ଚିଲିକା: ଚ଼ିଲିକା ନିର୍ବାଚନ ମଣ୍ଡଳୀ ବାଣପୁର ଅନ୍ତର୍ଗତ ବିଧାରପୁର ସ୍ଥିତ ଶୁଭ ମଙ୍ଗଳ କଲ୍ୟାଣ ମଣ୍ଡପ ଠାରେ ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚ଼ନ୍ଦନଙ୍କୁ ବାଣପୁର ବରିଷ୍ଠ ନାଗରିକ ସଂଘ ପକ୍ଷରୁ ଅଞ୍ଚଳର ସାମଗ୍ରିକ ବିକାଶ ସମ୍ପର୍କିତ ବିଭିନ୍ନ ଦାବି ଓ ସମସ୍ୟାଗୁଡ଼ିକୁ ଅବଗତ କରିଛନ୍ତି। ବିଭିନ୍ନ ଦାବି ଓ ସମସ୍ୟାଗୁଡ଼ିକୁ ମାନ୍ୟବର ମନ୍ତ୍ରୀ ଆଲୋଚନା କରିବା ସହ ତାହାର ଶୀଘ୍ର ସମାଧାନ ପାଇଁ ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ ପ୍ରତିଶ୍ରୁତି ଦେଇଛନ୍ତି।
ବାଣପୁରକୁ ରାଜସ୍ୱ ଉପଖଣ୍ଡ ମାନ୍ୟତା ପ୍ରଦାନ ନିମନ୍ତେ ମାନ୍ୟବର ମୁଖ୍ୟମନ୍ତ୍ରୀ ଓ ରାଜସ୍ୱ ବିଭାଗର ମନ୍ତ୍ରୀଙ୍କ ସହ ପ୍ରାଥମିକତାର ସହ ଆଲୋଚନା ଜାରି ରହିଛି। ଦୃଢ଼ ନିଶ୍ଚିତ ରୁହନ୍ତୁ,ଆମ ଅଞ୍ଚଳକୁ ନିଶ୍ଚିତ ଭାବେ ରାଜସ୍ୱ ଉପଖଣ୍ଡ ମାନ୍ୟତା ପ୍ରଦାନ କରାଯିବ।
ନୂତନ ବାଣପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ଗୃହ ନିର୍ମାଣ ସମ୍ପୂର୍ଣ୍ଣ ହୋଇଥିଲେ ସୁଦ୍ଧା, ପାରିପାର୍ଶ୍ୱିକ ଉନ୍ନତି, ରାସ୍ତାର ଆଲୋକୀକରଣ ଓ ଅନ୍ୟାନ୍ୟ ଆବଶ୍ୟକ ସୁବ୍ୟବସ୍ଥା ସୁନିଶ୍ଚିତ କରିବା ପରେ ଏହାକୁ ସ୍ଥାନାନ୍ତର କରାଯିବ। ତତସହିତ, ପୁରୁଣା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଅର୍ବାନ ଉପ ସ୍ୱାସ୍ଥ୍ୟ କେନ୍ଦ୍ରରେ ପରିଣତ କରିବା ପାଇଁ ସ୍ୱାସ୍ଥ୍ୟ ବିଭାଗକୁ ସହ ଆଲୋଚନା କରିଛନ୍ତି।
