ନୂଆଦିଲ୍ଲୀ: ସଂସ୍ଥାଗତ ବର୍ଗରେ ସିକିମ୍ ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଏସ୍ଏସଡିଏମ୍ଏ) ଏବଂ ବ୍ୟକ୍ତିଗତ ବର୍ଗରେ ଲେଫ୍ଟନାଣ୍ଟ କର୍ଣ୍ଣେଲ ସୀତା ଅଶୋକ ଶେଲକେଙ୍କୁ ବିପର୍ଯ୍ୟୟ ପରିଚାଳନାରେ ଉତ୍କୃଷ୍ଟ କାର୍ଯ୍ୟ ପାଇଁ ସୁଭାଷ ଚନ୍ଦ୍ର ବୋଷ ଆପଦା ପ୍ରବନ୍ଧନ ପୁରସ୍କାର ୨୦୨୬ ପାଇଁ ଚୟନ କରାଯାଇଛି।
ପ୍ରଧାନମନ୍ତ୍ରୀଙ୍କ ନେତୃତ୍ୱରେ ଭାରତ ସରକାର ବିପର୍ଯ୍ୟୟ ପରିଚାଳନା କ୍ଷେତ୍ରରେ ଭାରତର ବ୍ୟକ୍ତି ଏବଂ ସଂଗଠନଗୁଡ଼ିକ ଦ୍ୱାରା ପ୍ରଦାନ କରାଯାଇଥିବା ଅମୂଲ୍ୟ ଅବଦାନ ଏବଂ ନିଃସ୍ୱାର୍ଥପର ସେବାକୁ ସ୍ୱୀକୃତି ଏବଂ ସମ୍ମାନ ଜଣାଇବା ପାଇଁ ସୁଭାଷ ଚନ୍ଦ୍ର ବୋଷ ଆପଦା ପ୍ରବନ୍ଧନ ପୁରସ୍କାର ନାମରେ ଏକ ବାର୍ଷିକ ପୁରସ୍କାର ପ୍ରତିଷ୍ଠା କରିଛନ୍ତି। ପ୍ରତିବର୍ଷ ଜାନୁଆରୀ ୨୩ ତାରିଖରେ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଜୟନ୍ତୀ ଅବସରରେ ଏହି ପୁରସ୍କାର ଘୋଷଣା କରାଯାଇଥାଏ।
କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଅମିତ ଶାହଙ୍କ ମାର୍ଗଦର୍ଶନରେ ଦେଶ ନିଜର ବିପର୍ଯ୍ୟୟ ପରିଚାଳନା ଅଭ୍ୟାସ, ପ୍ରସ୍ତୁତି, ପ୍ରଶମନ ଏବଂ ପ୍ରତିକ୍ରିୟା ବ୍ୟବସ୍ଥାରେ ଉଲ୍ଲେଖନୀୟ ଉନ୍ନତି କରିଛି, ଯାହାଫଳରେ ପ୍ରାକୃତିକ ବିପର୍ଯ୍ୟୟ ସମୟରେ ମୃତ୍ୟୁ ସଂଖ୍ୟାରେ ଉଲ୍ଲେଖନୀୟ ହ୍ରାସ ଘଟିଛି।
