ନୂଆଦିଲ୍ଲୀ : ମାନ୍ଦାବସ୍ଥା ଏବଂ ବିଶ୍ୱ ଉତ୍ତେଜନା ଆଗରେ ଟଙ୍କା ଶକ୍ତିହୀନ । ପ୍ରଥମ ଥର ପାଇଁ ଡଲାର ତୁଳନାରେ ୯୬ ଅତିକ୍ରମ କଲା ଭାରତୀୟ ଅର୍ଥନୀତି ପାଇଁ ଚିନ୍ତାଜନକ ଖବର। ଆମେରିକୀୟ ଡଲାର ତୁଳନାରେ ଭାରତୀୟ ଟଙ୍କାର ମୂଲ୍ୟ ଇତିହାସର ସବୁଠାରୁ ସର୍ବନିମ୍ନ ସ୍ତରକୁ ଖସିଯାଇଛି। ଶୁକ୍ରବାର ବଜାର କାରବାରରେ ପ୍ରଥମ ଥର ପାଇଁ ଟଙ୍କାର ମୂଲ୍ୟ ୯୬ ସ୍ତର ଅତିକ୍ରମ କରିଛି। ବିଶ୍ୱ ବଜାରରେ ଅଶୋଧିତ ତୈଳର ବଦ୍ଧିତ ମୂଲ୍ୟ ଏବଂ ପଶ୍ଚିମ ଏସିଆରେ ଜାରି ରହିଥିବା ଯୁଦ୍ଧ ପରିସ୍ଥିତି ଯୋଗୁଁ ଭାରତୀୟ ମୁଦ୍ରା ଉପରେ ଏହି ବଡ଼ ଚାପ ପଡ଼ିଛି।
ଶୁକ୍ରବାର କାରବାର ସମୟରେ ଟଙ୍କା ୦.୩% ଦୁର୍ବଳ ହୋଇ ଡଲାର ପ୍ରତି ୯୬.୦୫ ସ୍ତରକୁ ଖସି ଆସିଥିଲା, ଯାହା ଗତ ସେସନ୍ର ରେକର୍ଡ ସର୍ବନିମ୍ନ ସ୍ତର ୯୫.୯୫୭୫ କୁ ମଧ୍ୟ ପଛରେ ପକାଇ ଦେଇଛି। ବିଶ୍ୱର ପ୍ରମୁଖ ତୈଳ ପରିବହନ ରୁଟ୍ ‘ଷ୍ଟ୍ରେଟ୍ ଅଫ୍ ହରମୁଜ୍’ ରେ ଦେଖାଦେଇଥିବା ଉତ୍ତେଜନା କାରଣରୁ ବ୍ରେଣ୍ଟ କ୍ରୁଡ୍ ମୂଲ୍ୟ ବ୍ୟାରେଲ୍ ପିଛା ପ୍ରାୟ ୧୧୦ ଆମେରିକୀୟ ଡଲାର ପାଖାପାଖି ରହିଛି। ଭାରତ ନିଜ ଆବଶ୍ୟକତାର ୮୫ ପ୍ରତିଶତରୁ ଅଧିକ କ୍ରୁଡ୍ ଅଏଲ୍ ଆମଦାନୀ କରୁଥିବାରୁ, ଏହା ଦେଶର ଆମଦାନୀ ବିଲ୍କୁ ବଢ଼ାଇବା ସହ ଟଙ୍କାର ମୂଲ୍ୟକୁ କ୍ରମାଗତ ଭାବେ ହ୍ରାସ କରୁଛି।
ଟଙ୍କାର ଏହି ଦ୍ରୁତ ପତନକୁ ରୋକିବା ପାଇଁ ଭାରତୀୟ ରିଜର୍ଭ ବ୍ୟାଙ୍କ (RBI) ମୁଦ୍ରା ବଜାରରେ ହସ୍ତକ୍ଷେପ କରୁଥିବା ଜଣାପଡ଼ିଛି। ବଜାର ବିଶେଷଜ୍ଞଙ୍କ ମୁତାବକ, ଟଙ୍କା ଦୁର୍ବଳ ହେବା ଦ୍ୱାରା ଦେଶରେ ମୁଦ୍ରାସ୍ଫୀତି ବା ମହଙ୍ଗା ମାଡ଼ ବଢ଼ିବା ଆଶଙ୍କା ରହିଛି। ବିଦେଶରୁ ଆସୁଥିବା ତୈଳ, ଇଲେକ୍ଟ୍ରୋନିକ୍ସ ଏବଂ ଶିଳ୍ପ କଞ୍ଚାମାଲ ପାଇଁ ଅଧିକ ଖର୍ଚ୍ଚ କରିବାକୁ ପଡ଼ିବ, ଯାହା ସାଧାରଣ ଗ୍ରାହକଙ୍କ ପକେଟ୍ ଉପରେ ପ୍ରଭାବ ପକାଇବ। ତେବେ ଅନ୍ୟପଟେ ଡଲାରରେ ରୋଜଗାର କରୁଥିବା ଆଇଟି (IT) ଏବଂ ଫାର୍ମାସ୍ୟୁଟିକାଲ୍ସ କମ୍ପାନୀଗୁଡ଼ିକ ଏହି ସ୍ଥିତିରୁ ଲାଭବାନ ହୋଇପାରନ୍ତି।
