ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଛତିଶଗଡ଼ର ନୟା ରାୟପୁରରେ ରାଜ୍ୟ ବିଧାନସଭାର ନୂତନ କୋଠା ଉଦଘାଟନ କରିଛନ୍ତି। ଏହି ଅବସରରେ ଉପସ୍ଥିତ ଜନସାଧାରଣଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ, ଆଜି ଛତିଶଗଡ଼ର ବିକାଶ ଯାତ୍ରା ପାଇଁ ଏକ ସୁବର୍ଣ୍ଣ ଆରମ୍ଭ। ସେ ଏହା ମଧ୍ୟ ଉଲ୍ଲେଖ କରିଥିଲେ, ବ୍ୟକ୍ତିଗତ ଭାବର ଏହା ତାଙ୍କ ପାଇଁ ଏକ ଅତ୍ୟନ୍ତ ଆନନ୍ଦଦାୟକ ଏବଂ ଗୁରୁତ୍ୱପୂର୍ଣ୍ଣ ଦିନ। ଏହି ଭୂମି ସହିତ ତାଙ୍କର ଗଭୀର ଭାବପ୍ରବଣ ସମ୍ପର୍କ ଉପରେ ମତ ଦେଇଥିଲେ, ଯାହା ଦଶନ୍ଧି ଧରି ପାଳିତ ହୋଇଥିଲା। ଜଣେ ଦଳୀୟ କର୍ମୀ ଭାବରେ ତାଙ୍କ ସମୟକୁ ମନେ ପକାଇ ଶ୍ରୀ ମୋଦୀ କହିଥିଲେ ଯେ, ସେ ଛତିଶଗଡ଼ରେ ବହୁତ ସମୟ ବିତାଇଥିଲେ ଏବଂ ବହୁତ କିଛି ଶିଖିଥିଲେ। ସେ ଛତିଶଗଡ଼ର ଦୃଷ୍ଟିକୋଣ, ଏହାର ସୃଷ୍ଟି ପାଇଁ ସଂକଳ୍ପ ଏବଂ ସେହି ସଂକଳ୍ପର ପୂରଣକୁ ଆହୁରି ମନେ ପକାଇ କହିଥିଲେ ଛତିଶଗଡ଼, ପରିବର୍ତ୍ତନର ପ୍ରତ୍ୟେକ ମୁହୂର୍ତ୍ତର ସେ ସାକ୍ଷୀ ଅଛନ୍ତି। ରାଜ୍ୟ ଏହାର ୨୫ ବର୍ଷର ଯାତ୍ରାରେ ଏକ ପ୍ରମୁଖ ମାଇଲଖୁଣ୍ଟରେ ପହଞ୍ଚିବା ସହିତ, ଏହି ମୁହୂର୍ତ୍ତର ଅଂଶ ହେବାର ସୁଯୋଗ ପାଇଁ ସେ କୃତଜ୍ଞତା ପ୍ରକାଶ କରିଥିଲେ। ରୌପ୍ୟ ଜୟନ୍ତୀ ପାଳନ ଅବସରରେ, ପ୍ରଧାନମନ୍ତ୍ରୀ କହିଛନ୍ତି ଯେ, ରାଜ୍ୟବାସୀଙ୍କ ପାଇଁ ନୂତନ ବିଧାନସଭା କୋଠା ଉଦଘାଟନ କରିବାର ସୁଯୋଗ ତାଙ୍କୁ ମିଳିଛି। ଏହି ଅବସରରେ ସେ ଛତିଶଗଡ଼ର ଜନସାଧାରଣ ଏବଂ ରାଜ୍ୟ ସରକାରଙ୍କୁ ତାଙ୍କର ଶୁଭେଚ୍ଛା ଏବଂ ଅଭିନନ୍ଦନ ଜଣାଇଥିଲେ।
“୨୦୨୫ ହେଉଛି ଭାରତୀୟ ଗଣତନ୍ତ୍ରର ଅମୃତ ବର୍ଷ, ଭାରତ ଏହାର ନାଗରିକଙ୍କ ପାଇଁ ସମ୍ବିଧାନ ଉତ୍ସର୍ଗ କରିବାର ୭୫ ବର୍ଷକୁ ମନେ ପକାଇଥାଏ” ବୋଲି ଶ୍ରୀ ମୋଦୀ କହିଛନ୍ତି। ଏହି ଐତିହାସିକ ଅବସରରେ, ସେ ଏହି ଅଞ୍ଚଳର ସମ୍ବିଧାନ ସଭାର ବିଶିଷ୍ଟ ସଦସ୍ୟ – ରବିଶଙ୍କର ଶୁକ୍ଳା, ବାରିଷ୍ଟର ଠାକୁର ଛେଦିଲାଲ, ଘନଶ୍ୟାମ ସିଂହ ଗୁପ୍ତା, କିଶୋରୀ ମୋହନ ତ୍ରିପାଠୀ, ରାମପ୍ରସାଦ ପୋଟାଇ ଏବଂ ରଘୁରାଜ ସିଂହଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ – ଯେଉଁମାନେ ସେହି ସମୟରେ ପଛୁଆ ଅଞ୍ଚଳର ହେବା ସତ୍ତ୍ୱେ ଦିଲ୍ଲୀ ପହଞ୍ଚି ବାବାସାହେବ ଆମ୍ବେଦକରଙ୍କ ନେତୃତ୍ୱରେ ସମ୍ବିଧାନ ପ୍ରଣୟନରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।
