ମଣିପୁର: ମଣିପୁରରେ ପୁଣି ଥରେ ଅଶାନ୍ତିର ଖବର ମିଳିଛି । ଇମ୍ଫାଲରେ ଶନିବାର ଏକ ବିଶାଳ ପଦଯାତ୍ରା ବେଳେ ପ୍ରଦର୍ଶନକାରୀ ଏବଂ ସୁରକ୍ଷାକର୍ମୀଙ୍କ ମଧ୍ୟରେ ତୀବ୍ର ସଂଘର୍ଷ ଘଟିଛି। ଫଳରେ ଅନେକ ଲୋକ ଆହତ ହୋଇଥିବା ବେଳେ ସହରରେ ଚାପା ଉତ୍ତେଜନା ଜାରି ରହିଛି। ଶନିବାର ଦିନ, ଇମ୍ଫାଲରେ COCOMI ଦ୍ୱାରା ଏକ ବଡ଼ ଶୋଭାଯାତ୍ରା ଆୟୋଜନ କରାଯାଇଥିଲା । ଏଥିରେ ହଜାର ହଜାର ଲୋକ ଅଂଶଗ୍ରହଣ କରିଥିଲେ । ଶୋଭାଯାତ୍ରାକାରୀମାନେ ମୁଖ୍ୟମନ୍ତ୍ରୀଙ୍କ ବାସଭବନ ଆଡ଼କୁ ଯାଉଥିବା ବେଳେ ପୋଲିସ ଏହାକୁ ଅଟକାଇଥିଲା। ସୁରକ୍ଷାକର୍ମୀଙ୍କ ବାରଣ ସତ୍ତ୍ୱେ ଭିଡ଼ ଆଗକୁ ବଢ଼ିବାରୁ ସଂଘର୍ଷ ଆରମ୍ଭ ହୋଇଥିଲା। ଏଥିରେ ଲାମଲଙ୍ଗ ବଜାର, ଲାମ୍ବୋଇ ଖୋଙ୍ଗନାଙ୍ଗଖୋଙ୍ଗ, କାକୱା କେଟଲ, ଟିଡିମ୍ ଗ୍ରାଉଣ୍ଡ, ହାଓ ଗ୍ରାଉଣ୍ଡ ଏବଂ ଓରିଏଣ୍ଟାଲ କଲେଜ ସମେତ ଇମ୍ଫାଲର ବିଭିନ୍ନ ଅଞ୍ଚଳରୁ ଲୋକମାନେ ସାମିଲ ଥିଲେ। ଅନେକ ଲୋକ କେଶମଥୋଙ୍ଗ, ୱାଙ୍ଗୋଇ ଏବଂ ଖଙ୍ଗେମ୍ବାଲିରୁ ମଧ୍ୟ ଆସିଥିଲେ। ସେମାନେ ସମସ୍ତେ ମୈତେଇ ସମ୍ପ୍ରଦାୟର। ସେମାନେ ବ୍ୟାନର ଏବଂ ପୋଷ୍ଟର ଧରି ସ୍ଲୋଗାନ ଦେଇଥିଲେ। ରାଲିକୁ ଘଉଡ଼ାଇବା ପାଇଁ ପୋଲିସ ଲୁହବୁହା ଗ୍ୟାସ ବ୍ୟବହାର କରିଥିଲା।
