ଭୁବନେଶ୍ୱର: ପୂର୍ବତଟ ରେଳପଥ, ଓଡ଼ିଶା ସରକାରଙ୍କ ସହିତ ଘନିଷ୍ଠ ସମନ୍ୱୟରେ, ଦକ୍ଷିଣ ଏବଂ ପଶ୍ଚିମ ଓଡ଼ିଶାରେ ଚାରୋଟି ପ୍ରମୁଖ ନୂତନ ରେଳ ଲାଇନ ପ୍ରକଳ୍ପରେ ତ୍ୱରାନ୍ୱିତ ଅଗ୍ରଗତି କରୁଛି। ମୋଟ ୬,୮୭୯ କୋଟିରୁ ଅଧିକ ଟଙ୍କାର ମିଳିତ ନିବେଶ ଏବଂ ୩୮୨ ରୁଟ୍ କିଲୋମିଟର ଲମ୍ବ ସହିତ, ଏହି ପ୍ରକଳ୍ପଗୁଡ଼ିକ ରାଜ୍ୟର ଦୁର୍ଗମଓ ଆଦିବାସୀ ଅଧ୍ୟୁଷିତ ଅଞ୍ଚଳରେ ସଂଯୋଗୀକରଣକୁ ଉଲ୍ଲେଖନୀୟ ଭାବରେ ଉନ୍ନତ କରିବା ଲକ୍ଷ୍ୟ ରଖିଛି।
ଏହି ପ୍ରକଳ୍ପଗୁଡ଼ିକୁ ଦ୍ରୁତ ଗତିରେ ପରିଚାଳନା କରିବା ଦିଗରେ ଏକ ପ୍ରମୁଖ ପଦକ୍ଷେପ ସ୍ୱରୂପ, ପୂର୍ବତଟ ରେଳପଥ ଏବଂ ଓଡ଼ିଶା ସରକାରଙ୍କ ମଧ୍ୟରେ ଏପ୍ରିଲ ୧୬, ୨୦୨୬ରେ ଏକ ବୁଝାମଣାପତ୍ର (ଏମଓୟୁ) ସ୍ୱାକ୍ଷରିତ ହୋଇଥିଲା। ଏହି ବୁଝାମଣାପତ୍ର ଜମି ଅଧିଗ୍ରହଣକୁ ତ୍ୱରାନ୍ୱିତ କରିବା, ସମୟସୀମା ମଧ୍ୟରେ ମଞ୍ଜୁରୀ ସୁନିଶ୍ଚିତ କରିବା ଏବଂ ମିଳିତ ତଦାରଖ ମାଧ୍ୟମରେ କ୍ଷେତ୍ରସ୍ତରୀୟ ସମସ୍ୟାର ସମାଧାନ କରିବା ପାଇଁ ଏକ ସଂରଚିତ ସମନ୍ୱୟ ବ୍ୟବସ୍ଥା ପ୍ରଦାନ କରେ। ଏହି ରାଜିନାମା ପ୍ରକଳ୍ପ କାର୍ଯ୍ୟକାରିତାରେ ଅଧିକ ଗତି, ଉତ୍ତରଦାୟିତ୍ୱ ଏବଂ ସମନ୍ୱୟ ଆଣିବାରେ ସହାୟକ ହେଉଛି।
ଜମି ଅଧିଗ୍ରହଣ, ଜଙ୍ଗଲ ମଞ୍ଜୁରୀ, ଟେଣ୍ଡରିଂ ଏବଂ ନିର୍ମାଣ କାର୍ଯ୍ୟ ମିଶନ ମୋଡରେ ଅଗ୍ରଗତି କରୁଛି। ‘ସ୍ୱତନ୍ତ୍ର ରେଳ ପ୍ରକଳ୍ପ’ ମାନ୍ୟତା ପ୍ରଦାନ ଏକ ପ୍ରମୁଖ ତ୍ୱରାନ୍ୱିତକାରୀ କାର୍ଯ୍ୟ ହୋଇଛି, ଯାହା ପ୍ରାଥମିକତାପ୍ରାପ୍ତ ପ୍ରଶାସନିକ ସହାୟତା ମାଧ୍ୟମରେ ଭୂମି ଅଧିଗ୍ରହଣ ଏବଂ ବୈଧାନିକ ପ୍ରକ୍ରିୟାଗୁଡ଼ିକୁ ଉଲ୍ଲେଖନୀୟ ଭାବରେ ତ୍ୱରାନ୍ୱିତ କରୁଛି।