ପ୍ରଧାନମନ୍ତ୍ରୀ କହିଛନ୍ତି ଯେ, ଆଜି ଛତିଶଗଡ଼ର ଇତିହାସରେ ଏକ ସୁବର୍ଣ୍ଣ ଅଧ୍ୟାୟ। ଏହି ଭବ୍ୟ ଏବଂ ଆଧୁନିକ ବିଧାନସଭା ଭବନର ଉଦଘାଟନ ହେଉଥିବାରୁ, ସେ କହିଛନ୍ତି ଯେ, ଏହା କେବଳ ଏକ କୋଠା ପାଇଁ ଏକ ଉତ୍ସବ ନୁହେଁ, ବରଂ ୨୫ ବର୍ଷର ଜନସାଧାରଣଙ୍କ ଆକାଂକ୍ଷା, ସଂଘର୍ଷ ଏବଂ ଗର୍ବର ଉତ୍ସବ। “ଆଜି, ଛତିଶଗଡ଼ ଏହାର ଆକାଂକ୍ଷାର ଏକ ନୂତନ ଶୀର୍ଷରେ ଠିଆ ହୋଇଛି; ଏହି ଗର୍ବର ଅବସରରେ, ମୁଁ ସେହି ଦୂରଦୃଷ୍ଟିସମ୍ପନ୍ନ ଏବଂ କରୁଣାମୟ ନେତା, ଭାରତ ରତ୍ନ, ପୂଜ୍ୟ ଶ୍ରୀ ଅଟଳ ବିହାରୀ ବାଜପେୟୀ ଜୀ’ଙ୍କୁ ଶ୍ରଦ୍ଧାଞ୍ଜଳି ଜଣାଉଛି , ଯାହାଙ୍କ ଦୂରଦୃଷ୍ଟି ଏହି ରାଜ୍ୟ ସୃଷ୍ଟି କରିଥିଲା ” ବୋଲି ଶ୍ରୀ ମୋଦୀ କହିଛନ୍ତି। ସେ ମନେ ପକାଇଥିଲେ ଯେ, ଯେତେବେଳେ ଅଟଳ ଜୀ ୨୦୦୦ ମସିହାରେ ଛତିଶଗଡ଼ ରାଜ୍ୟ ଗଠନ କରିଥିଲେ, ଏହା କେବଳ ଏକ ପ୍ରଶାସନିକ ନିଷ୍ପତ୍ତି ନଥିଲା, ବରଂ ବିକାଶର ନୂତନ ପଥ ଖୋଲିବା ଏବଂ ଛତିଶଗଡ଼ର ଭାବନାକୁ ଜାଣିବା ଦିଗରେ ଏକ ପଦକ୍ଷେପ ଥିଲା। ପ୍ରଧାନମନ୍ତ୍ରୀ ଉଲ୍ଲେଖ କରିଛନ୍ତି ଯେ ଆଜି ବିଧାନସଭା କୋଠାର ଉଦଘାଟନ ସହିତ, ଅଟଳ ଜୀଙ୍କ ପ୍ରତିମୂର୍ତ୍ତିର ଉନ୍ମୋଚନ ମଧ୍ୟ ହୋଇଛି, ଏବଂ ହୃଦୟ ସ୍ୱାଭାବିକ ଭାବରେ କହୁଛି – ‘ ଅଟଳ ଜୀ ଏହା ଦେଖନ୍ତୁ, କିପରି ତାଙ୍କ ସ୍ୱପ୍ନ ସତ ହେଉଛି, ସେ ଯେଉଁ ଛତିଶଗଡ଼ ରାଜ୍ୟର କଳ୍ପନା କରିଥିଲେ, ତାହା ଏବେ ଆତ୍ମବିଶ୍ୱାସରେ ପରିପୂର୍ଣ୍ଣ ଏବଂ ବିକାଶର ନୂତନ ଶିଖରରେ ପହଞ୍ଚିଛି’।
ଛତିଶଗଡ଼ ବିଧାନସଭାର ଇତିହାସ ନିଜେ ଏକ ପ୍ରେରଣାର ଉତ୍ସ ବୋଲି କହି ଶ୍ରୀ ମୋଦୀ ସ୍ମରଣ କରିଥିଲେ ଯେ, ଯେତେବେଳେ ଏହି ସୁନ୍ଦର ରାଜ୍ୟ ୨୦୦୦ ମସିହାରେ ପ୍ରତିଷ୍ଠିତ ହୋଇଥିଲା, ସେତେବେଳେ ପ୍ରଥମ ବିଧାନସଭା ଅଧିବେଶନ ରାୟପୁରର ରାଜକୁମାର କଲେଜର ଜଶପୁର ହଲରେ ଅନୁଷ୍ଠିତ ହୋଇଥିଲା। ସେହି ସମୟରେ ସୀମିତ ସମ୍ବଳ ଥିଲା, କିନ୍ତୁ ଅସୀମ ସ୍ୱପ୍ନ ଥିଲା। ସେତେବେଳେ କେବଳ ଗୋଟିଏ ଭାବନା ଥିଲା: “ଆମେ ଅଧିକ ଗତିରେ ଆମର ଭାଗ୍ୟକୁ ଉଜ୍ଜ୍ୱଳ କରିବୁ ବୋଲି ସେ ଉଲ୍ଲେଖ କରିଥିଲେ।” ପ୍ରଧାନମନ୍ତ୍ରୀ କହିଥିଲେ ଯେ, ପରେ ନିର୍ମିତ ବିଧାନସଭା ଭବନ ମୂଳତଃ ଅନ୍ୟ ଏକ ବିଭାଗର ପରିସର ଥିଲା। ସେଠାରୁ, ଛତିଶଗଡ଼ରେ ଗଣତନ୍ତ୍ରର ଯାତ୍ରା ନବୀକରଣ ଶକ୍ତି ସହିତ ଆରମ୍ଭ ହୋଇଥିଲା। ସେ ଆଲୋକପାତ କରିଥିଲେ ଯେ ଆଜି, ୨୫ ବର୍ଷ ପରେ, ସେହି ଗଣତନ୍ତ୍ର ଏବଂ ସେହି ଲୋକମାନେ ଏକ ଆଧୁନିକ, ଡିଜିଟାଲ୍ ଏବଂ ଆତ୍ମନିର୍ଭରଶୀଳ ବିଧାନସଭା ଭବନ ଉଦଘାଟନ କରୁଛନ୍ତି।