୨୦୨୬ ବର୍ଷର ପୁରସ୍କାର ପାଇଁ ୨୦୨୫ ମସିହା ମେ ୧ ତାରିଖରୁ ପ୍ରସ୍ତାବ ମଗାଯାଇଥିଲା। ୨୦୨୬ ବର୍ଷର ଏହି ପୁରସ୍କାରକୁ ପ୍ରିଣ୍ଟ, ଇଲେକ୍ଟ୍ରୋନିକ୍ ଏବଂ ସୋସିଆଲ ମିଡିଆ ମାଧ୍ୟମରେ ବ୍ୟାପକ ପ୍ରଚାର କରାଯାଇଥିଲା। ଏହାର ଜବାବରେ, ଅନୁଷ୍ଠାନ ଏବଂ ବ୍ୟକ୍ତିବିଶେଷଙ୍କ ଠାରୁ ୨୭୧ଟି ପ୍ରସ୍ତାବ ଗ୍ରହଣ କରାଯାଇଥିଲା।
ବିପର୍ଯ୍ୟୟ ପରିଚାଳନା କ୍ଷେତ୍ରରେ ୨୦୨୬ ପୁରସ୍କାର ବିଜେତାଙ୍କ ଉଲ୍ଲେଖନୀୟ କାର୍ଯ୍ୟର ସାରାଂଶ ନିମ୍ନରେ ଦିଆଗଲା:
ଲେଫ୍ଟନାଣ୍ଟ କର୍ଣ୍ଣେଲ ସୀତା ଅଶୋକ ଶେଲକେ–ବ୍ୟକ୍ତିଗତ ବର୍ଗ
ଭାରତୀୟ ସେନାର ଲେଫ୍ଟନାଣ୍ଟ କର୍ଣ୍ଣେଲ ସୀତା ଅଶୋକ ଶେଲକେ, ୨୦୨୪ ବନ୍ୟା ଏବଂ ଭୂସ୍ଖଳନ ସମୟରେ କେରଳର ୱାୟନାଡରେ ବ୍ୟାପକ ମାନବୀୟ ସହାୟତା ଏବଂ ବିପର୍ଯ୍ୟୟ ରିଲିଫ୍ (ଏଚ୍ଏଡିଆର୍) ଅଭିଯାନର ନେତୃତ୍ୱ ନେଇଥିଲେ। ତତ୍କାଳ ସ୍ଥାନାନ୍ତର, ରିଲିଫ ବଣ୍ଟନ ଏବଂ ଅତ୍ୟାବଶ୍ୟକ ସେବାଗୁଡିକର ପୁନରୁଦ୍ଧାର ସୁନିଶ୍ଚିତ କରିବା ପାଇଁ ସେ ବେସାମରିକ କର୍ତ୍ତୃପକ୍ଷ ଏବଂ ସ୍ଥାନୀୟ ନେତାମାନଙ୍କ ସହ ସମନ୍ୱୟ ରକ୍ଷା କରିଥିଲେ। ଲେଫ୍ଟନାଣ୍ଟ କର୍ଣ୍ଣେଲ ସୀତା ଅଶୋକ ଶେଲକେ ପ୍ରତିକୂଳ ପାଣିପାଗ ପରିସ୍ଥିତିରେ ଶତାଧିକ ନାଗରିକଙ୍କୁ ବଞ୍ଚାଇ ଏକାଧିକ ବଡ ଉଦ୍ଧାର ଅଭିଯାନର ନିର୍ଦ୍ଦେଶ ଦେଇଥିଲେ। ସେ ଚୁରାଲମାଲାରେ ୧୯୦ ଫୁଟ ଉଚ୍ଚତା ବିଶିଷ୍ଟ ବେଇଲି ସେତୁର ଦ୍ରୁତ ନିର୍ମାଣର ତଦାରଖ କରିଥିଲେ, ଦୁର୍ଗମ ଗ୍ରାମଗୁଡ଼ିକ ସହିତ ଗୁରୁତ୍ୱପୂର୍ଣ୍ଣ ସଂଯୋଗକୁ ପୁନରୁଦ୍ଧାର କରିଥିଲେ ଏବଂ କୋମାଟ୍ସୁ ପିସି ୨୧୦ ଖନନକାରୀ ଯନ୍ତ୍ରକୁ ବ୍ୟବହାର କରିବା ଏବଂ ରାତିରେ ଚାରି ଘଣ୍ଟା ମଧ୍ୟରେ ଏକ ପାଦଚଲା ପୋଲ ନିର୍ମାଣ କରିବା ଭଳି ଅଭିନବ ଇଞ୍ଜିନିୟରିଂ ସମାଧାନ କାର୍ଯ୍ୟକାରୀ କରିଥିଲେ।
