ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ସିଲଚରରେ ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରିଛନ୍ତି। ସମାବେଶକୁ ସମ୍ବୋଧିତ କରି ସେ କହିଥିଲେ ଯେ ସଂସ୍କୃତି ଓ ପ୍ରାଣବନ୍ତ ପରମ୍ପରାରେ ସମୃଦ୍ଧ ବରାକ ଉପତ୍ୟକା ପରିଦର୍ଶନ ସଦା ତାଙ୍କ ପାଇଁ ଏକ ବିଶେଷ ଅଭିଜ୍ଞତା। ସେ ଉଲ୍ଲେଖ କରିଥିଲେ ଯେ ସିଲଚର ଏହି ଉପତ୍ୟକାର ପ୍ରବେଶଦ୍ୱାର ଭାବେ ପରିଚିତ, ଯେଉଁଠାରେ ଇତିହାସ ଓ ଭାଷା ମିଶି ଏକ ବିଶିଷ୍ଟ ଆଞ୍ଚଳିକ ପରିଚୟ ଗଢ଼ିଉଠିଛି। ପ୍ରଧାନମନ୍ତ୍ରୀ କହିଥିଲେ ଯେ ଏହି ଅଞ୍ଚଳର ଶକ୍ତି ଏହାର ବିବିଧତାରେ ନିହିତ, ଯେଉଁଠାରେ ବଙ୍ଗଳା, ଆସାମିଆ ଓ ଆଦିବାସୀ ପରମ୍ପରାର ସମନ୍ୱୟ ଏକତ୍ର ପ୍ରତିଫଳିତ ହୁଏ। “ବରାକ ଉପତ୍ୟକାର ବିବିଧତା ଏହାର ସର୍ବଶ୍ରେଷ୍ଠ ସମ୍ପଦ, ଯାହା ଏଠାର ଲୋକମାନଙ୍କ ମଧ୍ୟରେ ଭାଇଚାରାର ଭାବନାକୁ ଶକ୍ତିଶାଳୀ କରେ,” ବୋଲି ସେ କହିଥିଲେ।
ପ୍ରଧାନମନ୍ତ୍ରୀ କହିଛନ୍ତି ଯେ, ଏହି ଅଞ୍ଚଳର ଉର୍ବର ସମତଳ ଭୂମି ଏବଂ ଚା’ ବଗିଚା ଦୀର୍ଘ ଦିନ ଧରି ଏହାର ସ୍ଥାନୀୟ ଅର୍ଥନୀତି ଓ ବାଣିଜ୍ୟ ପଥର ମେରୁଦଣ୍ଡ ହୋଇଆସିଛି। ଆଜି ହଜାର ହଜାର କୋଟି ଟଙ୍କାର ପ୍ରକଳ୍ପ ଉଦଘାଟନ ସମଗ୍ର ଉତ୍ତର-ପୂର୍ବ ପାଇଁ ବରାକ ଉପତ୍ୟକାକୁ ଏକ ଲଜିଷ୍ଟିକ୍ସ ହବ୍ ଭାବରେ ଆହୁରି ସଶକ୍ତ କରିବ। ଶ୍ରୀ ମୋଦୀ ଉଲ୍ଲେଖ କରିଛନ୍ତି ଯେ, ରେଳ, ସଡ଼କ ଏବଂ ଶିକ୍ଷା କ୍ଷେତ୍ରରେ ଏହି ପଦକ୍ଷେପଗୁଡ଼ିକ ସ୍ଥାନୀୟ ଯୁବପିଢ଼ିଙ୍କ ନିମନ୍ତେ ବିପୁଳ ନିଯୁକ୍ତି ସୁଯୋଗ ସୃଷ୍ଟି