ବିଧାନସଭା ଭବନକୁ ଗଣତନ୍ତ୍ରର ଏକ ତୀର୍ଥସ୍ଥଳ ଭାବରେ ଉଲ୍ଲେଖ କରି ପ୍ରଧାନମନ୍ତ୍ରୀ ମନ୍ତବ୍ୟ ଦେଇଥିଲେ ଯେ, ବିଧାନସଭାର ପ୍ରତ୍ୟେକ ସ୍ତମ୍ଭ ସ୍ୱଚ୍ଛତାର ପ୍ରତୀକ, ପ୍ରତ୍ୟେକ କରିଡର ଆମକୁ ଉତ୍ତରଦାୟିତ୍ୱର ସ୍ମରଣ କରାଏ ଏବଂ ପ୍ରତ୍ୟେକ କକ୍ଷ ଲୋକଙ୍କ ସ୍ୱରକୁ ପ୍ରତିଫଳିତ କରେ। ଏଠାରେ ନିଆଯାଇଥିବା ନିଷ୍ପତ୍ତି ଆଗାମୀ ଦଶନ୍ଧି ପାଇଁ ଛତିଶଗଡ଼ର ଭାଗ୍ୟ ଗଠନ କରିବ ଏବଂ ଏହି କାନ୍ଥ ମଧ୍ୟରେ କୁହାଯାଇଥିବା ପ୍ରତ୍ୟେକ ଶବ୍ଦ ରାଜ୍ୟର ଅତୀତ, ବର୍ତ୍ତମାନ ଏବଂ ଭବିଷ୍ୟତର ଏକ ଅବିଚ୍ଛେଦ୍ୟ ଅଂଶ ହୋଇଯିବ ବୋଲି ସେ ଗୁରୁତ୍ୱାରୋପ କରିଥିଲେ । ଶ୍ରୀ ମୋଦୀ ବିଶ୍ୱାସ ପ୍ରକାଶ କରିଥିଲେ ଯେ, ଏହି ଭବନ ଆଗାମୀ ଦଶନ୍ଧି ପାଇଁ ଛତିଶଗଡ଼ର ନୀତି, ଭାଗ୍ୟ ଏବଂ ନୀତି ନିର୍ଦ୍ଧାରକଙ୍କ କେନ୍ଦ୍ର ଭାବରେ କାର୍ଯ୍ୟ କରିବ।
“ଆଜି, ସମଗ୍ର ଦେଶ ଐତିହ୍ୟ ଏବଂ ବିକାଶ ଉଭୟକୁ ଏକତ୍ର ଗ୍ରହଣ କରି ଆଗକୁ ବଢ଼ୁଛି” ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିଥିଲେ, ସରକାରଙ୍କ ପ୍ରତ୍ୟେକ ନୀତି ଏବଂ ନିଷ୍ପତ୍ତିରେ ଏହି ଭାବନା ପ୍ରତିଫଳିତ ହୁଏ। ସେ ମନ୍ତବ୍ୟ ଦେଇଥିଲେ ଯେ ,ପବିତ୍ର ସେଙ୍ଗୋଲ ଏବେ ଭାରତୀୟ ସଂସଦକୁ ପ୍ରେରଣା ଦିଏ, ଏବଂ ସଂସଦର ନୂତନ ଗ୍ୟାଲେରୀଗୁଡ଼ିକ ବିଶ୍ୱକୁ ଭାରତର ଗଣତନ୍ତ୍ରର ପ୍ରାଚୀନ ମୂଳ ସହିତ ସଂଯୋଗ କରନ୍ତି। ସଂସଦ ପରିସରରେ ସ୍ଥାପିତ ପ୍ରତିମୂର୍ତ୍ତିଗୁଡ଼ିକ ବିଶ୍ୱକୁ ଭାରତରେ ଗଣତାନ୍ତ୍ରିକ ପରମ୍ପରାର ଗଭୀରତା ସମ୍ପର୍କରେ ଜାଣିବାର ସୁଯୋଗ ଦିଏ। ଶ୍ରୀ ମୋଦୀ ଖୁସି ପ୍ରକାଶ କରିଥିଲେ ଯେ, ଏହି ନୀତି ଏବଂ ଭାବନା ଛତିଶଗଡ଼ର ନୂତନ ବିଧାନସଭାରେ ମଧ୍ୟ ପ୍ରତିଫଳିତ ହୋଇଛି। ସେ କହିଥିଲେ ଯେ ନୂତନ ବିଧାନସଭା ପରିସର ରାଜ୍ୟର ସମୃଦ୍ଧ ସାଂସ୍କୃତିକ ଐତିହ୍ୟର ପ୍ରତିଫଳନ। ଏହି ବିଧାନସଭାର ପ୍ରତ୍ୟେକ ଉପାଦାନ ଛତିଶଗଡ଼ ଭୂମିରେ ଜନ୍ମଗ୍ରହଣ କରିଥିବା ମହାନ ବ୍ୟକ୍ତିତ୍ୱଙ୍କ ପ୍ରେରଣା ବହନ କରେ। ସେ ଦୃଢ଼ୋକ୍ତି ପ୍ରକାଶ କରିଥିଲେ ଯେ , ବଞ୍ଚିତ ଲୋକଙ୍କୁ ପ୍ରାଥମିକତା ଦେବା ଏବଂ ‘ସବକା ସାଥ, ସବକା ବିକାଶ’ ନୀତି ସେମାନଙ୍କ ସରକାରଙ୍କ ସୁଶାସନର ପ୍ରମୁଖ ଲକ୍ଷଣ। ସେ କହିଥିଲେ ଯେ, ଏହା ହେଉଛି ଭାରତର ସମ୍ବିଧାନର ଭାବନା ଏବଂ ଆମର ମହାନ ନେତା, ଋଷି ଏବଂ ଚିନ୍ତାନାୟକମାନଙ୍କ ଦ୍ୱାରା ପ୍ରଦତ୍ତ ମୂଲ୍ୟବୋଧ।