୧୫୦ ଟନ୍ ଉପକରଣ ଯୋଗାଡ଼ କରି, ଲେଫ୍ଟନାଣ୍ଟ କର୍ଣ୍ଣେଲ ସୀତା ଅଶୋକ ଶେଲକେ ସେହି ଅପରେସନର ନେତୃତ୍ୱ ନେଇଥିଲେ ଯାହା ସମୟୋଚିତ ରିଲିଫ ଏବଂ ପୁନରୁଦ୍ଧାର ପ୍ରୟାସ ମାଧ୍ୟମରେ ହଜାର ହଜାର ଲୋକଙ୍କୁ ଉପକୃତ କରିଥିଲା। ସେ ୨,୩୦୦ ରୁ ଅଧିକ କର୍ମଚାରୀଙ୍କୁ ବିପର୍ଯ୍ୟୟ ମୁକାବିଲା ଏବଂ ମାନବିକ କାର୍ଯ୍ୟରେ ତାଲିମ ମଧ୍ୟ ଦେଇଥିଲେ। ସେ ତାଙ୍କ ଇଞ୍ଜିନିୟରିଂ ସେବା ମାଧ୍ୟମରେ ବିପର୍ଯ୍ୟୟ ବିପଦ ହ୍ରାସ (ଡିଆରଆର୍)କୁ କାର୍ଯ୍ୟରେ ଆଣିଥାନ୍ତି। କର୍ପ୍ସ ଅଫ୍ ଇଞ୍ଜିନିୟର୍ସ ଦକ୍ଷତାର ଉପଯୋଗ କରି, ସେ ଦୁର୍ଗମ ବିପର୍ଯ୍ୟୟ ପ୍ରଭାବିତ ଅଞ୍ଚଳରେ ସେତୁ, ପ୍ରବେଶ ପଥ ଏବଂ ଆଶ୍ରୟସ୍ଥଳର ତ୍ୱରିତ ନିର୍ମାଣକୁ ସକ୍ଷମ କରିଥିଲେ, ରିଲିଫ ଏବଂ ପୁନରୁଦ୍ଧାରରେ ସହାୟତା କରିଥିଲେ। ତାଙ୍କର କାର୍ଯ୍ୟ ବ୍ୟବହାରିକ ନେତୃତ୍ୱ ଏବଂ କାର୍ଯ୍ୟକ୍ଷମ ଡିଆରଆରରେ ମହିଳାମାନଙ୍କର ବର୍ଦ୍ଧିତ ଭୂମିକାକୁ ପ୍ରତିଫଳିତ କରେ ।
ସିକିମ ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଏସ୍ଏସଡିଏମ୍ଏ)- ସଂସ୍ଥାଗତ ବର୍ଗ
ସିକିମ ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଏସ୍ଏସଡିଏମ୍ଏ) ୨୦୦୫ ମସିହାରେ ସ୍ଥାପିତ ହୋଇଥିଲା। ଗ୍ରାମ ସ୍ତରରେ ବିପର୍ଯ୍ୟୟ ପରିଚାଳନା ସହାୟକ, ବ୍ଲକ ମୁଖ୍ୟାଳୟରେ ବିପର୍ଯ୍ୟୟ ପରିଚାଳନା ସୁପରଭାଇଜର ଏବଂ ଜିଲ୍ଲା ମୁଖ୍ୟାଳୟରେ ବିପର୍ଯ୍ୟୟ ପରିଚାଳନା ସଂଯୋଜକ-ତିନୋଟି