କରିବା ପାଇଁ ଡିଜାଇନ୍ କରାଯାଇଛି। ଏହି ଅଞ୍ଚଳ ଏବେ କେବଳ ରାଜ୍ୟ ନୁହେଁ, ବରଂ ପଶ୍ଚିମବଙ୍ଗ ଏବଂ ଉତ୍ତର-ପୂର୍ବର ପଡ଼ୋଶୀ ଅଞ୍ଚଳଗୁଡ଼ିକୁ ସଂଯୋଗ କରିବା ପାଇଁ ଅବସ୍ଥିତ। “ବରାକ ଉପତ୍ୟକା ଉତ୍ତର-ପୂର୍ବ ପାଇଁ ଏକ ପ୍ରମୁଖ ଲଜିଷ୍ଟିକ୍ସ ଏବଂ ବାଣିଜ୍ୟ କେନ୍ଦ୍ର ହେବାକୁ ଯାଉଛି,” ବୋଲି ଶ୍ରୀ ମୋଦୀ ଉଲ୍ଲେଖ କରିଛନ୍ତି।
ପ୍ରଧାନମନ୍ତ୍ରୀ କହିଛନ୍ତି ଯେ, ବର୍ତ୍ତମାନର ସରକାର ଏହି ଅଞ୍ଚଳକୁ ଭାରତର ଆକ୍ଟ ଇଷ୍ଟ ପଲିସିର କେନ୍ଦ୍ରସ୍ଥଳ ଭାବରେ ଗଢି ତୋଳିବାକୁ ଯାଉଛନ୍ତି। ବର୍ତ୍ତମାନର ପ୍ରଶାସନ ଏହାର ଶିଳ୍ପ ଗୌରବକୁ ପୁନରୁଦ୍ଧାର କରିବା ପାଇଁ କାର୍ଯ୍ୟ କରୁଛି। ପ୍ରଧାନମନ୍ତ୍ରୀ ଉଲ୍ଲେଖ କରିଛନ୍ତି ଯେ, ଆଜି ୨୪,୦୦୦ କୋଟି ଟଙ୍କା ମୂଲ୍ୟର ଶିଲଂ–ସିଲଚର ହାଇସ୍ପିଡ୍ କରିଡରର ଭୂମିପୂଜନ ସମାରୋହ ହେବା ସହ ଏକ ଐତିହାସିକ ମାଇଲଖୁଣ୍ଟ ସୃଷ୍ଟି ହୋଇଛି। ସେ କହିଛନ୍ତି ଯେ, ଏହି ପ୍ରବେଶ ନିୟନ୍ତ୍ରିତ କରିଡର ଉତ୍ତର-ପୂର୍ବ ଅଞ୍ଚଳରେ ଏହି ପ୍ରକାରର ପ୍ରଥମ ଏବଂ ଲୋକଙ୍କ ପାଇଁ ଦଶନ୍ଧି ଧରି ରହିଥିବା ପ୍ରତୀକ୍ଷାର ଅନ୍ତ ଘଟାଇଛି। ଶ୍ରୀ ମୋଦୀ ଉଲ୍ଲେଖ କରିଛନ୍ତି ଯେ, ଏହି କରିଡର ସିଲଚରକୁ ମିଜୋରାମ, ମଣିପୁର ଓ ତ୍ରିପୁରା ସହିତ ସଂଯୋଗ କରିବ ଏବଂ ଏଥି ସହିତ ଶେଷରେ ଦକ୍ଷିଣ-ପୂର୍ବ ଏସିଆର ବିଶାଳ ବଜାର ସହିତ ସଂଯୋଗ କରିବ। ପ୍ରଧାନମନ୍ତ୍ରୀ ସୂଚାଇଛନ୍ତି ଯେ, ଏହି ସଂଯୋଗ ସ୍ଥାନୀୟ ଶିଳ୍ପ, କୃଷି ଓ ପର୍ଯ୍ୟଟନକୁ ଏକ ବିପୁଳ ପ୍ରୋତ୍ସାହନ ପ୍ରଦାନ କରିବ। “ବରାକ ଉପତ୍ୟକା ଏକ ଅତ୍ୟନ୍ତ ଉଜ୍ଜ୍ୱଳ ଭବିଷ୍ୟତ ସହିତ ସଂଯୋଗ ହେବାକୁ ଯାଉଛି,”ବୋଲି ଶ୍ରୀ ମୋଦୀ ଦୃଢ଼ୋକ୍ତି ପ୍ରକାଶ କରିଛନ୍ତି।