ପ୍ରଧାନମନ୍ତ୍ରୀ ଶ୍ରୀ ମୋଦୀ ନୂତନ ବିଧାନସଭା କୋଠାକୁ ପର୍ଯ୍ୟବେକ୍ଷଣ କରିବା ସମୟରେ ବସ୍ତର କଳାର ଏକ ସୁନ୍ଦର ଝଲକ ଦେଖିଥିଲେ ବୋଲି ସେ କହିଥିଲେ। କିଛି ମାସ ପୂର୍ବେ ଥାଇଲ୍ୟାଣ୍ଡର ପ୍ରଧାନମନ୍ତ୍ରୀଙ୍କୁ ସମାନ ବସ୍ତର କଳାକୃତି ପ୍ରଦାନ କରିଥିବା କଥା ମନେ ପକାଇ ସେ ଏହାକୁ ଭାରତର ସୃଜନଶୀଳତା ଏବଂ ସାଂସ୍କୃତିକ ଶକ୍ତିର ପ୍ରତୀକ ଭାବରେ ବର୍ଣ୍ଣନା କରିଥିଲେ।
ଶ୍ରୀ ମୋଦୀ ଆହୁରି କହିଛନ୍ତି ଯେ, ଏହି କୋଠାର କାନ୍ଥ ବାବା ଗୁରୁ ଘାସିଦାସ ଜୀ’ଙ୍କ ବାର୍ତ୍ତା ବହନ କରେ, ଯାହା ଅନ୍ତର୍ଭୁକ୍ତି, ସମସ୍ତଙ୍କ ପାଇଁ ବିକାଶ ଏବଂ ସମସ୍ତଙ୍କ ପାଇଁ ସମ୍ମାନର ମୂଲ୍ୟ ଶିକ୍ଷା ଦିଏ। ସେ ଉଲ୍ଲେଖ କରିଛନ୍ତି ଯେ ପ୍ରତ୍ୟେକ ଦ୍ୱାର ମାତା ଶବରୀଙ୍କ ଦ୍ୱାରା ଶିକ୍ଷା ଦିଆଯାଇଥିବା ଉଷ୍ମତାକୁ ପ୍ରତିଫଳିତ କରେ, ଯାହା ପ୍ରତ୍ୟେକ ଅତିଥି ଏବଂ ନାଗରିକଙ୍କୁ ସ୍ନେହ ସହିତ ସ୍ୱାଗତ କରିବାକୁ ଆମକୁ ମନେ ପକାଇଥାଏ। ବିଧାନସଭାର ପ୍ରତ୍ୟେକ ଚୌକି ସନ୍ଥ କବୀରଙ୍କ ଦ୍ୱାରା ଶିକ୍ଷା ଦିଆଯାଇଥିବା ସତ୍ୟ ଏବଂ ନିର୍ଭୀରତାର ଭାବନାକୁ ପ୍ରତିଫଳିତ କରେ ବୋଲି ପ୍ରଧାନମନ୍ତ୍ରୀ କହିଥିଲେ। ସେ ଆହୁରି ମଧ୍ୟ କହିଛନ୍ତି ଯେ, ଏହି କୋଠାର ମୂଳଦୁଆ ମହାପ୍ରଭୂ ବଲ୍ଲଭାଚାର୍ଯ୍ୟଙ୍କ ସଂକଳ୍ପ ବହନ କରେ, ଯାହାର ନୀତି – “ନର ସେବା, ନାରାୟଣ ସେବା”।
“ଭାରତ ହେଉଛି ଗଣତନ୍ତ୍ରର ଜନନୀ” ବୋଲି ଉଲ୍ଲେଖ କରି ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ ଯେ , ଭାରତର ଆଦିବାସୀ ସମ୍ପ୍ରଦାୟ ପିଢ଼ି ପରେ ପିଢ଼ି ଧରି ଗଣତାନ୍ତ୍ରିକ ପରମ୍ପରା ପାଳନ କରିଆସୁଛନ୍ତି। ସେ ବସ୍ତରର ମୁରିଆ ଦରବାର – ଏକ ‘ପ୍ରାଚୀନ ସଂସଦ’ ଯାହା ତୃଣମୂଳ ସ୍ତରର ଗଣତାନ୍ତ୍ରିକ ପ୍ରଥାକୁ ପ୍ରତିଫଳିତ କରେ ତାହାକୁ ଏକ ଜୀବନ୍ତ ଉଦାହରଣ ଭାବରେ ଉଲ୍ଲେଖ କରିଥିଲେ । ସେ ମନ୍ତବ୍ୟ ଦେଇଥିଲେ ଯେ, ବର୍ଷ ବର୍ଷ ଧରି ଭାରତରେ ସମାଜ ଏବଂ ପ୍ରଶାସନ ଉଭୟ ଆହ୍ୱାନ ଗୁଡ଼ିକର ସମାଧାନ ପାଇଁ ଏକାଠି କାମ କରିଆସିଛନ୍ତି। ପ୍ରଧାନମନ୍ତ୍ରୀ ଖୁସି ପ୍ରକାଶ କରିଥିଲେ ଯେ ନୂତନ ବିଧାନସଭା କୋଠାରେ ମୁରିଆ ଦରବାର ପରମ୍ପରାକୁ ମଧ୍ୟ ସ୍ଥାନ ଦିଆଯାଇଛି।