ସ୍ତରରେ ବିପର୍ଯ୍ୟୟ ପରିଚାଳନା ଅଧିକାରୀ ଭାବେ ୧,୧୮୫ ଜଣ ତାଲିମପ୍ରାପ୍ତ ଆପଦା ମିତ୍ରଙ୍କୁ ନିୟୋଜିତ କରି ଏସ୍ଏସଡିଏମ୍ଏ ସିକିମରେ ବିପର୍ଯ୍ୟୟ ପ୍ରସ୍ତୁତି ଏବଂ ପ୍ରତିକ୍ରିୟାକୁ ଗୁରୁତ୍ୱପୂର୍ଣ୍ଣ ଭାବେ ସୁଦୃଢ଼ କରିଛି। ସମସ୍ତ ଗ୍ରାମ ପଞ୍ଚାୟତଗୁଡ଼ିକରେ ବିପର୍ଯ୍ୟୟ ପରିଚାଳନା ସହାୟକମାନଙ୍କୁ ନିଯୁକ୍ତି ଦିଆଯାଇଛି। ଏହା ସହଭାଗୀ ଯୋଜନା, ଦକ୍ଷତା ନିର୍ମାଣ ପଦକ୍ଷେପ ଏବଂ ପଞ୍ଚାୟତ ସ୍ତରୀୟ କମିଟିଗୁଡ଼ିକୁ ଆଗେଇ ନେଇଛି ଯାହା ସମସ୍ତ ଛଅଟି ଜିଲ୍ଲାରେ ବିପର୍ଯ୍ୟୟ ଏବଂ ଜଳବାୟୁ ବିପଦ ପ୍ରତି ସହନଶୀଳତା ବୃଦ୍ଧି କରିଛି।
୨୦୧୬ର ମାନତମ ଭୂସ୍ଖଳନ ଏବଂ ୨୦୨୩ର ତିସ୍ତା ବନ୍ୟା ଭଳି ଗୁରୁତ୍ୱପୂର୍ଣ୍ଣ ଘଟଣା ସମୟରେ, ଏସ୍ଏସଡିଏମ୍ଏର ଠିକଣା ସମୟ ପଦକ୍ଷେପ ଏବଂ ତାଲିମପ୍ରାପ୍ତ ପ୍ରଥମ ପ୍ରତିକ୍ରିୟାକାରୀମାନେ ୨,୫୬୩ ଜଣ ଲୋକଙ୍କୁ ଉଦ୍ଧାର କରିବାରେ ସକ୍ଷମ ହୋଇଥିଲେ ଏବଂ ଜୀବନହାନି ଓ କ୍ଷୟକ୍ଷତି ହ୍ରାସ କରିଥିଲେ। ଏସ୍ଏସଡିଏମ୍ଏ ଆପଦା ମିତ୍ର ମାଧ୍ୟମରେ ଏକ ସକ୍ରିୟ, ଗୋଷ୍ଠୀ-କୈନ୍ଦ୍ରିକ ବିପର୍ଯ୍ୟୟ ବିପଦ ହ୍ରାସ ଆଭିମୁଖ୍ୟକୁ ସଂସ୍ଥାଗତ କରିଛି, ଯେଉଁଥିରେ ପ୍ରାରମ୍ଭିକ ଚେତାବନୀ, ପ୍ରସ୍ତୁତି ଏବଂ ସ୍ଥାନୀୟ ଦକ୍ଷତା ନିର୍ମାଣ ଉପରେ ଦୃଢ ଧ୍ୟାନ ଦିଆଯାଇଛି। ବିଶେଷ କରି ଅନ୍ୟ ହିମାଳୟ ଏବଂ ଉତ୍ତର-ପୂର୍ବାଞ୍ଚଳ ରାଜ୍ୟଗୁଡ଼ିକ ପାଇଁ ପ୍ରାସଙ୍ଗିକ, ଗୋଷ୍ଠୀ-କୈନ୍ଦ୍ରିକ ବିପର୍ଯ୍ୟୟ ପ୍ରତିରୋଧର ଏକ ସ୍ଥାୟୀ ଏବଂ ଅନୁକରଣଯୋଗ୍ୟ ମଡେଲ ସୃଷ୍ଟି କରିପାରିଛି।