ନୂଆଦିଲ୍ଲୀ: କଂଗ୍ରେସ ନେତା ତଥା ସାଂସଦ ରାହୁଲ ଗାନ୍ଧୀ ପୁଣି ଥରେ ନିର୍ବାଚନ କମିଶନଙ୍କୁ ଟାର୍ଗେଟ କରିଛନ୍ତି। ଆଜି ବେଙ୍ଗାଲୁରୁର ଏକ ରାଲିକୁ ସମ୍ବୋଧିତ କରି ସେ କହିଥିଲେ ଯେ, ମହାରାଷ୍ଟ୍ରର ଲାକସଭା ନିର୍ବାଚନରେ ଆମ ମେଣ୍ଟ ଜିତୁଛି ଏବଂ ୪ ମାସ ପରେ ବିଜେପି ବିଧାନସଭା ନିର୍ବାଚନ ଜିତିଯାଉଛି। ଆମେ ଜାଣିବାକୁ ପାଇଛୁ ଯେ, ନିର୍ବାଚନରେ ବଡ ତ୍ରୁଟି ହୋଇଛି। ନିର୍ବାଚନ କମିଶନ ମଧ୍ୟ ରାହୁଲଙ୍କ ଅଭିଯୋଗର ମଧ୍ୟ ପ୍ରତିକ୍ରିୟା ପ୍ରକାଶ କରି ତାଙ୍କୁ ପ୍ରମାଣ ଉପସ୍ଥାପନ କରିବାକୁ କହିଥିଲେ।
ମହାରାଷ୍ଟ୍ର ଏବଂ କର୍ଣ୍ଣାଟକ ପ୍ରସଙ୍ଗ ଦର୍ଶାଇ ରାହୁଲ କହିଛନ୍ତି ଯେ, ଯେତେବେଳେ ଆମେ ଜାଣିବାକୁ ପାଇଲୁ ଯେ, ୧ କୋଟି ନୂଆ ଲୋକ ଭୋଟ ଦେବା ପାଇଁ ବାହାରିଥିଲେ, ଯେଉଁମାନେ ଲୋକସଭାରେ ଭୋଟ୍ କରିବାକୁ ଆସିନଥିଲେ, ସେମାନେ ୧ କୋଟି ଲୋକ ଯାଦୁରେ ଭୋଟ କରିବାକୁ ଆସିଥିଲେ। ସେମାନେ ଏହି ବର୍ଦ୍ଧିତ ଭୋଟ୍ ସାହାଯ୍ୟରେ ନିର୍ବାଚନ ଜିତିଥିଲେ। କର୍ଣ୍ଣାଟକରେ ମଧ୍ୟ ଆମେ ନିର୍ବାଚନରେ ୧୬ ଟି ସିଟ୍ ଜିତୁଥିଲୁ, କିନ୍ତୁ ଆମେ କେବଳ ୯ ଟି ଆସନ ଜିତିଲୁ। ଏହା ମଧ୍ୟ ଏକ ନକଲି ଉପାୟରେ ଘଟିଥିଲା। କିନ୍ତୁ ନିର୍ବାଚନ କମିଶନ କୌଣସି ଉତ୍ତର ଦେଉନାହାନ୍ତି।
ସେ କହିଛନ୍ତି ଯେ, “ନରେନ୍ଦ୍ର ମୋଦି କେବଳ ୨୫ ଟି ଆସନ ପାଇଁ ପ୍ରଧାନମନ୍ତ୍ରୀ ହୋଇଛନ୍ତି ଏବଂ ଯଦି ଆମେ ଇଲେକ୍ଟ୍ରୋନିକ୍ ତଥ୍ୟ ପାଇବୁ, ତେବେ ଆମେ ପ୍ରମାଣ କରିବୁ ଯେ ମୋଦି ଚୋରି କରି ପ୍ରଧାନମନ୍ତ୍ରୀ ହୋଇଛନ୍ତି। ୨୫ ଟି ଆସନ ଅଛି ଯେଉଁଠାରେ ବିଜେପି ମାତ୍ର ୩୫ ହଜାର ଭୋଟର ବ୍ୟବଧାନରେ ଜିତିଥିଲା। ମୁଁ ଏକା ନୁହେଁ, ଭାରତର ସମସ୍ତ ବିରୋଧୀ ଦଳ ସମାନ ପ୍ରଶ୍ନ ପଚାରୁଛନ୍ତି। ନିର୍ବାଚନ କମିଶନ ୱେବସାଇଟ୍ ବନ୍ଦ କରିଦେଇଛି। ରାଜସ୍ଥାନ ଏବଂ ବିହାରର ୱେବସାଇଟ୍ ବନ୍ଦ କରିଦିଆଯାଇଛି।”