ଶ୍ରୀ ମୋଦୀ କହିଥିଲେ ଯେ, ବିଧାନସଭାର ପ୍ରତ୍ୟେକ କୋଣ ଆମର ମହାନ ନେତାମାନଙ୍କ ଆଦର୍ଶକୁ ପ୍ରତିଫଳିତ କରୁଥିବା ବେଳେ, ଏହାର ବାଚସ୍ପତିଙ୍କ ଆସନ ଡକ୍ଟର ରମଣ ସିଂହଙ୍କ ଅଭିଜ୍ଞ ନେତୃତ୍ୱ ଦ୍ୱାରା ବିଭୂଷିତ। ଡକ୍ଟର ରମଣ ସିଂହ ହେଉଛନ୍ତି ଏମିତି ଜଣେ ଉତ୍ସର୍ଗୀକୃତ ଦଳୀୟ କର୍ମୀ, ଯିଏ କଠିନ ପରିଶ୍ରମ ଏବଂ ପ୍ରତିବଦ୍ଧତା ମାଧ୍ୟମରେ ଗଣତାନ୍ତ୍ରିକ ଅନୁଷ୍ଠାନଗୁଡ଼ିକୁ ମଜବୁତ କରିପାରିବେ ତାହାର ଏକ ଶକ୍ତିଶାଳୀ ଉଦାହରଣ ବୋଲି ସେ କହିଥିଲେ।
ପ୍ରଧାନମନ୍ତ୍ରୀ ରାଷ୍ଟ୍ରକବି ନିରାଲାଙ୍କର ମା ସରସ୍ୱତୀଙ୍କ ନିକଟରେ ପ୍ରାର୍ଥନାକୁ ଉଦ୍ଧୃତ କରି ଉଲ୍ଲେଖ କରିଥିଲେ ଯେ, ଏହା କେବଳ କବିତା ନୁହେଁ, ବରଂ ସ୍ୱାଧୀନ ଭାରତର ପୁନର୍ଜନ୍ମ ପାଇଁ ଏକ ମନ୍ତ୍ର ଥିଲା। ସେ ନିରାଲାଙ୍କ “ନବ ଗତି, ନବ ଲୟ, ନବ ସ୍ୱର” ଆହ୍ୱାନ ଉପରେ ଆଲୋକପାତ କରିଥିଲେ, ଯାହା ପରମ୍ପରାକୁ ଆଧାର କରିଥିବା ଭାରତକୁ ପ୍ରତୀକ କରେ, ତଥାପି ଭବିଷ୍ୟତ ଆଡ଼କୁ ଆତ୍ମବିଶ୍ୱାସର ସହିତ ଆଗକୁ ବଢ଼ୁଛି। ଛତିଶଗଡ଼ର ନୂତନ ବିଧାନସଭାରେ ଠିଆ ହୋଇ ଶ୍ରୀ ମୋଦୀ ଦୃଢ଼ୋକ୍ତି ପ୍ରକାଶ କରିଥିଲେ ଯେ ଏହି ଭାବନା ଏଠାରେ ସମାନ ଭାବରେ ପ୍ରାସଙ୍ଗିକ। ସେ ଏହି କୋଠାକୁ ‘ନବ ସ୍ୱର’ର ପ୍ରତୀକ ଭାବରେ ବର୍ଣ୍ଣନା କରିଥିଲେ – ଯେଉଁଠାରେ ଅତୀତର ଅଭିଜ୍ଞତାର ପ୍ରତିଫଳନ ନୂତନ ସ୍ୱପ୍ନର ଶକ୍ତି ସହିତ ମିଶିଥାଏ। ସେ କହିଥିଲେ, ଏହି ଶକ୍ତି ସହିତ ଆମକୁ ଏକ ଭାରତ ନିର୍ମାଣ କରିବାକୁ ପଡିବ ଏବଂ ଏକ ଛତିଶଗଡ଼ର ମୂଳଦୁଆ ସ୍ଥାପନ କରିବାକୁ ପଡିବ, ଯାହା ବିକାଶ ପଥରେ ଅଗ୍ରସର ହେବା ସହିତ ଏହାର ଐତିହ୍ୟ ସହିତ ଜଡିତ ରହିବ।
“ନାଗରିକ ଦେବୋ ଭବ” ହେଉଛି ସୁଶାସନର ମାର୍ଗଦର୍ଶୀ ମନ୍ତ୍ର ବୋଲି ବୁଝାଇବା ସହିତ ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ ଯେ, ବିଧାନସଭାରେ ନିଆଯାଇଥିବା ପ୍ରତ୍ୟେକ ନିଷ୍ପତ୍ତି ଲୋକଙ୍କ କଲ୍ୟାଣକୁ ପ୍ରାଥମିକତା ଦେବା ଉଚିତ। ଏଠାରେ ପ୍ରଣୀତ ଆଇନଗୁଡ଼ିକ ସଂସ୍କାରକୁ ତ୍ୱରାନ୍ୱିତ କରିବା, ନାଗରିକଙ୍କ ଜୀବନକୁ ସରଳ କରିବା ଏବଂ ଅନାବଶ୍ୟକ ସରକାରୀ ହସ୍ତକ୍ଷେପକୁ ହ୍ରାସ କରିବା ଉଚିତ। ସେ କହିଥିଲେ ଯେ ଶାସନ ଅନୁପସ୍ଥିତ କିମ୍ବା ଅତ୍ୟଧିକ ହେବା ଉଚିତ୍ ନୁହେଁ – ଏହି ସନ୍ତୁଳନ ହେଉଛି ଦ୍ରୁତ ପ୍ରଗତି ପାଇଁ ଏକମାତ୍ର ପ୍ରକୃତ ସୂତ୍ର।