ପ୍ରଧାନମନ୍ତ୍ରୀ କହିଛନ୍ତି ଯେ, ନୂତନ ସିଲଚର ଫ୍ଲାଏଓଭର ସହରର ବାସିନ୍ଦାଙ୍କୁ ଦୀର୍ଘ ସମୟ ଧରି ହଇରାଣ କରିଆସୁଥିବା ଟ୍ରାଫିକ ଭିଡ଼ରୁ ଆବଶ୍ୟକୀୟ ମୁକ୍ତି ପ୍ରଦାନ କରିବ। ଏହି ଭିତ୍ତିଭୂମି ସିଲଚର ମେଡିକାଲ କଲେଜ, ଏନଆଇଟି ଓ ଆସାମ ବିଶ୍ୱବିଦ୍ୟାଳୟର ଛାତ୍ରଛାତ୍ରୀମାନଙ୍କ ପାଇଁ ଅତ୍ୟନ୍ତ ଉପକାରୀ ହେବ ଏବଂ ଏଥିସହିତ ସେମାନଙ୍କର ମୂଲ୍ୟବାନ ସମୟ ବଞ୍ଚାଇବ। ଆସାମର ୨,୫୦୦ କିଲୋମିଟରରୁ ଅଧିକ ରେଳ ନେଟୱର୍କର ବିଦ୍ୟୁତୀକରଣ ଦ୍ରୁତ ଯାତ୍ରା ସୁନିଶ୍ଚିତ କରିବ। “ଦ୍ରୁତ-ଗତି, ସ୍ୱଚ୍ଛ ରେଳ ପରିବହନ ବରାକ ଉପତ୍ୟକାର ପରିଷ୍କାର ପରିବେଶକୁ ଯଥେଷ୍ଟ ଲାଭଦାୟକ କରିବ” ବୋଲି ଶ୍ରୀ ମୋଦୀ ଉଲ୍ଲେଖ କରିଛନ୍ତି।
ପ୍ରଧାନମନ୍ତ୍ରୀ କହିଛନ୍ତି ଯେ, ଉପତ୍ୟକାର ଚା’ ବଗିଚା ଶ୍ରମିକ ଓ ଚାଷୀମାନେ ଆସାମର ବିକାଶରେ ବହୁଳ ଅବଦାନ ରଖିଛନ୍ତି। ସେ କହିଛନ୍ତି ଯେ, ପ୍ରଧାନମନ୍ତ୍ରୀ-କିଷାନ ସମ୍ମାନ ନିଧି ଯୋଜନା ଅଧୀନରେ ଏପର୍ଯ୍ୟନ୍ତ ୨୦,୦୦୦ କୋଟି ଟଙ୍କାରୁ ଅଧିକ ଆସାମର ଚାଷୀମାନଙ୍କୁ ହସ୍ତାନ୍ତର କରାଯାଇଛି। ଶ୍ରୀ ମୋଦୀ ଆହୁରି ଉଲ୍ଲେଖ କରିଛନ୍ତି ଯେ, ଗତକାଲି, ବରାକ ଉପତ୍ୟକାର ହଜାର ହଜାର ଚାଷୀ ମଧ୍ୟ ସେମାନଙ୍କ ବ୍ୟାଙ୍କ ଆକାଉଣ୍ଟରେ ଟଙ୍କା ପାଇଛନ୍ତି। ଏହି ସହାୟତା ଚାଷୀମାନଙ୍କୁ କୃଷି ସମ୍ବନ୍ଧୀୟ ସେମାନଙ୍କର ଛୋଟ କିନ୍ତୁ ଗୁରୁତ୍ୱପୂର୍ଣ୍ଣ ଆବଶ୍ୟକତା ପୂରଣ କରିବାରେ ସାହାଯ୍ୟ କରୁଛି। ପଥରକାଣ୍ଡିରେ ଏହି ଅଞ୍ଚଳର ପ୍ରଥମ କୃଷି କଲେଜ ପ୍ରତିଷ୍ଠା ଉପତ୍ୟକାକୁ କୃଷି ଗବେଷଣାର ଏକ କେନ୍ଦ୍ରରେ ପରିଣତ କରିବ। ପ୍ରଧାନମନ୍ତ୍ରୀ ସୂଚାଇଛନ୍ତି ଯେ, ଏହି ପ୍ରତିଷ୍ଠାନ ସ୍ଥାନୀୟ ଯୁବକମାନଙ୍କୁ ସଫଳ କୃଷି-ଷ୍ଟାର୍ଟଅପ୍ ଆରମ୍ଭ କରିବା ପାଇଁ ଆବଶ୍ୟକୀୟ ସହାୟତା ଯୋଗାଇବ। “ବାରକ ଉପତ୍ୟକା ଏବେ କୃଷି ଅଧ୍ୟୟନ ଓ ଗବେଷଣା ପାଇଁ ଜଣାଶୁଣା ହେବ,” ବୋଲି ଶ୍ରୀ ମୋଦୀ କହିଛନ୍ତି।
ଶ୍ରୀ ମୋଦୀ କହିଛନ୍ତି ଯେ, ବର୍ତ୍ତମାନ ସରକାରର ମନ୍ତ୍ର ହେଉଛି ଉନ୍ନୟନର ଦୌଡ଼ରେ ପଛରେ ପଡ଼ିଯାଇଥିବା ଲୋକମାନଙ୍କୁ ପ୍ରଥମେ ପ୍ରାଥମିକତା ଦେବା। ପ୍ରଧାନମନ୍ତ୍ରୀ ଉଲ୍ଲେଖ କରିଛନ୍ତି ଯେ, ପୂର୍ବରୁ ସୀମାନ୍ତ ଗ୍ରାମଗୁଡ଼ିକୁ “ଶେଷ” ଗ୍ରାମ ଭାବରେ ବିବେଚନା କରାଯାଉଥିଲା, କିନ୍ତୁ ତାଙ୍କ ସରକାର ସେଗୁଡ଼ିକୁ ଦେଶର “ପ୍ରଥମ” ଗ୍ରାମ ଭାବରେ ବିବେଚନା କରୁଛି। କଛାର ଜିଲ୍ଲାରୁ ବିସ୍ତାର ଲାଭ କରିଥିବା ଭାଇବ୍ରାଣ୍ଟ ଗ୍ରାମ କାର୍ଯ୍ୟକ୍ରମ ପୂର୍ବରୁ ସୀମାନ୍ତ ବସ୍ତିରେ ଦୃଷ୍ଟାନ୍ତମୂଳକ ଉନ୍ନତି ଆଣୁଛି। ପ୍ରଧାନମନ୍ତ୍ରୀ ସୂଚାଇଛନ୍ତି ଯେ, ଏହି ଅଞ୍ଚଳଗୁଡ଼ିକର ଐତିହାସିକ ଅବହେଳାକୁ ଏବେ ସକ୍ରିୟ ଉନ୍ନୟନ ଓ କୌଶଳଗତ ଧ୍ୟାନରେ ପରିବର୍ତ୍ତନ କରାଯାଉଛି। “ଆମେ ସୀମାନ୍ତ ଗ୍ରାମଗୁଡ଼ିକୁ ଦେଶର ପ୍ରଥମ ଗ୍ରାମ ଭାବରେ ବିବେଚନା କରୁ” ବୋଲି ପ୍ରଧାନମନ୍ତ୍ରୀ ଦୃଢ଼ୋକ୍ତି ପ୍ରକାଶ କରିଛନ୍ତି।
