍ଷେତ୍ରରେ ଭାରତର ସୃଜନଶୀଳ ଅର୍ଥବ୍ୟବସ୍ଥାକୁ ପ୍ରୋତ୍ସାହିତ କରିବା ପାଇଁ ସହଯୋଗୀ ସୁଯୋଗ ଅନୁସନ୍ଧାନ କରିବା ଏହି ସମ୍ମିଳନୀର ଉଦ୍ଦେଶ୍ୟ।
ସମ୍ମିଳନୀରେ ଉଦବୋଧନ ଦେଇ କେନ୍ଦ୍ର ସୂଚନା ଏବଂ ପ୍ରସାରଣ ରାଷ୍ଟ୍ରମନ୍ତ୍ରୀ ଡକ୍ଟର ଏଲ୍. ମୁରୁଗନ କହିଥିଲେ, ଇଣ୍ଡିଆନ୍ ସିନେମା ହବ୍ ପୋର୍ଟାଲ୍କୁ ଏକକ ସିଙ୍ଗଲ୍-ୱିଣ୍ଡୋ ସିଷ୍ଟମ ରୂପେ ପୁନଃନିର୍ମାଣ କରାଯାଇଛି । ଏହା ସାରା ଭାରତରେ ଚଳଚ୍ଚିତ୍ର ନିର୍ମାଣ ସହ ଜଡ଼ିତ ମଞ୍ଜୁରି ଏବଂ ସେବାଗୁଡ଼ିକୁ ସୁଗମ ଉପଲବ୍ଧତା ପ୍ରଦାନ କରୁଛି। ଜିଆଇଏସ ବୈଶିଷ୍ଟ୍ୟ ଏବଂ ସାଧାରଣ ଫର୍ମ ସହିତ, ଏହା ବ୍ୟବସାୟିକ ସୁଗମତାକୁ ସମର୍ଥନ କରିଥାଏ। ଏହା ମଧ୍ୟ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତର ଚଳଚ୍ଚିତ୍ର-ଅନୁକୂଳ ନୀତିଗୁଡ଼ିକୁ ପ୍ରଦର୍ଶନ କରେ।
ମନ୍ତ୍ରୀ କମ ମୂଲ୍ୟର ଥିଏଟର ମାଧ୍ୟମରେ ମହିଳା ଏବଂ ସ୍ଥାନୀୟ ସମାଜକୁ ସଶକ୍ତ କରୁଥିବା ତୃଣମୂଳ ସ୍ତରର ସିନେମା ପ୍ରୟାସ ଉପରେ ମଧ୍ୟ ଆଲୋକପାତ କରିଥିଲେ। ସେ ୱେଭ୍ସ ୨୦୨୫ ଏବଂ ଆଇଏଫଏଫଆଇ ଗୋଆ ଭଳି ପ୍ରମୁଖ ବିଶ୍ୱସ୍ତରୀୟ କାର୍ଯ୍ୟକ୍ରମ ଉପରେ ଗୁରୁତ୍ୱାରୋପ କରିଥିଲେ। କେନ୍ଦ୍ର ମନ୍ତ୍ରୀ କହିଥିଲେ, ଏହା ବିଶ୍ୱ ପ୍ରତିଭାକୁ ଆକର୍ଷିତ କରିବ, ଭାରତର ସୃଜନଶୀଳ ଅର୍ଥବ୍ୟବସ୍ଥାକୁ ବୃଦ୍ଧି କରିବ, ବିଶ୍ୱବ୍ୟାପୀ ସାଂସ୍କୃତିକ କୂଟନୀତିକୁ ପ୍ରୋତ୍ସାହିତ କରିବ ଏବଂ ଆଗାମୀ ଦିନର ସୃଜନଶୀଳ ପ୍ରତିଭାଙ୍କୁ ସଶକ୍ତ କରିବ।
