ନୂଆଦିଲ୍ଲୀ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ଉପରେ ୫୦ ପ୍ରତିଶତ ଶୁଳ୍କ ଲାଗୁ କରିଛନ୍ତି, ଯାହା ଆଜିଠାରୁ କାର୍ଯ୍ୟକାରୀ ହୋଇଛି। ଭାରତ ଏବଂ ଆମେରିକା ମଧ୍ୟରେ ଏକ ମୁକ୍ତ ବାଣିଜ୍ୟ ଚୁକ୍ତିନାମାର ସମ୍ଭାବନା ପ୍ରାୟ ନଗଣ୍ୟ ମନେହୁଏ, କିନ୍ତୁ ଏହି ସମୟରେ ପୂର୍ବତନ ବୈଦେଶିକ ସଚିବ ଏବଂ ରାଜ୍ୟସଭା ସାଂସଦ ହର୍ଷ ବର୍ଦ୍ଧନ ଶ୍ରୀଙ୍ଗଲା ଏକ ଆଶ୍ଚର୍ଯ୍ୟଜନକ ବୟାନ ଦେଇଛନ୍ତି। ସେ ଆଶା ପ୍ରକାଶ କରିଛନ୍ତି ଯେ, ଭାରତ ଏବଂ ଆମେରିକା ଖୁବ୍ଶୀଘ୍ର ମୁକ୍ତ ବାଣିଜ୍ୟ ଚୁକ୍ତିନାମା ସମ୍ପର୍କରେ ଏକ ରାସ୍ତା ଖୋଜିବେ।
ହର୍ଷ ବର୍ଦ୍ଧନ ଶ୍ରୀଙ୍ଗଲା କହିଛନ୍ତି ଯେ, “ଭାରତରୁ ଆମେରିକାକୁ ରପ୍ତାନି ହେଉଥିବା ସାମଗ୍ରୀ ଉପରେ ୫୦ ପ୍ରତିଶତ ଶୁଳ୍କ ଦେବାକୁ ପଡିବ। ଆମେ ଏହାର ପ୍ରଭାବ ହ୍ରାସ କରିବା ପାଇଁ କାମ କରୁଛୁ। ଏବେ ବିକଳ୍ପ ବଜାର ମଧ୍ୟ ଅନୁସନ୍ଧାନ କରାଯିବ। ଆମର ଅଷ୍ଟ୍ରେଲିଆ, ସଂଯୁକ୍ତ ଆରବ ଏମିରେଟ୍ସ ଏବଂ ଯୁକ୍ତରାଜ୍ୟ ସହିତ ଏକ ମୁକ୍ତ ବାଣିଜ୍ୟ ଚୁକ୍ତି ହୋଇଛି। ଆମେ ୟୁରୋପୀୟ ସଂଘ ସହିତ ଏକ ମୁକ୍ତ ବାଣିଜ୍ୟ ଚୁକ୍ତିର ନିକଟତର। ଏହାର ଅର୍ଥ ହେଉଛି ଆମେ ଅନେକ ବଜାରରେ ପହଞ୍ଚିପାରିବୁ।”
ଆମେରିକା ସହିତ ମୁକ୍ତ ବାଣିଜ୍ୟ ଚୁକ୍ତି ବିଷୟରେ ହର୍ଷ ବର୍ଦ୍ଧନ ଶ୍ରୀଙ୍ଗଲା କ’ଣ କହିଥିଲେ?
ଆମେରିକା ସମ୍ପର୍କରେ ସେ କହିଛନ୍ତି ଯେ, ଆମର ଆମେରିକା ସହିତ ସବୁଠାରୁ ବ୍ୟାପକ ଏବଂ ବହୁମୁଖୀ ସମ୍ପର୍କ ଅଛି, ଯାହା ଅନ୍ୟ ଯେକୌଣସି ଦେଶ ଅପେକ୍ଷା ଅଧିକ ଗୁରୁତ୍ୱପୂର୍ଣ୍ଣ। ଆଶା କରୁଛି ଆମେ ଖୁବ୍ ଶୀଘ୍ର ଆମେରିକା ସହିତ ଏକ ସନ୍ତୋଷଜନକ ମୁକ୍ତ ବାଣିଜ୍ୟ ଚୁକ୍ତିର ରାସ୍ତା ପାଇବୁ ଏବଂ ଏହା ନିଶ୍ଚିତ ଭାବରେ ରାଷ୍ଟ୍ରପତି ଟ୍ରମ୍ପଙ୍କ ଭାରତ ଗସ୍ତର ପରବର୍ତ୍ତୀ ପର୍ଯ୍ୟାୟକୁ ନେଇଯିବ।
ଶୁଳ୍କ ଦ୍ୱାରା ଭାରତର କିଛି କ୍ଷେତ୍ର କ୍ଷତିଗ୍ରସ୍ତ ହୋଇପାରେ
ଟ୍ରମ୍ଫଙ୍କ ନୂତନ ଶୁଳ୍କ ବ୍ୟବସ୍ଥା ଦ୍ୱାରା ଭାରତର କିଛି କ୍ଷେତ୍ର ପ୍ରଭାବିତ ହୋଇପାରେ। ଗ୍ଲୋବାଲ୍ ଟ୍ରେଡ୍ ରିସର୍ଚ୍ଚ ଇନିସିଏଟିଭ୍ (GTRI) ର ଏକ ରିପୋର୍ଟ ଅନୁଯାୟୀ, ଶୁଳ୍କ ଲାଗୁ ହେବା ପରେ ଭାରତର ଶ୍ରମ-ପ୍ରଧାନ କ୍ଷେତ୍ରର ରପ୍ତାନି ମଧ୍ୟ ୭୦ ପ୍ରତିଶତ ପର୍ଯ୍ୟନ୍ତ ହ୍ରାସ ପାଇପାରେ।