ପ୍ରଧାନମନ୍ତ୍ରୀ କହିଛନ୍ତି ଯେ, ଆସାମ ସରକାର ହଜାର ହଜାର ଚା’ ବଗିଚା ପରିବାରକୁ ଭୂମି ଅଧିକାର ପ୍ରଦାନ କରି ଏକ ଐତିହାସିକ କର୍ତ୍ତବ୍ୟ ପାଳନ କରିଛି। ଏହି ଭୂମି ଅଧିକାର ପ୍ରଦାନ ଦୁଇ ଶତାବ୍ଦୀ ଧରି ସେବା କରିଥିବା ପିଢ଼ିଙ୍କ ଭବିଷ୍ୟତକୁ ପରିବର୍ତ୍ତନ କରିବା ଦିଗରେ ଏକ ପ୍ରମୁଖ ପଦକ୍ଷେପ ବୋଲି ଉଲ୍ଲେଖ କରି ଶ୍ରୀ ମୋଦୀ କହିଛନ୍ତି ଯେ, ଏହି ଆଇନଗତ ସୁରକ୍ଷା ମର୍ଯ୍ୟାଦାର ଜୀବନ ସୁନିଶ୍ଚିତ କରେ। “ଏହି ଜମି ଅଧିକାର ଦ୍ୱାରା ପରିବାରଗୁଡ଼ିକ ଏବେ ସ୍ଥାୟୀ ଘର, ବିଦ୍ୟୁତ ଓ ପାଣି ଭଳି କେନ୍ଦ୍ରୀୟ ଯୋଜନାର ଲାଭ ପାଇପାରିବେ,” ବୋଲି ପ୍ରଧାନମନ୍ତ୍ରୀ କହିଛନ୍ତି।
ପ୍ରଧାନମନ୍ତ୍ରୀ କହିଛନ୍ତି ଯେ, ସରକାର ବିଶେଷ କରି ଚା’ ବଗିଚାରେ ରହୁଥିବା ଯୁବକମାନଙ୍କ ପାଇଁ ସ୍କୁଲ, ଛାତ୍ରବୃତ୍ତି ଏବଂ ଚାକିରି ସୁଯୋଗ ପ୍ରଦାନ କରିବା ଉପରେ ମଧ୍ୟ ଧ୍ୟାନ ଦେଇଛନ୍ତି। ପୂର୍ବରୁ ଅବହେଳିତ ଶ୍ରମିକଙ୍କ ପିଲାମାନଙ୍କ ପାଇଁ ଏହି ପ୍ରୟାସଗୁଡ଼ିକ ବର୍ତ୍ତମାନ ଏକ ସୁବର୍ଣ୍ଣ ଭବିଷ୍ୟତର ଦ୍ୱାର ଖୋଲି ଦେଉଛି। ଶିକ୍ଷା, ଦକ୍ଷତା ବିକାଶ ଏବଂ ସ୍ୱାସ୍ଥ୍ୟ ବର୍ତ୍ତମାନ ସରକାରଙ୍କ ଆଞ୍ଚଳିକ ରଣନୀତିର ପ୍ରାଥମିକ ସ୍ତମ୍ଭ ପାଲଟିଛି। ପ୍ରଧାନମନ୍ତ୍ରୀ ସୂଚାଇଛନ୍ତି ଯେ, ଆସାମ ଦ୍ରୁତ ଗତିରେ ଏକ ସ୍ୱାସ୍ଥ୍ୟ କେନ୍ଦ୍ର ଭାବରେ ଉଭା ହେଉଛି, ଏମ୍ସ ଓ କର୍କଟ ହସ୍ପିଟାଲଗୁଡ଼ିକ ଏବେ ଏକ ଦୃଢ଼ ନେଟୱର୍କ ଗଠନ କରୁଛନ୍ତି। “ଚା ବଗିଚାରେ ରହୁଥିବା ଯୁବକମାନଙ୍କ ପାଇଁ ଏକ ସୁବର୍ଣ୍ଣ ଭବିଷ୍ୟତର ଦ୍ୱାର ଖୋଲିଯାଉଛି,” ବୋଲି ଶ୍ରୀ ମୋଦୀ ଉଲ୍ଲେଖ କରିଛନ୍ତି।