ସମ୍ପ୍ରତି ଆରମ୍ଭ ହୋଇଥିବା ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ କ୍ରିଏଟିଭ ଟେକ୍ନୋଲୋଜି (ଆଇଆଇସିଟି) ଉପରେ ସେ ବିଶେଷ ଗୁରୁତ୍ୱାରୋପ କରିଥିଲେ। ମନ୍ତ୍ରୀ କହିଥିଲେ, ଆଇଆଇସିଟିର ଲକ୍ଷ୍ୟ ଯୁବପିଢ଼ିଙ୍କୁ ଆନିମେସନ୍, ଗେମିଂ, ସଙ୍ଗୀତ ଏବଂ ଅନ୍ୟାନ୍ୟ ସୃଜନଶୀଳ କ୍ଷେତ୍ରରେ ଦକ୍ଷତା ପ୍ରଦାନ କରିବା। ଦେଶରେ ସୃଜନଶୀଳ ଅର୍ଥବ୍ୟବସ୍ଥାକୁ ବୃଦ୍ଧି କରିବା ପାଇଁ ଭାରତ ସରକାରଙ୍କ ପ୍ରୟାସ ଉପରେ ସେ ଆଲୋକପାତ କରିଥିଲେ।
ଏହି କାର୍ଯ୍ୟକ୍ରମ ସମୟରେ, ସୂଚନା ଓ ପ୍ରସାରଣ ସଚିବ ଶ୍ରୀ ସଞ୍ଜୟ ଜାଜୁ ପ୍ରଭାବଶାଳୀ ଯୋଗାଯୋଗ ଏବଂ ଗଣମାଧ୍ୟମ ବିକାଶରେ କେନ୍ଦ୍ର-ରାଜ୍ୟ ସହଯୋଗ ଉପରେ ଗୁରୁତ୍ୱାରୋପ କରିଥିଲେ। ସେ ଡିଜିଟାଲ କ୍ରିଏଟର, ସ୍ଥାନୀୟ ଗଣମାଧ୍ୟମର ବିକାଶ ଏବଂ ଜିଲ୍ଲାସ୍ତରୀୟ ସୂଚନା ଓ ଲୋକସଂପର୍କ ପ୍ରତିଷ୍ଠାନଗୁଡ଼ିକୁ ସଶକ୍ତ କରିବାର ଆବଶ୍ୟକତା ଉପରେ ଆଲୋକପାତ କରିଥିଲେ। ସେ ସମସ୍ତ ରାଜ୍ୟକୁ ସୁଗମ ପ୍ରକାଶନ ପ୍ରକ୍ରିୟା ପାଇଁ ପ୍ରେସ୍ ସେବା ପୋର୍ଟାଲ୍ ସହିତ ଯୋଡ଼ି ହେବାକୁ ଅନୁରୋଧ କରିଥିଲେ।
ଶ୍ରୀ ଜାଜୁ ସିନେମା ଏବଂ କଣ୍ଟେଣ୍ଟ ବା କାର୍ଯ୍ୟକ୍ରମ ପ୍ରସ୍ତୁତିର ଆର୍ଥିକ ସମ୍ଭାବନା ଉପରେ ମଧ୍ୟ ଆଲୋକପାତ କରିଥିଲେ । ମହାନଗର ବାହାରେ ବିସ୍ତାର ଏବଂ ସ୍ଥାନୀୟ ପ୍ରତିଭାକୁ ସମର୍ଥନ କରିବାର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ସେ କହିଥିଲେ, ଚଳଚ୍ଚିତ୍ର ନିର୍ମାଣକୁ ପ୍ରୋତ୍ସାହିତ କରିବା ଏବଂ କଣ୍ଟେଣ୍ଟରୁ ଆର୍ଥିକ ଲାଭ ଅର୍ଜନ କରିବା ପାଇଁ ନିର୍ମାତାମାନଙ୍କୁ ସକ୍ଷମ କରିବା ପାଇଁ ଇଣ୍ଡିଆ ସିନେ ହବ୍ ଭଳି ପଦକ୍ଷେପ ପ୍ରଚଳନ କରାଯାଇଛି। ୱେଭ୍ସ ସମ୍ମିଳନୀକୁ ଏକ ବିଶ୍ୱସ୍ତରୀୟ ଆନ୍ଦୋଳନ ବୋଲି ସେ ଅଭିହିତ କରିଥିଲେ ଏବଂ ଗଣମାଧ୍ୟମ ଇକୋସିଷ୍ଟମରେ ଆଲୋଚନା ଓ ସହଯୋଗକୁ ଗଭୀର କରିବା ପାଇଁ ଗୋଆରେ ଆଇଏଫଏଫଆଇ ସହିତ ଏକ ରେଡିଓ କନକ୍ଲେଭ ପାଇଁ ଯୋଜନା ବିଷୟରେ ଘୋଷଣା କରିଥିଲେ।
ସମ୍ମିଳନୀର ପ୍ରମୁଖ କେନ୍ଦ୍ରବିନ୍ଦୁ କ୍ଷେତ୍ରଗୁଡ଼ିକ ମଧ୍ୟରୁ ଗୋଟିଏ ଥିଲା ରାଜ୍ୟ ଏବଂ କେନ୍ଦ୍ର ଶାସିତ ପ୍ରଦେଶର ସମ୍ପୃକ୍ତ ଅଧିକାରୀମାନଙ୍କୁ ପ୍ରେସ୍ ସେବା ପୋର୍ଟାଲ ସମ୍ପର୍କରେ ସଚେତନ ଏବଂ ଅନବୋର୍ଡିଂ କରିବା । ପ୍ରେସ୍ ଏବଂ ପଞ୍ଜିକରଣ ଆଇନ (ପିଆରପି ଆଇନ), ୨୦୨୩ ଅଧୀନରେ ଭାରତର ପ୍ରେସ୍ ରେଜିଷ୍ଟ୍ରାର ଜେନେରାଲଙ୍କ ଦ୍ୱାରା ବିକଶିତ, ଏହି ପୋର୍ଟାଲ୍ ଏକ ସିଙ୍ଗଲ୍-ୱିଣ୍ଡୋ ଡିଜିଟାଲ୍ ପ୍ଲାଟଫର୍ମ ଯାହା ପତ୍ରିକା ଓ ଖବରକାଗଜ ସମ୍ବନ୍ଧୀୟ ପଞ୍ଜିକରଣ ଏବଂ ଅନୁପାଳନ ପ୍ରକ୍ରିୟାକୁ ସହଜ କରିଛି ।
ସେହିପରି ପୁନଃନିର୍ମିତ ଇଣ୍ଡିଆ ସିନେ ହବ୍ ପୋର୍ଟାଲ୍ ଉପରେ ସମ୍ମିଳନୀରେ ଗୁରୁତ୍ୱାରୋପ କରାଯାଇଥିଲା। ଏହି ପୋର୍ଟାଲ ୨୮ ଜୁନ୍ ୨୦୨୪ରେ ଲାଇଭ୍ ହୋଇଥିଲା। ଏହି ପୋର୍ଟାଲ୍ ବର୍ତ୍ତମାନ ସାରା ଭାରତରେ ଫିଲ୍ମ ସମ୍ବନ୍ଧୀୟ ସୁବିଧା ପାଇଁ ଏକ ସିଙ୍ଗଲ୍-ୱିଣ୍ଡୋ ସିଷ୍ଟମ୍ ଭାବରେ କାର୍ଯ୍ୟ କରୁଛି, ଯାହା କେନ୍ଦ୍ର, ରାଜ୍ୟ ଏବଂ ସ୍ଥାନୀୟ ସ୍ତରରେ ଚଳଚ୍ଚିତ୍ର ନିର୍ମାଣ ଅନୁମତି, ପ୍ରୋତ୍ସାହନ ଏବଂ ସମ୍ବଳ ମ୍ୟାପିଂ ପାଇଁ ସମନ୍ୱିତ ସୁବିଧା ପ୍ରଦାନ କରୁଛି। ସାତଟି ରାଜ୍ୟ ଏବଂ ଦୁଇଟି କେନ୍ଦ୍ରଶାସିତ ପ୍ରଦେଶ ସମ୍ପୂର୍ଣ୍ଣ ଭାବେ ଏହା ସହ ଯୋଡ଼ି ହୋଇସାରିଛି । ଅନ୍ୟପକ୍ଷରେ ଏକ ସାଧାରଣ ଆବେଦନ ଫର୍ମ ମାଧ୍ୟମରେ ୨୧ଟି ରାଜ୍ୟ ଏବଂ ଛଅଟି କେନ୍ଦ୍ରଶାସିତ ପ୍ରଦେଶକୁ ଅନବୋର୍ଡ କରାଯାଇଛି ।
