ନୂଆଦିଲ୍ଲୀ: କାନାଡିୟ ପ୍ରଧାନମନ୍ତ୍ରୀ ମାର୍କ କାର୍ନି ଚାରି ଦିନିଆ ଭାରତ ଗସ୍ତରେ ଆସିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିମନ୍ତ୍ରଣରେ ଏହା ତାଙ୍କର ପ୍ରଥମ ଗସ୍ତ। ଫେବୃଆରୀ ୨୭ ରୁ ମାର୍ଚ୍ଚ ୨ ତାରିଖ ପର୍ଯ୍ୟନ୍ତ ଏହି ଗସ୍ତ ସମୟରେ ସେ ଅନେକ କାର୍ଯ୍ୟକ୍ରମରେ ଅଂଶଗ୍ରହଣ କରିବେ। କାର୍ନି ତାଙ୍କ ପତ୍ନୀଙ୍କ ସହ ଏକ ସ୍ୱତନ୍ତ୍ର ବିମାନ ଯୋଗେ ମୁମ୍ବାଇରେ ପହଞ୍ଚିଥିଲେ, ଯେଉଁଠାରେ ସେ ଅନେକ ଶିଳ୍ପ ନେତାଙ୍କ ସହ ସାକ୍ଷାତ କରିବେ।
ମାର୍କ କାର୍ନି ଭାରତୀୟ ଏବଂ କାନାଡିୟ ସିଇଓ, ଶିଳ୍ପ ପ୍ରତିନିଧି, ଆର୍ଥିକ ବିଶେଷଜ୍ଞ, ନିବେଶକ ଏବଂ ଶିକ୍ଷାବିତ୍ ଙ୍କ ସହିତ ଭାରତରେ ସକ୍ରିୟ କାନାଡିୟ ପେନସନ ପାଣ୍ଠିର ପ୍ରତିନିଧିମାନଙ୍କ ସହିତ ସାକ୍ଷାତ କରିବେ। ଆଜି ସେ ମୁମ୍ବାଇରେ ଅନେକ ନିବେଶ-ସମ୍ବନ୍ଧୀୟ କାର୍ଯ୍ୟକ୍ରମରେ ଅଂଶଗ୍ରହଣ କରିବେ। ସେ ଭାରତ-କାନାଡା ଅର୍ଥନୈତିକ ସହଯୋଗ, ନିବେଶ ସୁଯୋଗ ଏବଂ ପ୍ରଯୁକ୍ତିବିଦ୍ୟା ସହଭାଗୀତା ବିଷୟରେ ମଧ୍ୟ ଆଲୋଚନା କରିବେ।
ସୋମବାର ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିବେ
ମାର୍କ କାର୍ନି ରବିବାର ମୁମ୍ବାଇ ନୂଆଦିଲ୍ଲୀ ଅଭିମୁଖେ ଯାତ୍ରା କରିବେ ଏବଂ ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଦ୍ୱିପାକ୍ଷିକ ଆଲୋଚନା କରିବେ। ୨୦୨୩ ମସିହାର କୂଟନୈତିକ ବିବାଦ ପରେ କାର୍ନିଙ୍କ ଗସ୍ତର ଉଦ୍ଦେଶ୍ୟ ଦୁଇ ଦେଶ ମଧ୍ୟରେ ରଣନୈତିକ ସମ୍ପର୍କକୁ ପୁନର୍ଜୀବିତ କରିବା ବୋଲି କୁହାଯାଉଛି।
ଭାରତରେ ପହଞ୍ଚିବା ପରେ ମାର୍କ କାର୍ନି ଇନଷ୍ଟାଗ୍ରାମରେ ପୋଷ୍ଟ କରି କହିଛନ୍ତି ଯେ, ଭାରତ ହେଉଛି ବିଶ୍ୱର ସବୁଠାରୁ ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି। “ଆମେ ମୁମ୍ବାଇରେ ପହଞ୍ଚିଛୁ, ଯେଉଁଠାରେ ଆମେ ବ୍ୟବସାୟ ନେତାମାନଙ୍କ ସହିତ ସାକ୍ଷାତ କରିବୁ ଏବଂ ଏପରି ସହଭାଗୀତା ନିର୍ମାଣ କରିବୁ ଯାହା କାନାଡିୟ ଶ୍ରମିକ ଏବଂ ବ୍ୟବସାୟ ପାଇଁ ନୂତନ ସୁଯୋଗ ଖୋଲିବ।”
ଗୁରୁବାର ଜାରି ଏକ ବିବୃତ୍ତିରେ ବୈଦେଶିକ ବ୍ୟାପାର ମନ୍ତ୍ରଣାଳୟ କହିଛି ଯେ, ମାର୍କ କାର୍ନିଙ୍କ ଗସ୍ତ ଭାରତ-କାନାଡା ଦ୍ୱିପାକ୍ଷିକ ସମ୍ପର୍କକୁ ସ୍ୱାଭାବିକ କରିବାରେ ଏକ ଗୁରୁତ୍ୱପୂର୍ଣ୍ଣ ପର୍ଯ୍ୟାୟରେ ଆସିଛି। ଜୁନ୍ ଏବଂ ନଭେମ୍ବରରେ କାନାନାସ୍କିସ୍ ଏବଂ ଜୋହାନ୍ସବର୍ଗରେ ପୂର୍ବ ବୈଠକ ଆଧାରରେ ରଣନୈତିକ ସହଭାଗୀର ବିଭିନ୍ନ କ୍ଷେତ୍ରରେ ପ୍ରଗତି ସମୀକ୍ଷା କରିବେ ଦୁଇ ନେତା।