ପ୍ରଧାନମନ୍ତ୍ରୀ କହିଛନ୍ତି ଯେ, ଆସାମର ଯୁବପିଢ଼ିଙ୍କ ପାଖରେ ବର୍ତ୍ତମାନ ସେମିକଣ୍ଡକ୍ଟର ଓ ଟେକ୍ନୋଲୋଜୀ କ୍ଷେତ୍ରରେ ସୁଯୋଗର ଏକ ଖୋଲା ଆକାଶ ରହିଛି। ଶାନ୍ତି ଓ ପ୍ରଗତି ପାଇଁ ଏହି ଯୁଗ ବଡ଼ ବଡ଼ ବଳିଦାନ ଦ୍ୱାରା ସମ୍ଭବ ହୋଇଛି ଏବଂ ଏହାକୁ ପ୍ରତିକୂଳ ଶକ୍ତିଠାରୁ ସୁରକ୍ଷିତ ରଖିବାକୁ ପଡିବ। ପ୍ରଧାନମନ୍ତ୍ରୀ ସୂଚାଇଛନ୍ତି ଯେ, ରାଜ୍ୟକୁ ପୁରୁଣା ସମସ୍ୟାମୟ ଅବସ୍ଥାକୁ ଫେରାଇ ନେବାକୁ ଚେଷ୍ଟା କରୁଥିବା ଯେକୌଣସି ଶକ୍ତିକୁ ଉପଯୁକ୍ତ ଜବାବ ଦିଆଯିବା ଆବଶ୍ୟକ। “ଆସାମ ଏବେ ଭାରତର ସେମିକଣ୍ଡକ୍ଟର କ୍ଷେତ୍ରର ଏକ ଗୁରୁତ୍ୱପୂର୍ଣ୍ଣ ଅଂଶ ହୋଇପଡୁଛି। ପରବର୍ତ୍ତୀ ପିଢ଼ିର ପ୍ରଯୁକ୍ତିବିଦ୍ୟା ସହିତ ଜଡିତ ଇକୋସିଷ୍ଟମ ଏବଂ ପ୍ରତିଭା ଏଠାରେ ପ୍ରସ୍ତୁତ ହେଉଛି,” ବୋଲି ଶ୍ରୀ ମୋଦୀ ଦୃଢ଼ୋକ୍ତି ପ୍ରକାଶ କରିଛନ୍ତି।
ପ୍ରଧାନମନ୍ତ୍ରୀ କହିଛନ୍ତି ଯେ, ବିଶ୍ୱ ସଙ୍କଟ ଓ ଯୁଦ୍ଧ ସମୟରେ, ବର୍ତ୍ତମାନର ସରକାର ଭାରତୀୟ ନାଗରିକଙ୍କ ଉପରେ ପ୍ରଭାବକୁ କମ କରିବା ପାଇଁ ପୂର୍ଣ୍ଣ ଶକ୍ତି ସହିତ କାର୍ଯ୍ୟ କରୁଛି। ପ୍ରଗତି ପଥରେ ଏହି ଅଞ୍ଚଳର ଯାତ୍ରା ଏବେ ଅଟଳ, ଏହାର ସମୃଦ୍ଧ ଭାଷା ଓ ସଂସ୍କୃତି ଦ୍ୱାରା ସମର୍ଥିତ। ଆଜି ଉଦ୍ଘାଟିତ ବିକାଶ ପ୍ରକଳ୍ପଗୁଡ଼ିକ ଉପତ୍ୟକା ପାଇଁ ଏକ ନୂତନ ଯୁଗର ଆରମ୍ଭ। ପ୍ରଧାନମନ୍ତ୍ରୀ କହିଛନ୍ତି ଯେ, ଲୋକଙ୍କ ସାମୂହିକ ସଂକଳ୍ପ ସମଗ୍ର ରାଜ୍ୟ ପାଇଁ ଏକ ଉଜ୍ଜ୍ୱଳ ଓ ସମୃଦ୍ଧ ଭବିଷ୍ୟତ ସୁନିଶ୍ଚିତ କରିବ। ଶେଷରେ ଶ୍ରୀ ମୋଦୀ କହିଛନ୍ତି ଯେ, “ସେହି ଦିନ ଆଉ ଦୂରରେ ନାହିଁ ଯେତେବେଳେ ବରାକ ଉପତ୍ୟକା ବିକାଶର ଏକ ନୂତନ କେନ୍ଦ୍ର ଭାବରେ ମାନ୍ୟତା ପାଇବ।”