ଭୁବନେଶ୍ଵର: ଆଜି ରାଜ୍ୟସଭା ନିର୍ବାଚନରେ ଓଡିଶା ବିଧାନସଭାର ୪ ଟି ଆସନ ପାଇଁ ଭୋଟ ଗ୍ରହଣ ଜାରି ରହିଛି। ଏହି ୪ ଟି ଆସନ ମଧ୍ୟରୁ ୨ ଟି ଆସନ ବିଜେପି ହାତକୁ ଯିବାର ସମ୍ଭାବନା ଥିବା ବେଳେ ଗୋଟିଏ ଆସନ ବିଜେଡ଼ି ହାତକୁ ଯାଇପାରେ। କିନ୍ତୁ ଚତୁର୍ଥ ଆସନ ପାଇଁ ବିଜେଡ଼ି-କଂଗ୍ରେସ ମିଳିତ ପ୍ରାର୍ଥୀ ଡାକ୍ତର ଦତ୍ତେଶ୍ଵର ହୋତାଙ୍କ ସହ ସ୍ଵାଧୀନ ପ୍ରାର୍ଥୀ ଦିଲ୍ଲୀପ ରାୟଙ୍କ ମଧ୍ୟରେ କଡା ଟକ୍କର ହେଉଛି।
ତେବେ ଭୋଟ ଗ୍ରହଣ ସମୟରେ ଏକ ରୋଚକ ଦୃଶ୍ୟ ଦେଖିବାକୁ ମିଳିଛି। ବ୍ରହ୍ମଗିରି ବିଧାୟିକା ଉପାସନା ମହାପାତ୍ରଙ୍କ ଭୋଟକୁ ନେଇ ବିରୋଧ କରାଯାଇଛି। ଉଭୟ କଂଗ୍ରେସ ଏବଂ ବିଜେଡ଼ି ଦଳ ଉପାସନା ମହାପାତ୍ରଙ୍କ ଭୋଟକୁ ବିରୋଧ କରିଛନ୍ତି। ଉପାସନାଙ୍କ ପ୍ରଥମ ବାଲାଟ ପେପରରେ ଓଭର ରାଇଟିଙ୍ଗ ଯୋଗୁଁ ଦ୍ଵିତୀୟ ବାଲାଟ ପେପରରେ ଭୋଟ ପାଇଁ ବିରୋଧ ହୋଇଛି। ଯାହାଫଳରେ କିଛି ସମୟ ପାଇଁ ଭୋଟ ଗ୍ରହଣ ସ୍ଥଗିତ ରହିଥିଲା।