ଇଣ୍ଡିଆ ସିନେ ହବ୍ ପୋର୍ଟାଲ୍ ଜିଆଇଏସ୍ ଆଧାରିତ ସ୍ଥାନ ମ୍ୟାପିଂ, ଶିଳ୍ପ ପେସାଦାରଙ୍କ ଠାରୁ ଆରମ୍ଭ କରି କ୍ରାଉଡସୋର୍ସ କଣ୍ଟେଣ୍ଟ ଏବଂ ଚଳଚ୍ଚିତ୍ର ନିର୍ମାଣ ଓ ପ୍ରୋତ୍ସାହନ ସହ ଜଡ଼ିତ ବିଭିନ୍ନ ଭିନ୍ନ କାର୍ଯ୍ୟପ୍ରବାହକୁ ସମର୍ଥନ କରିଛି। ଏହି ସମ୍ମିଳନୀରେ ଆବେଦନଗୁଡ଼ିକର ପ୍ରକ୍ରିୟାକରଣ ଏବଂ ବିଶ୍ୱସ୍ତରୀୟ ଚଳଚ୍ଚିତ୍ର ଗନ୍ତବ୍ୟସ୍ଥଳ ଭାବରେ ଭାରତର ଆକର୍ଷଣରେ ସୁଧାର ଆଣିବା ଲାଗି ଯାଞ୍ଚ କରାଯାଇଥିବା ତଥ୍ୟ ଯୋଗଦାନ ଉପରେ ଆଲୋଚନା କରାଯାଇଥିଲା।
ସମ୍ମିଳନୀରେ ଅନୁନ୍ନତ ଅଞ୍ଚଳରେ କମ୍ ମୂଲ୍ୟର ସିନେମା ହଲ୍ଗୁଡ଼ିକର ପ୍ରୋତ୍ସାହନ ବିଷୟରେ ମଧ୍ୟ ଆଲୋଚନା କରାଯାଇଥିଲା। ବିଶ୍ୱସ୍ତରରେ ସର୍ବାଧିକ ଚଳଚ୍ଚିତ୍ର ନିର୍ମାତା ଥିବା ଦେଶମାନଙ୍କ ମଧ୍ୟରୁ ଭାରତ ଅନ୍ୟତମ ହୋଇଥିବା ସତ୍ତ୍ୱେ, ସିନେମା ଭିତ୍ତିଭୂମିର ଉପଲବ୍ଧତା ଅସମାନ ରହିଛି। ମନ୍ତ୍ରଣାଳୟ ସମ୍ମିଳନୀ ତୃତୀୟ ଏବଂ ଚତୁର୍ଥ ଶ୍ରେଣୀ ସହର, ଗ୍ରାମାଞ୍ଚଳ ଏବଂ ଆକାଂକ୍ଷୀ ଜିଲ୍ଲାଗୁଡ଼ିକୁ ସେବା ଯୋଗାଇବା ପାଇଁ ମଡ୍ୟୁଲାର୍ ଏବଂ ମୋବାଇଲ୍ ସିନେମା ମଡେଲ୍ଗୁଡ଼ିକର ବିକାଶ ପ୍ରସ୍ତାବ ଦେଇଥିଲା।
ସମ୍ମିଳନୀରେ ଜିଆଇଏସ ମ୍ୟାପିଂ ବ୍ୟବହାର କରି କମ୍ ସ୍କ୍ରିନ୍ ଘନତା କ୍ଷେତ୍ରଗୁଡ଼ିକୁ କିପରି ଚିହ୍ନଟ କରାଯିବ, ବର୍ତ୍ତମାନ ସାର୍ବଜନୀନ ଭିତ୍ତିଭୂମିକୁ ପୁନରୁଦ୍ଧାର କରିବା, ଏକକ-ୱିଣ୍ଡୋ ସିଷ୍ଟମ ମାଧ୍ୟମରେ ଲାଇସେନ୍ସ ପ୍ରଦାନ ପ୍ରକ୍ରିୟାକୁ ସୁଗମ କରିବା ଏବଂ ସୁଲଭ ସିନେମା ଭିତ୍ତିଭୂମିରେ ଘରୋଇ ନିବେଶକୁ ଆକର୍ଷିତ କରିବା ପାଇଁ ଟିକସ ଓ ଜମି ନୀତି ପ୍ରୋତ୍ସାହନ ପ୍ରଦାନ କରିବା ବିଷୟରେ ଆଲୋଚନା କରାଯାଇଥିଲା।
