ମୁମ୍ବାଇ : ରାଜନୀତି ପାଣିପାଗ ସବୁବେଳେ ଏକ ପ୍ରକାର ରୁହେ ନାହିଁ । ବିଶେଷ କରି ମେଣ୍ଟ ଶାସନରେ ଦ୍ଵନ୍ଦ୍ଵ ଟିକେ ଅଧିକ ରହେ। ମହାରାଷ୍ଟ୍ର ରାଜନୀତି ପାଣିପାଗ ଏବେ ଟିକେ ଗୋଳିଆ ଜଣାପଡୁଛି। ନିକଟରେ ମହାରାଷ୍ଟ୍ର ବିଧାନ ପରିଷଦ ନିର୍ବାଚନ ହେବାକୁ ଥିବାବେଳେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍, ଉପମୁଖ୍ୟମନ୍ତ୍ରୀ ସୁନେତ୍ର ପାୱାର ଏବଂ ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ଗତ ଦୁଇ ଦିନ ଧରି ଦିଲ୍ଲୀ ଗସ୍ତରେ । ଏହି ଗସ୍ତକୁ ନେଇ ରାଜ୍ୟ ରାଜନୀତି ବେଶ ଉଷ୍ମ । ମିଳିଥିବା ସୂଚନା ଅନୁସାରେ ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ମହାରାଷ୍ଟ୍ର ବିଧାନ ପରିଷଦର ୧୭ଟି ଆସନ ମଧ୍ୟରୁ ଛଅଟି ଆସନ ଉପରେ ଅଟଳ ଅଛନ୍ତି। ତେଣୁ, ଆସନ ବଣ୍ଟନ ବିବାଦ ଏବେ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ କୋର୍ଟରେ ପହଞ୍ଚିଛି।
ତେବେ ଏହି ଅସନ୍ତୋଷକୁ ସ୍ପଷ୍ଟ ଭାବରେ ଖାରଜ କରିଛନ୍ତି ଏକନାଥ ସିନ୍ଦେ । ସେ କହିଛନ୍ତି ଯେ ସେ କୌଣସି ରାଜନୈତିକ ବୈଠକ ପାଇଁ ଦିଲ୍ଲୀ ଆସି ନଥିଲେ, ବରଂ ରାଜ୍ୟର ବିକାଶ କାର୍ଯ୍ୟ ପାଇଁ ଆସିଥିଲେ । ରାଜ୍ୟବାସୀଙ୍କ ପକ୍ଷରୁ ଏବଂ ଗୁରୁତ୍ୱପୂର୍ଣ୍ଣ ଯୋଜନା ପାଇଁ କେନ୍ଦ୍ର ସରକାରଙ୍କ ନିକଟରେ ଆମର ମତାମତ ଉପସ୍ଥାପନ କରିବା ଆମର କର୍ତ୍ତବ୍ୟ। ମହାରାଷ୍ଟ୍ରର ପିଆଜ ଏବଂ ଆଖୁ ଚାଷୀଙ୍କ ସମସ୍ୟା ହେଉ କିମ୍ବା ଜଳ ଜୀବନ ମିଶନ ପ୍ରକଳ୍ପ ହେଉ, ଯଦି ଆମେ ରାଜ୍ୟର ବିଚାରାଧୀନ ସମସ୍ୟାର ସମାଧାନ ପାଇଁ କେନ୍ଦ୍ର ସରକାରଙ୍କ ପାଖକୁ ନ ଯାଉ, ତେବେ ଆମେ କାହା ପାଖକୁ ଯିବୁ?”ସେ ଆହୁରି କହିଛନ୍ତି, “ଜନସାଧାରଣଙ୍କ ହିତ ପାଇଁ କେନ୍ଦ୍ର ସରକାରଙ୍କ ସହିତ ଯୋଗାଯୋଗ କରିବା ବିଷୟରେ ଆମର କୌଣସି ହୀନମନ୍ୟତା ନାହିଁ। ପୂର୍ବ ସରକାର ହୁଏତ କେନ୍ଦ୍ର ସରକାରଙ୍କ ସହ କଥାବାର୍ତ୍ତା କରିବାକୁ କିମ୍ବା ସାହାଯ୍ୟ ମାଗିବାକୁ ନିକୃଷ୍ଟ ମନେ କରିଥିବେ, କିନ୍ତୁ ଆମର ସେହି ମାନସିକତା ନାହିଁ।” ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଅମିତ ଶାହ ସର୍ବଦା ମହାରାଷ୍ଟ୍ରକୁ ସମର୍ଥନ କରିଆସିଛନ୍ତି, ଏବଂ ରାଜ୍ୟ ଏହାର ବିକାଶ ପାଇଁ ହଜାର ହଜାର କୋଟି ଟଙ୍କାର କେନ୍ଦ୍ରୀୟ ପାଣ୍ଠି ପାଇଛି ବୋଲି କହିଛନ୍ତି।
ସୂଚନାଯୋଗ୍ୟ, ଜୁନ୍ ୧ ତାରିଖ ହେଉଛି ବିଧାନ ପରିଷଦ ନିର୍ବାଚନ ପାଇଁ ନାମାଙ୍କନ ଦାଖଲ କରିବାର ଶେଷ ତାରିଖ। ତଥାପି, ମହାଯୁତିର ଆସନ ବଣ୍ଟନ ଚୁକ୍ତିନାମା ଏପର୍ଯ୍ୟନ୍ତ ଆନୁଷ୍ଠାନିକ ଭାବରେ ଘୋଷଣା କରାଯାଇ ନାହିଁ। ଏହି କାରଣରୁ ମେଣ୍ଟ ଭିତରେ ମତଭେଦର ଗୁଜବ ଉଠୁଛି। ଏହି ଗୁଜବ ଉପରେ ସିନ୍ଦେ ପ୍ରତିକ୍ରିୟା ଦେଇ କହିଛନ୍ତି, “ମହାଯୁତି ଭିତରେ କୌଣସି ମତଭେଦ ନାହିଁ। ବିଧାନ ପରିଷଦ ଆସନ ବଣ୍ଟନ ସମ୍ମାନଜନକ ଭାବରେ କରାଯିବ। ମହାଯୁତି ୧୭ଟି ଆସନରେ ଏକତ୍ରିତ ଭାବରେ ଲଢ଼ିବ ଏବଂ ସମସ୍ତ ଆସନରେ ବିଜୟୀ ହେବ।