ଜୟପୁର –ମାଲକାନଗିରି ନୂତନ ରେଳ ଲାଇନ ପ୍ରକଳ୍ପ (୧୨୬ କିଲୋମିଟର)
ରେଳବାଇ ଦ୍ୱାରା ୭୫% ଏବଂ ଓଡ଼ିଶା ସରକାରଙ୍କ ଦ୍ୱାରା ୨୫% ପାଣ୍ଠି ସହିତ ₹୨,୩୪୩.୬୪ କୋଟିରେ ମଞ୍ଜୁର ହୋଇଥିବା ଏହି ପ୍ରକଳ୍ପଟି ଜମି ଅଧିଗ୍ରହଣ ଏବଂ ଜଙ୍ଗଲ ମଞ୍ଜୁରୀ କ୍ଷେତ୍ରରେ ପ୍ରମୁଖ ସଫଳତା ହାସଲ କରିଛି, ନିର୍ମାଣ କାର୍ଯ୍ୟ ପାଇଁ ଟେଣ୍ଡର ମଧ୍ୟ ଆହ୍ୱାନ ହୋଇସାରିଛି।
ମାଲକାନଗିରିର ଆଦିବାସୀ ଜନସାଧାରଣ ପାଇଁ, ଏହି ରେଳ ଲାଇନ ପରିବର୍ତ୍ତନକାରୀ ହେବ । ଏହା ଦ୍ୱାରା ବଜାର, ଶିକ୍ଷା ଏବଂ ଚିକିତ୍ସା ଭଳି ସେବା ଗୁଡିକ ସହଜରେ ପହଞ୍ଚିବ ଏବଂ ଦୀର୍ଘ ଏବଂ କଷ୍ଟକର ସଡ଼କ ଯାତ୍ରା ଉପରେ ନିର୍ଭରଶୀଳତା ହ୍ରାସ ପାଇବ।
ଜୟପୁର-ନବରଙ୍ଗପୁର ନୂତନ ରେଳପଥ ପ୍ରକଳ୍ପ (୪୪.୧୪ କିଲୋମିଟର)
୭୪୭.୯୧ କୋଟି ମୂଲ୍ୟର ଏହି ପ୍ରକଳ୍ପରେ ଓଡ଼ିଶା ସରକାର ଜମି ଖର୍ଚ୍ଚ ସହିତ ନିର୍ମାଣ ଖର୍ଚ୍ଚର ୫୦% ବହନ କରୁଥିବା ବେଳେ ଅବଶିଷ୍ଟ ୫୦% ଖର୍ଚ୍ଚ ରେଳବାଇ ପକ୍ଷରୁ ଯୋଗାଣ କରାଯାଉଛି।ପ୍ରମୁଖ ସେତୁ କାର୍ଯ୍ୟ ସମେତ ମୁଖ୍ୟ ଅଂଶ ଗୁଡ଼ିକରେ ନିର୍ମାଣ କାର୍ଯ୍ୟ ଆରମ୍ଭ ହୋଇସାରିଛି।
ଏହା ନବରଙ୍ଗପୁରକୁ ପ୍ରଥମ ଥର ପାଇଁ ରେଳ ସଂଯୋଗ ପ୍ରଦାନ କରିବ, ଯାହା ଆର୍ଥିକ ସୁଯୋଗକୁ ବଢ଼ାଇବ ଏବଂ ଏହାର ଆଦିବାସୀ ବହୁଳ ଜନସଂଖ୍ୟା ପାଇଁ ଯାତାୟାତକୁ ସହଜ କରିବ।
ବରଗଡ଼-ନୂଆପଡ଼ା ନୂତନ ରେଳପଥ ପ୍ରକଳ୍ପ (୧୩୮.୩୨ କିଲୋମିଟର)
୨,୩୪୩.୬୪ କୋଟି ମୂଲ୍ୟରେ ମଞ୍ଜୁର ହୋଇଥିବା ଏହି ପ୍ରକଳ୍ପରେ ୭୫% ପାଣ୍ଠି ରେଳବାଇ ଓ ୨୫% ଓଡ଼ିଶା ସରକାର ଯୋଗାଇଛନ୍ତି। ଏହି ପ୍ରକଳ୍ପଟି ଜମି ଅଧିଗ୍ରହଣ ଏବଂ ଜଙ୍ଗଲ ମଞ୍ଜୁରୀ କ୍ଷେତ୍ରରେ ପ୍ରମୁଖ ସଫଳତା ହାସଲ କରିଛି, ନିର୍ମାଣ କାର୍ଯ୍ୟ ପାଇଁ ଟେଣ୍ଡର ଆମନ୍ତ୍ରିତ ହୋଇସାରିଛି।
