ନୂଆଦିଲ୍ଲୀ: ଲିବିୟାର ସାମରିକ ମୁଖ୍ୟଙ୍କୁ ନେଇ ଯାଉଥିବା ଏକ ଘରୋଇ ଜେଟ୍ ମଙ୍ଗଳବାର ରାତିରେ ତୁର୍କୀର ରାଜଧାନୀ ଆଙ୍କାରାରୁ ଉଡ଼ାଣ ଭରିବାର କିଛି ସମୟ ପରେ ଦୁର୍ଘଟଣାଗ୍ରସ୍ତ ହୋଇଛି। ଏହି ଦୁର୍ଘଟଣାରେ ଲିବିୟାର ସେନା ମୁଖ୍ୟ ଜେନେରାଲ ମହମ୍ମଦ ଅଲି ଅହମ୍ମଦ ଅଲ-ହଦ୍ଦାଦଙ୍କ ସମେତ ସମସ୍ତ ଯାତ୍ରୀଙ୍କ ମୃତ୍ୟୁ ହୋଇଛି। ଏଥିରେ ମୋଟ ପାଞ୍ଚ ଜଣ ଯାତ୍ରା କରୁଥିଲେ।
ଲିବିୟାର ଅଧିକାରୀମାନେ କହିଛନ୍ତି ଯେ, ବିମାନଟି ଯାନ୍ତ୍ରିକ ତ୍ରୁଟିର ସମ୍ମୁଖୀନ ହୋଇଥିଲା, ଯାହା ଫଳରେ ଏହି ଦୁର୍ଘଟଣା ଘଟିଥିଲା। ତୁର୍କୀ ଅଧିକାରୀମାନେ କହିଛନ୍ତି ଯେ, ଫାଲକନ୍-୫୦ ବ୍ୟବସାୟିକ ଜେଟ୍ର ଭଗ୍ନାବଶେଷ ଆଙ୍କାରାରୁ ପ୍ରାୟ ୭୦ କିଲୋମିଟର ଦୂରରେ ହାୟମାନା ଜିଲ୍ଲାର କେସିକକାଭାକ୍ ଗାଁ ନିକଟରେ ମିଳିଛି। ଦୁର୍ଘଟଣାର ତଦନ୍ତ ପାଇଁ ଲିବିୟା ସରକାର ଆଙ୍କାରାକୁ ଏକ ଦଳ ପଠାଇବେ।