ଚେନ୍ନାଇ: ତମିଲଗା ୱେତ୍ରୀ କଷଗମ (ଟିଭିକେ) ମୁଖ୍ୟ ବିଜୟ ତାମିଲନାଡୁ ବିଧାନସଭା ନିର୍ବାଚନ ପାଇଁ ତାଙ୍କ ଦଳର ଇସ୍ତାହାର ପ୍ରକାଶ କରିଛନ୍ତି, ଯେଉଁଥିରେ ମହିଳା କଲ୍ୟାଣ ଉପରେ ବିଶେଷ ଗୁରୁତ୍ୱ ଦିଆଯାଇଛି।
ବିଜୟଙ୍କ ଇସ୍ତାହାରରେ ଏହି ପ୍ରତିଶ୍ରୁତିଗୁଡ଼ିକ ଅନ୍ତର୍ଭୁକ୍ତ:
ଇସ୍ତାହାରରେ ୬୦ ବର୍ଷରୁ କମ୍ ବୟସ୍କ ମହିଳାମାନଙ୍କ ପାଇଁ ମାସିକ ୨,୫୦୦ ଟଙ୍କା ସହାୟତା ଏବଂ ଗରିବ ଶ୍ରେଣୀର ମହିଳାଙ୍କ ବିବାହ ପାଇଁ ଆଠ ଗ୍ରାମ ସୁନା ପ୍ରଦାନ କରାଯିବ ବୋଲି ପ୍ରତିଶ୍ରୁତି ଦିଆଯାଇଛି।
ସୁନା ବ୍ୟତୀତ, ବିଜୟ ଏହି ମହିଳାମାନଙ୍କ ବିବାହ ପାଇଁ ଏକ ଉଚ୍ଚମାନର ରେଶମ ଶାଢ଼ି ମଧ୍ୟ ପ୍ରତିଶ୍ରୁତି ଦେଇଛନ୍ତି। ସେ ମହିଳାମାନଙ୍କ ନେତୃତ୍ୱାଧୀନ ସ୍ୱୟଂ ସହାୟକ ଗୋଷ୍ଠୀ ପାଇଁ ୫ ଲକ୍ଷ ଟଙ୍କା ପର୍ଯ୍ୟନ୍ତ ସୁଧମୁକ୍ତ ଋଣ ପ୍ରତିଶ୍ରୁତି ଦେଇଛନ୍ତି।
ଇସ୍ତାହାରରେ ଶିକ୍ଷାକୁ ମଧ୍ୟ ଗୁରୁତ୍ୱ ଦିଆଯାଇଛି। ସ୍କୁଲ ଛାଡିବା ପିଲାଙ୍କ ସଂଖ୍ୟାକୁ ରୋକିବା ପାଇଁ, ସରକାରୀ ଏବଂ ରାଜ୍ୟ-ସହାୟତାପ୍ରାପ୍ତ ସ୍କୁଲରେ ପଢ଼ୁଥିବା ପିଲାମାନଙ୍କ ମା’ କିମ୍ବା ଅଭିଭାବକମାନଙ୍କୁ ପ୍ରତିବର୍ଷ ୧୫ ହଜାର ଟଙ୍କା ଅନୁଦାନ ପ୍ରଦାନ କରାଯିବ ବୋଲି ପ୍ରତିଶ୍ରୁତି ଦିଆଯାଇଛି।
ସେ କ୍ଷମତାକୁ ଆସିଲେ ଦୁର୍ନୀତିମୁକ୍ତ ସୁଶାସନର ପ୍ରତିଶ୍ରୁତି ମଧ୍ୟ ଦେଇଛନ୍ତି।
ବେକାରୀ ଦୂର କରିବା, ଉଚ୍ଚଶିକ୍ଷାକୁ ପ୍ରୋତ୍ସାହିତ କରିବା ପାଇଁ ପ୍ରତିଶ୍ରୁତି ଦେଇଛନ୍ତି।
ବିଜୟ ପ୍ରତିଷ୍ଠିତ ନେତା କାମରାଜଙ୍କ ନାମରେ ନାମିତ ୧୦୦ ଟି ସ୍ୱତନ୍ତ୍ର ଆବାସିକ ବିଦ୍ୟାଳୟ ଏବଂ ୨୦ ଲକ୍ଷ ଟଙ୍କା ପର୍ଯ୍ୟନ୍ତ ଉଚ୍ଚଶିକ୍ଷା ଋଣ ପ୍ରତିଶ୍ରୁତି ଦେଇଛନ୍ତି। ସେ ଏକ କୃତ୍ରିମ ବୁଦ୍ଧିମତ୍ତା (AI) ମନ୍ତ୍ରଣାଳୟ, ଏକ AI ବିଶ୍ୱବିଦ୍ୟାଳୟ ଏବଂ ଏକ AI ସହର ପ୍ରତିଷ୍ଠା ପାଇଁ ମଧ୍ୟ ପ୍ରତିଶ୍ରୁତି ଦେଇଛନ୍ତି।
ଇସ୍ତାହାରରେ କୃଷି କଲ୍ୟାଣ ଉପରେ ମଧ୍ୟ ବିଶେଷ ଗୁରୁତ୍ୱ ଦିଆଯାଇଛି। ଟିଭିକେ ମୁଖ୍ୟ ପ୍ରତିଶ୍ରୁତି ଦେଇଛନ୍ତି ଯେ, ପାଞ୍ଚ ଏକରରୁ କମ୍ ଜମି ଥିବା ଚାଷୀଙ୍କ କୃଷି ସମବାୟ ଫସଲ ଋଣ ସମ୍ପୂର୍ଣ୍ଣ ଛାଡ କରାଯିବ, ଯେତେବେଳେ ପାଞ୍ଚ ଏକରରୁ ଅଧିକ ଜମି ଥିବା ଚାଷୀଙ୍କ ପାଇଁ ୫୦ ପ୍ରତିଶତ ଋଣ ଛାଡ କରାଯିବ।