ବରଗଡ଼ ଜିଲ୍ଲାରେ ଘରୋଇ ଜମି ଅଧିଗ୍ରହଣ ପାଇଁ, ସମସ୍ତ ୭୯ ଟି ଗ୍ରାମ ପାଇଁ ଜମି ଅଧିଗ୍ରହଣ ପ୍ରକ୍ରିୟା ଆରମ୍ଭ କରିବା ଲାଗି 20A ଗେଜେଟ୍ ବିଜ୍ଞପ୍ତି ପ୍ରକାଶ କରାଯାଇଥିଲା। ପରବର୍ତ୍ତୀ ସମୟରେ, 20E ଗେଜେଟ୍ ବିଜ୍ଞପ୍ତି ଜାରି କରାଯାଇଛି, ଏବଂ ୬ ଟି ଗ୍ରାମ ପାଇଁ ଜମି ଅଧିଗ୍ରହଣ ପ୍ରକ୍ରିୟା ନିର୍ଣ୍ଣାୟକ ପର୍ଯ୍ୟାୟରେ ପହଞ୍ଚିଛି। ସେହିପରି, ନୂଆପଡା ଜିଲ୍ଲାରେ, ସମସ୍ତ 6 ଟି ଗ୍ରାମ ପାଇଁ ଜମି ଅଧିଗ୍ରହଣ ପ୍ରକ୍ରିୟା ଆରମ୍ଭ କରିବା ପାଇଁ 20A ଗେଜେଟ୍ ବିଜ୍ଞପ୍ତି ପ୍ରକାଶ ପାଇଥିଲା।
ଏହି ମାଇଲଖୁଣ୍ଟଗୁଡ଼ିକ ଜମି ସୁନିଶ୍ଚିତ କରିବାରେ ଉଲ୍ଲେଖନୀୟ ପ୍ରଗତିକୁ ପ୍ରଦର୍ଶନ କରୁଛି,ଯାହା ନିର୍ମାଣ କାର୍ଯ୍ୟକୁ ଦ୍ରୁତ ଭାବେ ଆଗେଇ ନେବାକୁ ସହାୟକ ହେବ।
ସ୍ୱତନ୍ତ୍ର ରେଳ ପ୍ରକଳ୍ପର ମାନ୍ୟତା ଜମି ଅଧିଗ୍ରହଣକୁ ଆହୁରି ତ୍ୱରାନ୍ୱିତ କରୁଛି। ନୂଆପଡାର ଆଦିବାସୀ ସମ୍ପ୍ରଦାୟ ପାଇଁ, ଏହି ଲାଇନ ନିଯୁକ୍ତି, ବଜାର ଏବଂ ଅତ୍ୟାବଶ୍ୟକ ସେବା ଉପଲବ୍ଧ କରାଇବ, ଯାହା ଓଡ଼ିଶାର ଅନ୍ୟତମ ଅନୁନ୍ନତ ଅଞ୍ଚଳରେ ସମାବେଶୀ ବିକାଶକୁ ପ୍ରୋତ୍ସାହିତ କରିବ।
ଗୁଣୁପୁର-ଥେରୁଭାଲି ନୂତନ ଲାଇନ ପ୍ରକଳ୍ପ (୭୩.୬୨ କିଲୋମିଟର)
₹1,165.89 କୋଟି ଟଙ୍କାର ଅନୁମୋଦିତ ମୂଲ୍ୟ ସହିତ, ଏହି ପ୍ରକଳ୍ପରେ ଜମି ଅଧିଗ୍ରହଣ ଏବଂ ଟେଣ୍ଡର ପ୍ରକ୍ରିୟାରେ ଏକକାଳୀନ ପ୍ରଗତି ଦେଖାଯାଉଛି। ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ସ୍ୱରୂପ, 20E ଗେଜେଟ୍ ବିଜ୍ଞପ୍ତି ପ୍ରକାଶିତ ହୋଇଛି, ଯାହା ସମସ୍ତ ୫୧ଟି ଗ୍ରାମ ପାଇଁ ଜମି ଅଧିଗ୍ରହଣ ପ୍ରକ୍ରିୟା ନିର୍ଣ୍ଣାୟକ ପର୍ଯ୍ୟାୟରେ ପହଂଚିଛି , ଯାହାଦ୍ୱାରା ନିର୍ମାଣ ପାଇଁ ଜମିର ଉପଲବ୍ଧତା ଯଥେଷ୍ଟ ବୃଦ୍ଧି ପାଇଛି।