ଏହି ଆଲୋଚନାରେ ଭାରତୀୟ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ (ଆଇଏଫଏଫଆଇ) ଏବଂ ଓ୍ୱେଭ୍ସ ବଜାର ଭଳି ପ୍ରମୁଖ ଚଳଚ୍ଚିତ୍ର ଏବଂ କଣ୍ଟେଣ୍ଟ ପ୍ଲାଟଫର୍ମରେ ଅଂଶଗ୍ରହଣ ପ୍ରସଙ୍ଗ ମଧ୍ୟ ସ୍ଥାନ ପାଇଥିଲା। ରାଜ୍ୟ ଏବଂ କେନ୍ଦ୍ରଶାସିତ ପ୍ରଦେଶଗୁଡ଼ିକୁ ସେମାନଙ୍କର ଚଳଚ୍ଚିତ୍ର ସ୍ଥାନ ପ୍ରଦର୍ଶନ କରିବା, ଆଞ୍ଚଳିକ ସ୍ତରରେ ପ୍ରୋତ୍ସାହନ ଯୋଗାଇ ଦେବା ଏବଂ ସ୍ଥାନୀୟ ପ୍ରତିଭାକୁ ସମର୍ଥନ କରିବା ପାଇଁ ଏହି ପ୍ଲାଟଫର୍ମଗୁଡ଼ିକୁ ବ୍ୟବହାର କରିବାକୁ ଉତ୍ସାହିତ କରାଯାଇଥିଲା। ୫୫ତମ ଆଇଏଫଏଫଆଇରେ ୧୧୪ ଦେଶ ଅଂଶଗ୍ରହଣ କରିଥିଲେ। ଓ୍ୱେଭ୍ସ ବଜାରରେ ୩୦ଟି ଦେଶରୁ ୨ହଜାରରୁ ଅଧିକ ଶିଳ୍ପ ପ୍ରତିନିଧି ଅଂଶଗ୍ରହଣ କରିଥିଲେ। ରାଜ୍ୟଗୁଡ଼ିକର ସ୍ୱତନ୍ତ୍ର ମଣ୍ଡପ ସ୍ଥାପନ କରିବା ସହିତ ଭାରତୀୟ ପାନୋରାମାରେ ପ୍ରବେଶକୁ ସହଜ କରି ଏବଂ ବିଶ୍ୱସ୍ତରୀୟ ପ୍ରଦର୍ଶନ ପାଇଁ ସୃଜନଶୀଳ ପ୍ରତିଭାଙ୍କୁ ମନୋନୀତ କରି ଏହି ସୁଯୋଗଗୁଡ଼ିକୁ ଲାଭ ଉଠାଇପାରିବେ ବୋଲି ସମ୍ମିଳନୀରେ ସୂଚନା ଦିଆଯାଇଥିଲା।
ଆଲୋଚନାର ଅନ୍ୟ ଏକ ପ୍ରମୁଖ କ୍ଷେତ୍ର ଥିଲା ଭାରତର ଲାଇଭ୍ ମନୋରଞ୍ଜନ ଅର୍ଥବ୍ୟବସ୍ଥାର ବିକାଶ। ସମ୍ମିଳନୀରେ ରାଜ୍ୟଗୁଡ଼ିକ ସହିତ କାର୍ଯ୍ୟକ୍ରମ ପାଇଁ ବର୍ତ୍ତମାନର କ୍ରୀଡା ଏବଂ ସାଂସ୍କୃତିକ ଭିତ୍ତିଭୂମି ବ୍ୟବହାର କରିବା, ଇଣ୍ଡିଆ ସିନେ ହବ୍ରେ ଅନୁମତି କାର୍ଯ୍ୟପ୍ରବାହକୁ ସମନ୍ୱିତ କରିବା, ନୋଡାଲ୍ ଅଧିକାରୀ ନିଯୁକ୍ତି କରିବା ଏବଂ ଲାଇଭ୍ ମନୋରଞ୍ଜନ ଭିତ୍ତିଭୂମିରେ ନିବେଶ ପାଇଁ ନୀତି ଏବଂ ଆର୍ଥିକ ସହାୟତା ବ୍ୟବସ୍ଥା କରିବା ବିଷୟରେ ଆଲୋଚନା କରାଯାଇଥିଲା।