ମୁମ୍ବାଇ: ମହାରାଷ୍ଟ୍ର ରାଜ୍ୟସଭା ଉପନିର୍ବାଚନକୁ ନେଇ ରାଜନୈତିକ ତାପମାତ୍ରା ବଢ଼ିଛି। ସୁନେତ୍ର ପାୱାରଙ୍କ ଇସ୍ତଫା ପରେ ଖାଲି ହୋଇଥିବା ରାଜ୍ୟସଭା ଆସନ ପାଇଁ ଏନସିପି ବିଦର୍ଭର ବରିଷ୍ଠ ନେତା ରାଜେନ୍ଦ୍ର ଜୈନ ଙ୍କୁ ପ୍ରାର୍ଥୀ ଭାବେ ଘୋଷଣା କରିଛି। ଦଳର କୋର୍ କମିଟି ବୈଠକ ପରେ ଏହି ନିଷ୍ପତ୍ତି ନିଆଯାଇଥିବା ବେଳେ ଏନସିପିର ରାଜ୍ୟ ଅଧ୍ୟକ୍ଷ ସୁନୀଲ ତଟକରେ ଆନୁଷ୍ଠାନିକ ଭାବେ ତାଙ୍କ ନାମ ଘୋଷଣା କରିଛନ୍ତି।
ଏହି ଆସନ ପାଇଁ ଦଳର ବରିଷ୍ଠ ନେତା ଛାଗନ ଭୂଜବଲ ମଧ୍ୟ ଦୌଡ଼ରେ ଥିଲେ। ତଥାପି ଏନସିପି ନେତୃତ୍ୱ ଶେଷରେ ରାଜେନ୍ଦ୍ର ଜୈନଙ୍କ ଉପରେ ଆସ୍ଥା ରଖିଛି, ଯାହାକୁ ଦଳର ଏକ କୌଶଳଗତ ନିଷ୍ପତ୍ତି ବୋଲି ଦେଖାଯାଉଛି।
ଗୋଣ୍ଡିଆ ଜିଲ୍ଲାର ନିବାସୀ ରାଜେନ୍ଦ୍ର ଜୈନ ବିଦର୍ଭରେ ଏନସିପିର ଜଣେ ପରିଚିତ ମୁହଁ। ସେ ପୂର୍ବତନ କେନ୍ଦ୍ରମନ୍ତ୍ରୀ ପ୍ରଫୁଲ ପଟେଲଙ୍କ ଘନିଷ୍ଠ ସହଯୋଗୀ ଓ ପୂର୍ବତନ ବ୍ୟକ୍ତିଗତ ସହାୟକ ଭାବେ କାମ କରିଥିଲେ। ଦଳୀୟ ସଂଗଠନରେ ତାଙ୍କର ଦୀର୍ଘ ଅଭିଜ୍ଞତା ରହିଛି ଏବଂ ପୂର୍ବ ବିଦର୍ଭରେ ଏନସିପିର ସଂଗଠନକୁ ମଜବୁତ କରିବାରେ ସେ ଗୁରୁତ୍ୱପୂର୍ଣ୍ଣ ଭୂମିକା ନେଇଛନ୍ତି।
ରାଜେନ୍ଦ୍ର ଜୈନ ପୂର୍ବରୁ ଭଣ୍ଡାରା-ଗୋଣ୍ଡିଆ ସ୍ଥାନୀୟ ସଂସ୍ଥା ନିର୍ବାଚନମଣ୍ଡଳୀରୁ ମହାରାଷ୍ଟ୍ର ବିଧାନ ପରିଷଦ ସଦସ୍ୟ ହୋଇଥିଲେ। ଯଦିଓ ୨୦୧୬ରେ ବିଜେପି ନେତା ପରିଣୟ ଫୁକେଙ୍କ ନିକଟରୁ ସେ ପରାଜୟ ବରଣ କରିଥିଲେ।
ରାଜନୀତି ବ୍ୟତୀତ ଶିକ୍ଷା କ୍ଷେତ୍ରରେ ମଧ୍ୟ ରାଜେନ୍ଦ୍ର ଜୈନଙ୍କ ଅବଦାନ ରହିଛି। ସେ ଦୀର୍ଘ ସମୟ ଧରି Gondia Education Societyର ସଚିବ ଭାବେ କାର୍ଯ୍ୟ କରିଥିଲେ। ଏହି ସଂସ୍ଥା ପ୍ରଫୁଲ ପଟେଲଙ୍କ ପରିବାର ସହ ଜଡିତ ବୋଲି ଜଣାଯାଏ।
ସୁନେତ୍ର ପାୱାରଙ୍କ ଆସନ ପାଇଁ ରାଜେନ୍ଦ୍ର ଜୈନଙ୍କୁ ପ୍ରାର୍ଥୀ କରି ଏନସିପି ବିଦର୍ଭ ଅଞ୍ଚଳକୁ ସ୍ପଷ୍ଟ ରାଜନୈତିକ ସନ୍ଦେଶ ଦେଇଛି। ଏହି ନିଷ୍ପତ୍ତି ଦଳ ମଧ୍ୟରେ ପ୍ରଫୁଲ ପଟେଲଙ୍କ ପ୍ରଭାବକୁ ମଧ୍ୟ ପ୍ରତିଫଳିତ କରୁଛି। ବର୍ତ୍ତମାନ ରାଜ୍ୟସଭା ଉପନିର୍ବାଚନରେ ଏହି ପଦକ୍ଷେପ କେତେ ଫଳପ୍ରଦ ହେବ, ସେଥିପାଇଁ ରାଜନୈତିକ ମହଳର ନଜର ରହିଛି।