ଏହି ଲାଇନ ରାୟଗଡା ଜିଲ୍ଲାରେ ସଂଯୋଗୀକରଣକୁ ବୃଦ୍ଧି କରିବ, ଆଦିବାସୀ ସମ୍ପ୍ରଦାୟକୁ ଉତ୍ତମ ସ୍ୱାସ୍ଥ୍ୟସେବା, ଶିକ୍ଷା ଏବଂ ଜୀବିକା ନିର୍ବାହର ସୁଯୋଗ ପାଇବାକୁ ସକ୍ଷମ କରିବ ଏହା ସହିତ ସ୍ଥାନୀୟ ନିଯୁକ୍ତିକୁ ମଧ୍ୟ ସମର୍ଥନ କରିବ।
ଓଡିଶା ପାଇଁ ଏକ ପରିବର୍ତ୍ତନଶୀଳ ପ୍ରଭାବ
ଏହି ଚାରୋଟି ପ୍ରକଳ୍ପ ମିଳିତ ଭାବେ ପୂର୍ବରୁ ରେଳ ସେବାରୁ ବଞ୍ଚିତ ଜିଲ୍ଲାଗୁଡ଼ିକୁ ସଂଯୋଗ କରିବ, ଯାହା ଦ୍ୱାରା ୩୦ ଲକ୍ଷରୁ ଅଧିକ ଲୋକ ଉପକୃତ ହେବେ, ସେମାନଙ୍କ ମଧ୍ୟରୁ ଅଧିକାଂଶ ଆଦିବାସୀ ଏବଂ ଅବହେଳିତ ସମ୍ପ୍ରଦାୟର। ଉନ୍ନତ ରେଳ ସଂଯୋଗୀକରଣ ଚାଷୀମାନଙ୍କୁ ବ୍ୟାପକ ବଜାର, ଛାତ୍ରଛାତ୍ରୀମାନଙ୍କୁ ଶିକ୍ଷାନୁଷ୍ଠାନ ଏବଂ ରୋଗୀମାନଙ୍କୁ ଉତ୍ତମ ସ୍ୱାସ୍ଥ୍ୟସେବା ପାଇଁ ଯାତ୍ରା କରିବାକୁ ସକ୍ଷମ କରିବ। ଏହାଦ୍ୱାରା ପୁଞ୍ଜି ନିବେଶ ଆକୃଷ୍ଟ ହେବ, ନିଯୁକ୍ତି ସୃଷ୍ଟି କରିବ ଏବଂ ଦୁର୍ଗମ ଅଞ୍ଚଳରେ ପ୍ରଶାସନିକ ପ୍ରସାରକୁ ସୁଦୃଢ଼ କରିବ।
ବୁଝାମଣାପତ୍ର ଏବଂ ‘ସ୍ୱତନ୍ତ୍ର ରେଳ ପ୍ରକଳ୍ପ’ ବ୍ୟବସ୍ଥାର ସଂଯୋଗ ଏକ ଶକ୍ତିଶାଳୀ କାର୍ଯ୍ୟାନ୍ବୟନ ମଡେଲ୍ ସୃଷ୍ଟି କରୁଛି ଯାହା ଭିତ୍ତିଭୂମି ଉନ୍ନୟନରେ ଦ୍ରୁତଗତି, ସମନ୍ୱୟ ଓ ଦାୟିତ୍ୱବୋଧକୁ ନିଶ୍ଚିତ କରୁଛି।
ଏହି ପଦକ୍ଷେପଗୁଡ଼ିକ ପ୍ରକଳ୍ପ ସମାପ୍ତିକୁ ତ୍ୱରାନ୍ୱିତ କରିବାସହ ଓଡ଼ିଶାର ଆଦିବାସୀ ଅଧୀଷ୍ଠିତ ଅଞ୍ଚଳରେ ଦୀର୍ଘମିଆଦି ସାମାଜିକ ଆର୍ଥିକ ପରିବର୍ତ୍ତନ ପାଇଁ ଭିତ୍ତିଭୂମି ମଧ୍ୟ ସୃଷ୍ଟି କରୁଛି।