ଆମ ଅଞ୍ଚଳର ଗୌରବ ଐତିହାସିକ ପଲଟଣ ପଡ଼ିଆର ସାମଗ୍ରିକ ବିକାଶ, ସୌନ୍ଦର୍ଯ୍ୟକରଣ ଏବଂ ପାଇକ ବିଦ୍ରୋହର ଐତିହ୍ୟକୁ ପୁନର୍ଜୀବିତ କରିବା ପାଇଁ ମୋଟ ୩ କୋଟି ଟଙ୍କାର ବ୍ୟୟବରାଦ କରାଯାଇଛି,ଖୁବଶୀଘ୍ର କାର୍ଯ୍ୟାରମ୍ଭ ହେବ।
ତତ୍ ସହିତ ଆମ ଅଞ୍ଚଳର ସବୁ ଗାଁ କୁ ରାସ୍ତା ଓ ପର୍ଯ୍ୟଟନର ବିକାଶ ପାଇଁ ସଦା ପ୍ରାଥମିକତା ଦେଉଛି। ସୁନାଖଳାରୁ-ଆୟତପୁର ପର୍ଯ୍ୟନ୍ତ ରାସ୍ତା ପ୍ରଶସ୍ତିକରଣ କାର୍ଯ୍ୟ ଚାଲିଛି ଏବଂ ଆୟତପୁର ଛକରୁ ଧୂଆଁନଳୀ ପର୍ଯ୍ୟନ୍ତ ରାସ୍ତାର ପ୍ରଶସ୍ତିକରଣ ଓ ନବୀକରଣ କାର୍ଯ୍ୟ ଶୀଘ୍ର ଆରମ୍ଭ ହେବ।ଏହା ସହିତ ଜାତୀୟ ରାଜପଥକୁ ଓ ମୁଖ୍ୟ ସଡ଼କକୁ ସଂଯୋଗକରୁଥିବା ସବୁ ଗାଁର ରାସ୍ତା ନିର୍ମାଣ ପ୍ରାଥମିକ ଭିତ୍ତିରେ ଆରମ୍ଭ କରାଯାଇଛି ବୋଲି ମାନ୍ୟବର ମନ୍ତ୍ରୀ ଶ୍ରୀ ହରିଚନ୍ଦନ ମତବ୍ୟକ୍ତ କରିଛନ୍ତି।
ଦଳ-ମତ ନିର୍ବିଶେଷରେ ଚ଼ିଲିକା ନିର୍ବାଚନ ମଣ୍ଡଳୀର ସାମଗ୍ରିକ ବିକାଶ ପାଇଁ କୌଣସି ଦାବିପତ୍ରର ଆବଶ୍ୟକତା ନାହିଁ। ଚିଲିକାର ସେବକ ଭାବେ ଏହା ମୋର କର୍ତ୍ତବ୍ୟ।ଚ଼ିଲିକା ନିର୍ବାଚନ ମଣ୍ଡଳୀର ସମସ୍ତ ଅଞ୍ଚଳରେ ଦୈନନ୍ଦିନ ଯାତାୟାତରେ କୌଣସି ଅସୁବିଧା ନ ହେଉ,ଏହା ପାଇଁ ମୋର ଆପ୍ରାଣ ଉଦ୍ୟମ ଜାରି ରହିଛି ଓ ଆଗକୁ ମଧ୍ୟ ଜାରି ରହିବ ବୋଲି ମାନ୍ୟବର ମନ୍ତ୍ରୀ ଶ୍ରୀ ହରିଚନ୍ଦନ ମତବ୍ୟକ୍ତ କରିଛନ୍ତି।
ଆଜିର ଏହି ଆଲୋଚନା ଅବସରରେ ଭାଟପଡ଼ା ଗଡ଼ର ରାଜାସାହେବ ମାନବେନ୍ଦ୍ର ମହାରଥା ଦଳବେହେରା, ବାଣପୁର ବିଜ୍ଞାପିତ ଅଞ୍ଚଳ ପରିଷଦର ଅଧ୍ୟକ୍ଷ ମିଟୁ ନାୟକ, ବାଣପୁର ବରିଷ୍ଠ ନାଗରିକ ମଞ୍ଚର ସଭାପତି ଡ଼ଃ ଚିନ୍ତାମଣି ମିଶ୍ର ଓ ପରାମର୍ଶଦାତା ପ୍ରଫେସର ନଳିନୀକାନ୍ତ ପଟ୍ଟନାୟକଙ୍କ ସମେତ ବରିଷ୍ଠ ନାଗରିକ ସଂଘର କର୍ମକର୍ତ୍ତା ବୃନ୍ଦ ଉପସ୍ଥିତ ଥିଲେ।