ନୂଆଦିଲ୍ଲୀ: ଗୁରୁବାର ଅପରାହ୍ନରେ ଉତ୍ତର ପ୍ରଦେଶର ହରଦୋଇ ଜିଲ୍ଲାରେ ବନ୍ଦେ ଭାରତ ଏକ୍ସପ୍ରେସ ଉପରେ ପଥର ଫିଙ୍ଗାଯାଇଥିବା ସୂଚନା ମିଳିଛି। ଏହି ଖବର ଉତ୍ତେଜନା ସୃଷ୍ଟି କରିଛି। କାରଣ ଆରଏସଏସ ମୁଖ୍ୟ ମୋହନ ଭାଗବତ ମଧ୍ୟ ସେହି ଟ୍ରେନରେ ଯାତ୍ରା କରୁଥିଲେ। ପଥର ଦ୍ଵାରା ଗୋଟିଏ କୋଚର କାଚ ମଧ୍ୟ ଭାଙ୍ଗିଯାଇଛି। ଏହି ଘଟଣାରେ କୌଣସି ଯାତ୍ରୀ ଆହତ ହୋଇ ନଥିବା ଆଶ୍ୱସ୍ତିର ବିଷୟ। ଆରଏସଏସ ମୁଖ୍ୟ ବନ୍ଦେ ଭାରତ ଏକ୍ସପ୍ରେସରେ ସେହି କୋଚରେ ଯାତ୍ରା କରୁନଥିଲେ; ସେ ଅନ୍ୟ ଏକ କୋଚରେ ବସିଥିଲେ।
ଏହାକୁ ନେଇ ସୂଚନା ମିଳିଛି ଯେ, ବାରଣାସୀରୁ ମିରଟ ଯାଉଥିବା ଟ୍ରେନ ନମ୍ବର 22489, ବନ୍ଦେ ଭାରତ ଏକ୍ସପ୍ରେସ ଦିଲ୍ଲୀ ଅଭିମୁଖେ ଯାଉଥିବା ସମୟରେ, ଅପରାହ୍ନ ପ୍ରାୟ 3:20 ସମୟରେ, ଚାନ୍ଦମାରୀ ଏବଂ କୌଢା ଷ୍ଟେସନ ମଧ୍ୟରେ ହଠାତ୍ ଏକ ପଥର ଟ୍ରେନର କୋଚ ସି-4 ଉପରେ ବାଜିଲା, ଯାହାଦ୍ଵାରା ଝରକାର କାଚ ଭାଙ୍ଗି ଯାଇଥିଲା। ଘଟଣା ସମୟରେ ରାଷ୍ଟ୍ରୀୟ ସ୍ୱୟଂସେବକ ସଂଘ (RSS) ମୁଖ୍ୟ ମୋହନ ଭାଗବତ ମଧ୍ୟ ଟ୍ରେନରେ ଥିଲେ, ଯଦିଓ ସେ କୋଚ୍ E-1 ରେ ଥିବା ସୂଚନା ମିଳିଛି।
ରେଳବାଇ ସୂତ୍ର ଅନୁଯାୟୀ, 8 ରୁ 13 ବର୍ଷ ବୟସର ପିଲାମାନେ ଟ୍ରାକ ପାଖରେ କ୍ରିକେଟ ଖେଳୁଥିଲେ ଏବଂ ଖେଳ ସମୟରେ ଦୁର୍ଘଟଣାବଶତଃ ଏକ ପଥର ଟ୍ରେନରେ ବାଜିଥିବା ସନ୍ଦେହ କରାଯାଉଛି। ଘଟଣା ବିଷୟରେ ସୂଚନା ପାଇ RPF, GRP ଏବଂ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। CO ସିଟି ଅଙ୍କିତ ମିଶ୍ର କହିଛନ୍ତି ଯେ, ପ୍ରାରମ୍ଭିକ ତଦନ୍ତରୁ ଜଣାପଡ଼ିଛି ଯେ ପିଲାମାନେ ଖେଳୁଥିଲେ ଏବଂ ପରବର୍ତ୍ତୀ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି।
ବନ୍ଦେ ଭାରତ ଭଳି ଏକ ପ୍ରିମିୟମ୍ ଟ୍ରେନରେ ପଥର ଫିଙ୍ଗାଯିବା ଖବର ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠାଇଛି। ତଥାପି, ଏହି ଘଟଣାରେ କୌଣସି ଯାତ୍ରୀ ଆହତ ହୋଇ ନାହାଁନ୍ତି ଏବଂ ଟ୍ରେନକୁ ସୁରକ୍ଷିତ ଭାବରେ ପଠାଯାଇଛି। ପୋଲିସ ଏବଂ ରେଳବାଇ ଅଧିକାରୀମାନେ ଏହି ଘଟଣାର ତଦନ୍ତ କରୁଛନ୍ତି।