ପ୍ରଧାନମନ୍ତ୍ରୀ ଛତିଶଗଡ଼କୁ ପ୍ରଭୁ ଶ୍ରୀରାମଙ୍କ ମାମୁଁ ଘର ବୋଲି ଆଲୋକପାତ କରିଥିଲେ ଏବଂ ତାଙ୍କୁ ଏହି ଭୂମିର ଭଣଜା ଭାବରେ ସମ୍ବୋଧିତ କରିଥିଲେ। ସେ କହିଥିଲେ ଯେ ଏହି ନୂତନ ବିଧାନସଭା ପରିସରରେ ଶ୍ରୀରାମଙ୍କ ଆଦର୍ଶକୁ ମନେ ପକାଇବା ପାଇଁ ଆଜିର ଦିବସ ଠାରୁ ଭଲ ଅବସର ଆଉ କିଛି ହୋଇପାରେ ନାହିଁ। ସେ ଦୃଢ଼ୋକ୍ତି ପ୍ରକାଶ କରିଥିଲେ ଯେ, ପ୍ରଭୁ ରାମଙ୍କ ମୂଲ୍ୟବୋଧ ସୁଶାସନରେ କାଳଜୟୀ ଶିକ୍ଷା ପ୍ରଦାନ କରେ।
ଅଯୋଧ୍ୟାରେ ରାମ ମନ୍ଦିର ପ୍ରତିଷ୍ଠା ସମୟର କଥା ମନେ ପକାଇ ଶ୍ରୀ ମୋଦୀ କହିଥିଲେ ଯେ, ଦେଶ ସମନ୍ୱିତ ଭାବରେ ଭକ୍ତିରୁ ଦେଶ ନିର୍ମାଣ ପାଇଁ ସଂକଳ୍ପ ନେଇଛି – “ଦେବରୁ ଦେଶ” ଏବଂ “ରାମରୁ ରାଷ୍ଟ୍ର”। ସେ ଗୁରୁତ୍ୱାରୋପ କରିଥିଲେ ଯେ “ରାମରୁ ରାଷ୍ଟ୍ର” ର ସାର ହେଉଛି ଉତ୍ତମ ପ୍ରଶାସନ ଏବଂ ଜନକଲ୍ୟାଣରେ ମୂଳ ଶାସନର ପ୍ରତୀକ, ଯାହା ସମାବେଶୀ ବିକାଶର ଭାବନା ” ସବକା ସାଥ, ସବକା ବିକାଶ”କୁ ପ୍ରତିଫଳିତ କରେ। ପ୍ରଧାନମନ୍ତ୍ରୀ ବିସ୍ତାରିତ ଭାବରେ କହିଥିଲେ ଯେ “ରାମରୁ ରାଷ୍ଟ୍ର” ଏକ ରାଷ୍ଟ୍ରର କଳ୍ପନା କରେ ଯେଉଁଠାରେ ସମାଜ ଦାରିଦ୍ର୍ୟ ଏବଂ ଦୁଃଖରୁ ମୁକ୍ତ, ଯେଉଁଠାରେ ଭାରତ ଅଭାବ ଦୂର କରି ଆଗକୁ ବଢ଼ିବ । ସେ ଆହୁରି ମଧ୍ୟ କହିଥିଲେ ଯେ, ଏହାର ଅର୍ଥ ହେଉଛି ଏପରି ଏକ ଦେଶ ଯେଉଁଠାରେ ରୋଗ ଯୋଗୁଁ କେହି ଅକାଳ ମୃତ୍ୟୁର ଶିକାର ହୁଅନ୍ତି ନାହିଁ ଏବଂ ଯେଉଁଠାରେ ଏକ ସୁସ୍ଥ ଏବଂ ସୁଖୀ ଭାରତ ନିର୍ମାଣ ହୁଏ। ଶେଷରେ, ସେ କହିଥିଲେ ଯେ “ରାମରୁ ରାଷ୍ଟ୍ର” ଏକ ଭେଦଭାବରୁ ମୁକ୍ତ ସମାଜକୁ ମଧ୍ୟ ସୂଚିତ କରେ, ଯେଉଁଠାରେ ସମସ୍ତ ସମ୍ପ୍ରଦାୟ ମଧ୍ୟରେ ସାମାଜିକ ନ୍ୟାୟ ପ୍ରଚଳିତ ହୁଏ। ପ୍ରଧାନମନ୍ତ୍ରୀ ଆହୁରି କହିଥିଲେ ଯେ “ରାମକୁ ରାଷ୍ଟ୍ର” ମାନବତା ବିରୋଧୀ ଶକ୍ତିକୁ ନିପାତ କରିବାର ସଂକଳ୍ପ, ଆତଙ୍କବାଦକୁ ନଷ୍ଟ କରିବାର ପ୍ରତିଜ୍ଞାକୁ ମଧ୍ୟ ସୂଚିତ କରେ। ସେ ମନ୍ତବ୍ୟ ଦେଇଥିଲେ ଯେ, ଏହି ସଂକଳ୍ପ ଅପରେସନ ସିନ୍ଦୂରରେ ସ୍ପଷ୍ଟ ଭାବରେ ପ୍ରଦର୍ଶିତ ହୋଇଥିଲା, ଯେଉଁଠାରେ ଭାରତ ଆତଙ୍କବାଦର ମେରୁଦଣ୍ଡ ଭାଙ୍ଗି ଦେଇଥିଲା। “ଭାରତ ଏବେ ନକ୍ସଲବାଦ ଏବଂ ମାଓବାଦୀ ଆତଙ୍କବାଦର ମୂଳୋତ୍ପାଟନ ଦିଗରେ ଅଗ୍ରସର ହେଉଛି , ଏବଂ ଏହାର ଅଭୂତପୂର୍ବ ବିଜୟ ପାଇଁ ଗର୍ବରେ ପରିପୂର୍ଣ୍ଣ” ବୋଲି ପ୍ରଧାନମନ୍ତ୍ରୀ ଦୃଢ଼ୋକ୍ତି ପ୍ରକାଶ କରି କହିଛନ୍ତି ଯେ, ଛତିଶଗଡ଼ ବିଧାନସଭାର ନୂତନ ପରିସରରେ ଏହି ଗର୍ବର ଭାବନା ସ୍ପଷ୍ଟ ଭାବରେ ପ୍ରତିଫଳିତ ହେଉଛି।
