ବିଶ୍ୱ ଟେଲିକମ୍ ପ୍ରଯୁକ୍ତି ବଜାର: ରିଲାଏନ୍ସ ଜିଓ ପ୍ଲାଟଫର୍ମ ବର୍ତ୍ତମାନ ଏହାର ଉନ୍ନତ ୫ଜି ପ୍ରଯୁକ୍ତି ମାଧ୍ୟମରେ ବିଶ୍ୱ ସ୍ତରରେ ସମ୍ପ୍ରସାରଣ କରିବାକୁ ପ୍ରସ୍ତୁତ ହେଉଛି। କମ୍ପାନୀ ମୋବାଇଲ୍ ଏବଂ ହୋମ୍ ବ୍ରଡବ୍ୟାଣ୍ଡ ଉଭୟରେ ସମ୍ପୂର୍ଣ୍ଣ ୫ଜି ସମାଧାନ ବିକଶିତ କରିଛି, ଯେଉଁଥିରେ ଓପନ ଆରଏଏନ-ଆଧାରିତ ରେଡିଓ, ନେଟୱାର୍କ କୋର୍, କ୍ଲାଉଡ୍-ନେଟିଭ୍ ଓଏସଏସ / ବିଏସଏସ ସିଷ୍ଟମ୍ ଏବଂ ଏଆଇ-ଆଧାରିତ ଅଟୋମେସନ୍ ପ୍ଲାଟଫର୍ମ ଅନ୍ତର୍ଭୁକ୍ତ ରହିଛି। ଜିଓର ‘ଏୟାର ଫାଇବର’ ପ୍ରଯୁକ୍ତି ହୋମ ବ୍ରଡବ୍ୟାଣ୍ଡ କ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରୁଛି। ପ୍ରତିଷ୍ଠିତ ଆନ୍ତର୍ଜାତୀୟ ବ୍ରୋକରେଜ୍ ସଂସ୍ଥା ଜେଫରିଜ୍ ଦ୍ୱାରା ଏକ ରିପୋର୍ଟରେ ଏହା ପ୍ରକାଶ ପାଇଛି।
ରିପୋର୍ଟରେ କୁହାଯାଇଛି ଯେ ଜିଓର ସୁଲଭ ଏବଂ ସ୍କେଲେବଲ୍ ୫ଜି ସମାଧାନ ଏହାକୁ ବିଶ୍ୱର ୧୨୧ ବିଲିୟନ ଡଲାର ଟେଲିକମ୍ ପ୍ରଯୁକ୍ତି ବଜାରରେ ଏକ ମହତ୍ତ୍ୱପୂର୍ଣ୍ଣ ଲାଭ ଦେଇପାରିବ। ବର୍ତ୍ତମାନ, ବିଶ୍ୱବ୍ୟାପୀ, ବିଶେଷକରି ବିକାଶଶୀଳ ଦେଶଗୁଡ଼ିକରେ ୫ଜି ନେଟୱାର୍କ କଭରେଜ୍ ବହୁତକମ୍ ରହିଛି। ଏହା ବ୍ୟତୀତ, କେବଳ କିଛି ବଡ଼ ବହୁରାଷ୍ଟ୍ରୀୟ ପ୍ରଯୁକ୍ତି କମ୍ପାନୀ ନେଟୱାର୍କ ହାର୍ଡୱେୟାର ଏବଂ ସଫ୍ଟୱେର୍ ଯୋଗାଣ କରୁଛନ୍ତି। ଜେଫେରିଜ୍ ଅନୁଯାୟୀ ଯଦି ଜିଓ ଏହି ପରିସ୍ଥିତିରେ ବିଶ୍ୱ ସ୍ତରରେ ବଜାରରେ ପ୍ରବେଶ କରେ, ତେବେ ଏହାର ଓପନ ଆର୍କିଟେକଚର ଆଧାରିତ ସଫ୍ଟୱେର୍ ମଡେଲ୍ ଦ୍ୱାରା ଖର୍ଚ୍ଚ ହ୍ରାସ ହେବ ଏବଂ ଏହାର ସିଧାସଳଖ ଲାଭ ବିକାଶଶୀଳ ଦେଶଗୁଡିକ ପାଖରେ ପହଞ୍ଚିବାରେ ସହାୟକ ହେବ। ରିପୋର୍ଟ ଅନୁଯାୟୀ, ଜିଓ ପାଖରେ ବିଦେଶରେ ଏହାର ପ୍ରଯୁକ୍ତି ବିକ୍ରୟ କରି ରାଜସ୍ୱ ସୃଷ୍ଟି କରିବାର ଉତ୍କୃଷ୍ଟ ସୁଯୋଗ ରହିଛି।
ଗତ କିଛି ବର୍ଷ ଧରି, ଜିଓ ପ୍ରଯୁକ୍ତିବିଦ୍ୟାରେ ଉଲ୍ଲେଖନୀୟ ନିବେଶ କରିଆସୁଛି। ଏହାର ପେଟେଣ୍ଟ ଦାଖଲ ୧୩ ଗୁଣ ବୃଦ୍ଧି ପାଇଛି ଏବଂ ପେଟେଣ୍ଟ ଅନୁଦାନ ଚାରି ଗୁଣ ବୃଦ୍ଧି ପାଇଛି। ଏହା ସହିତ, ୫ଜି ଏବଂ ୬ଜି ପାଇଁ ଅନ୍ତର୍ଜାତୀୟ ମାନକ ବିକାଶରେ ଜିଓର ଅବଦାନ ସାତ ଗୁଣ ବୃଦ୍ଧି ପାଇଛି। ଜେଫେରିଜ୍ ଆକଳନ ଅନୁଯାୟୀ ମୋବାଇଲ୍ ଟାରିଫରେ ବୃଦ୍ଧି, ହୋମ୍ ବ୍ରଡବ୍ୟାଣ୍ଡର ବିସ୍ତାର ଏବଂ ବିଶ୍ୱସ୍ତରରେ ପ୍ରଯୁକ୍ତି ରପ୍ତାନି ସହିତ ଜିଓ ଆଗାମୀ ବର୍ଷଗୁଡ଼ିକରେ ଦୃଢ଼ ଅଭିବୃଦ୍ଧି ପଥରେ ରହିଛି। ଡିସେମ୍ବର ୨୦୨୬ ସୁଦ୍ଧା ଜିଓର ଏଣ୍ଟରପ୍ରାଇଜ୍ ମୂଲ୍ୟ ୧୮୦ ବିଲିୟନ ଡଲାରରେ ପହଞ୍ଚିବ ବୋଲି ଏହି ବ୍ରୋକରେଜ୍ ହାଉସ୍ ଆଶା ପ୍ରକାଶ କରିଛି।