ଏହା ସହିତ, ଦଳ ଧାନ ପାଇଁ କ୍ୱିଣ୍ଟାଲ ପ୍ରତି ୩,୫୦୦ ଟଙ୍କା ଏବଂ ଆଖୁ ପାଇଁ ୪,୫୦୦ ଟଙ୍କା ସର୍ବନିମ୍ନ ସହାୟକ ମୂଲ୍ୟ (MSP) ପ୍ରତିଶ୍ରୁତି ଦେଇଛନ୍ତି।
ବେକାରୀ ସମସ୍ୟାର ମୁକାବିଲା ପାଇଁ ବିଜୟ ପାଞ୍ଚ ଲକ୍ଷ ନୂତନ ସରକାରୀ ନିଯୁକ୍ତି ସୃଷ୍ଟି କରିବାକୁ ପ୍ରତିଶ୍ରୁତି ଦେଇଛନ୍ତି। ଇସ୍ତାହାରରେ ବେକାର ସ୍ନାତକଙ୍କୁ ପ୍ରତି ମାସରେ ୪ ହଜାର ଟଙ୍କା ପର୍ଯ୍ୟନ୍ତ ସହାୟତା ପ୍ରଦାନ କରିବାକୁ ପ୍ରତିଶ୍ରୁତି ଦିଆଯାଇଛି।
ଦଳ ସରକାରୀ କର୍ମଚାରୀଙ୍କ ପାଇଁ ପୁରୁଣା ପେନସନ ଯୋଜନାର ପୁନର୍ବିଚାର କରିବା ଏବଂ ନର୍ସ ସମେତ ଚୁକ୍ତିଭିତ୍ତିକ କର୍ମଚାରୀଙ୍କୁ ନିୟମିତ କରିବା ପାଇଁ ପ୍ରତିଶ୍ରୁତି ଦେଇଛି।
ସ୍ୱାସ୍ଥ୍ୟ କ୍ଷେତ୍ରରେ ସେ ତାମିଲନାଡୁକୁ ନିଶାମୁକ୍ତ କରିବାକୁ ପ୍ରତିଶ୍ରୁତି ଦେଇଛନ୍ତି। ହସ୍ପିଟାଲଗୁଡ଼ିକୁ ଆଧୁନିକୀକରଣ କରିବା, ବାର୍ଷିକ ମାଗଣା ସ୍ୱାସ୍ଥ୍ୟ ଯାଞ୍ଚ ପ୍ରଦାନ କରିବା ଏବଂ ୨୫ ଲକ୍ଷ ଟଙ୍କାର ଏକ ପରିବାର ସ୍ୱାସ୍ଥ୍ୟ ବୀମା ଯୋଜନା ଆରମ୍ଭ କରିବା ପାଇଁ ମଧ୍ୟ ବିଜୟ ପ୍ରତିଶ୍ରୁତିବଦ୍ଧ ଦେଇଛନ୍ତି।
ଇସ୍ତାହାରରେ ବୃଦ୍ଧ ଏବଂ ଅକ୍ଷମଙ୍କ ପାଇଁ ମାସିକ ୩ ହଜାର ଟଙ୍କା ପେନସନ, ୨୦୦ ୟୁନିଟ୍ ମାଗଣା ବିଦ୍ୟୁତ୍, ଲିଜ୍ ନିୟମିତକରଣ ଏବଂ ସମସ୍ତ ପରିବାରକୁ ୧୦୦% ପାଇପ୍ ପାନୀୟ ଜଳ ଯୋଗାଣ ମଧ୍ୟ ଅନ୍ତର୍ଭୁକ୍ତ।
ବିଜୟ ଲୋକଙ୍କୁ ସିଧାସଳଖ ରାସନ ଭଳି ସେବା ଯୋଗାଇବା ପାଇଁ ଏକ ବ୍ୟବସ୍ଥା କାର୍ଯ୍ୟକାରୀ କରିବାକୁ ମଧ୍ୟ ପ୍ରତିଶ୍ରୁତି ଦେଇଛନ୍ତି। ସେ ଆଶ୍ୱାସନା ଦେଇଛନ୍ତି ଯେ, ତାଙ୍କ ସରକାରଙ୍କ ପାଇଁ ବ୍ୟବସାୟ କରିବାର ସୁଗମତା ସର୍ବୋପରି ହେବ ଏବଂ ୨୧ ଦିନ ମଧ୍ୟରେ ବ୍ୟବସାୟ ଲାଇସେନ୍ସ ପ୍ରଦାନ କରାଯିବ ବୋଲି ପ୍ରତିଶ୍ରୁତି ଦେଇଥିଲେ।
୨୩୪ ସଦସ୍ୟ ବିଶିଷ୍ଟ ତାମିଲନାଡୁ ବିଧାନସଭା ପାଇଁ ଭୋଟ୍ ଏପ୍ରିଲ ୨୩ ତାରିଖରେ ଅନୁଷ୍ଠିତ ହେବ ଏବଂ ଭୋଟ୍ ଗଣତି ମେ ୪ ତାରିଖରେ ହେବ।