ଗତ ୨୫ ବର୍ଷ ମଧ୍ୟରେ ଛତିଶଗଡ଼ରେ ଦେଖାଯାଇଥିବା ପରିବର୍ତ୍ତନ ଉଲ୍ଲେଖନୀୟ ଏବଂ ପ୍ରେରଣାଦାୟକ ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ, “ପୂର୍ବେ ନକ୍ସଲବାଦ ଏବଂ ପଛୁଆ ଅଞ୍ଚଳ ଭାବେ ଜଣାଶୁଣା ଏହି ରାଜ୍ୟ ଏବେ ସମୃଦ୍ଧି, ସୁରକ୍ଷା ଏବଂ ସ୍ଥିରତାର ପ୍ରତୀକ ଭାବରେ ଉଭା ହେଉଛି”। ସେ ଉଲ୍ଲେଖ କରିଥିଲେ ଯେ, ବସ୍ତର ଅଲିମ୍ପିକ୍ସ ବିଷୟରେ ଏବେ ସାରା ଦେଶରେ ଆଲୋଚନା ହେଉଛି ଏବଂ ନକ୍ସଲ ପ୍ରଭାବିତ ଅଞ୍ଚଳଗୁଡ଼ିକରେ ବିକାଶ ଏବଂ ଶାନ୍ତି ଫେରି ଆସିଛି। ପ୍ରଧାନମନ୍ତ୍ରୀ ଏହି ପରିବର୍ତ୍ତନ ପାଇଁ ଛତିଶଗଡ଼ର ଲୋକଙ୍କ କଠିନ ପରିଶ୍ରମ ଏବଂ ସେମାନଙ୍କ ସରକାରଙ୍କ ଦୂରଦୃଷ୍ଟିପୂର୍ଣ୍ଣ ନେତୃତ୍ୱକୁ ଶ୍ରେୟ ଦେଇଛନ୍ତି।
ଛତିଶଗଡ଼ର ରୌପ୍ୟ ଜୟନ୍ତୀ ପାଳନ ଏବେ ଏକ ବୃହତ୍ତର ଜାତୀୟ ଲକ୍ଷ୍ୟ ପାଇଁ ଆରମ୍ଭ କେନ୍ଦ୍ର ହେବାକୁ ଯାଉଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ, ଛତିଶଗଡ଼ ୨୦୪୭ ସୁଦ୍ଧା ଏକ ବିକଶିତ ଭାରତର ସ୍ୱପ୍ନ ହାସଲ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। ଶ୍ରୀ ମୋଦୀ ଉପସ୍ଥିତ ସମସ୍ତଙ୍କୁ ଏକ ବ୍ୟବସ୍ଥା ନିର୍ମାଣ କରିବାକୁ ଏବଂ ବିଧାନସଭା ମାଧ୍ୟମରେ ଏକ ଉଦାହରଣ ସ୍ଥାପନ କରିବାକୁ ଆହ୍ୱାନ କରିଥିଲେ, ଯାହା ଦେଶର ପ୍ରତ୍ୟେକ ରାଜ୍ୟକୁ ଏହି ମିଶନରେ ନବସୃଜନ ଏବଂ ଯୋଗଦାନ ପାଇଁ ପ୍ରେରଣା ଦେବ। ସେ ଏଠାରେ ଅନୁଷ୍ଠିତ ଆଲୋଚନା, ଉଠାଯାଇଥିବା ପ୍ରଶ୍ନ ଏବଂ ଗୃହର କାର୍ଯ୍ୟରେ ଉତ୍କର୍ଷତା ପାଇଁ ଆହ୍ୱାନ କରିଥିଲେ। ସେ ଗୁରୁତ୍ୱାରୋପ କରିଥିଲେ ଯେ ପ୍ରତ୍ୟେକ କାର୍ଯ୍ୟ, ପ୍ରତ୍ୟେକ ରୂପରେ, ଏକ ବିକଶିତ ଛତିଶଗଡ଼ ଏବଂ ଏକ ବିକଶିତ ଭାରତ ନିର୍ମାଣ ଦିଗରେ ନିର୍ଦ୍ଦେଶିତ ହେବା ଉଚିତ।
ପ୍ରଧାନମନ୍ତ୍ରୀ ଆହୁରି ମଧ୍ୟ ମନ୍ତବ୍ୟ ଦେଇଥିଲେ ଯେ, ଛତିଶଗଡ଼ର ନୂତନ ବିଧାନସଭାର ପ୍ରକୃତ ଗୌରବ ଏହାର ମହିମାରେ ନୁହେଁ, ବରଂ ଏହା ଭିତରେ ନିଆଯାଇଥିବା କଲ୍ୟାଣମୂଳକ ନିଷ୍ପତ୍ତିରେ ରହିଛି। ସେ କହିଛନ୍ତି ଯେ ଏହା ଛତିଶଗଡ଼ର ସ୍ୱପ୍ନ ଏବଂ ଆକାଂକ୍ଷାକୁ ଗୃହ କେତେ ଗଭୀର ଭାବରେ ବୁଝେ ଏବଂ ସେଗୁଡ଼ିକୁ ପୂରଣ କରିବାକୁ କେତେ ଦୂର ଯାଏ ତାହା ଉପରେ ନିର୍ଭର କରିବ । ସେ କହିଥିଲେ ଯେ ପ୍ରତ୍ୟେକ ନିଷ୍ପତ୍ତି ଚାଷୀଙ୍କ କଠିନ ପରିଶ୍ରମକୁ ସମ୍ମାନ କରିବା , ଯୁବକମାନଙ୍କ ସ୍ୱପ୍ନକୁ ମାର୍ଗଦର୍ଶନ କରିବା, ମହିଳାମାନଙ୍କ ପାଇଁ ନୂତନ ଆଶା ଆଣିବା ଏବଂ ସବୁଠାରୁ ପଛୁଆ ବର୍ଗର ଲୋକଙ୍କର ଉତ୍ଥାନ ପାଇଁ ଏକ ମାଧ୍ୟମ ଭାବରେ କାର୍ଯ୍ୟ କରିବା ଉଚିତ। “ଏହି ବିଧାନସଭା କେବଳ ଆଇନ ପ୍ରଣୟନ ପାଇଁ ଏକ ସ୍ଥାନ ନୁହେଁ, ବରଂ ଛତିଶଗଡ଼ର ଭାଗ୍ୟ ଗଠନ ପାଇଁ ଏକ ସ୍ପନ୍ଦନଶୀଳ କେନ୍ଦ୍ର” ବୋଲି ଶ୍ରୀ ମୋଦୀ କହିଥିଲେ ଏବଂ ଏହି ଗୃହରୁ ସୃଷ୍ଟି ହେଉଥିବା ପ୍ରତ୍ୟେକ ଚିନ୍ତାଧାରା ଜନସେବାର ମନୋଭାବ, ବିକାଶ ପାଇଁ ସଂକଳ୍ପ ଏବଂ ଭାରତକୁ ନୂତନ ଉଚ୍ଚତାରେ ପହଞ୍ଚାଇବା ପାଇଁ ଆତ୍ମବିଶ୍ୱାସ ବହନ କରିବା ଉଚିତ ବୋଲି ସେ ଦୃଢତାର ସହିତ କହିଥିଲେ।
ଗଣତନ୍ତ୍ରରେ ସର୍ବୋପରି କର୍ତ୍ତବ୍ୟ ପାଳନ କରିବା ଏବଂ ସାର୍ବଜନୀନ ଜୀବନରେ ଆମର ଭୂମିକା ପ୍ରତିବଦ୍ଧତାର ସହିତ ପାଳନ କରିବା ପାଇଁ ଏକ ଗମ୍ଭୀର ପ୍ରତିଜ୍ଞା ନେବାରେ ନୂତନ ବିଧାନସଭା କୋଠା ଉଦଘାଟନର ପ୍ରକୃତ ଗୁରୁତ୍ୱ ରହିଛି ବୋଲି ବୁଝାଇ ପ୍ରଧାନମନ୍ତ୍ରୀ ସମସ୍ତଙ୍କୁ ଏହି ସଂକଳ୍ପ ନେଇ, ବିଶେଷ କରି ଭାରତୀୟ ଗଣତନ୍ତ୍ରର ଏହି ଅମୃତ ବର୍ଷରେ, ଲୋକଙ୍କ ସେବାରେ ନିଜ ଜୀବନ ଉତ୍ସର୍ଗ କରିବା ପାଇଁ ଆହ୍ୱାନ କରିଥିଲେ। ଗଣତନ୍ତ୍ରର ଏହି ସୁନ୍ଦର ନୂତନ ମନ୍ଦିରର ଉଦଘାଟନ ପାଇଁ ସମସ୍ତଙ୍କୁ ହାର୍ଦ୍ଦିକ ଅଭିନନ୍ଦନ ଏବଂ ଶୁଭେଚ୍ଛା ଜଣାଇ ସେ ନିଜ ବକ୍ତବ୍ୟ ଶେଷ କରିଥିଲେ।
ଏହି କାର୍ଯ୍ୟକ୍ରମରେ ଛତିଶଗଡ଼ର ରାଜ୍ୟପାଳ ଶ୍ରୀ ରାମେନ ଡେକା, ଲୋକସଭା ବାଚସ୍ପତି ଶ୍ରୀ ଓମ୍ ବିର୍ଲା, ଛତିଶଗଡ଼ ବିଧାନସଭାର ବାଚସ୍ପତି ଡକ୍ଟର ରମଣ ସିଂହ, ଛତିଶଗଡ଼ର ମୁଖ୍ୟମନ୍ତ୍ରୀ ଶ୍ରୀ ବିଷ୍ଣୁ ଦେଓ ସାଏ, କେନ୍ଦ୍ରମନ୍ତ୍ରୀ ଶ୍ରୀ ଟୋକନ ସାହୁ ଏବଂ ଅନ୍ୟାନ୍ୟ ବିଶିଷ୍ଟ ଅତିଥିମାନେ ଉପସ୍ଥିତ ଥିଲେ।
ପୃଷ୍ଠଭୂମି
ଛତିଶଗଡ଼ ବିଧାନସଭାର ନୂତନ କୋଠା ସବୁଜ କୋଠା (ଗ୍ରୀନ୍ ବିଲଡିଂ) ଧାରଣା ଉପରେ ନିର୍ମିତ, ଯାହାକୁ ସମ୍ପୂର୍ଣ୍ଣ ସୌରଶକ୍ତିରେ ପରିଚାଳିତ କରାଯିବା ଏବଂ ବର୍ଷାଜଳ ଅମଳ ବ୍ୟବସ୍ଥା ସହିତ ସଜ୍ଜିତ କରାଯିବାର ଯୋଜନା କରାଯାଇଛି।
