ନୂଆଦିଲ୍ଲୀ: ପଶ୍ଚିମ ଏସିଆରେ ବଢ଼ୁଥିବା ଉତ୍ତେଜନା ମଧ୍ୟରେ ବିଶ୍ୱର ଅତ୍ୟନ୍ତ ଗୁରୁତ୍ୱପୂର୍ଣ୍ଣ ସାମୁଦ୍ରିକ ବାଣିଜ୍ୟ ପଥ ହର୍ମୁଜ୍ ପ୍ରଣାଳୀକୁ ନେଇ ବଡ଼ ଦାବି ସାମ୍ନାକୁ ଆସିଛି। ଇରାନର ସାମରିକ କମାଣ୍ଡ ଖାତାମ୍ ଅଲ୍-ଆନ୍ବିୟା ମୁଖ୍ୟାଳୟ ହର୍ମୁଜ୍ ପ୍ରଣାଳୀକୁ ଜାହାଜ ଚଳାଚଳ ପାଇଁ “ବନ୍ଦ” କରାଯାଇଥିବା ଦାବି କରିଛି। ତେବେ ଆମେରିକା ଏହି ଦାବିକୁ ପ୍ରତ୍ୟାଖ୍ୟାନ କରି କହିଛି ଯେ ଜଳପଥରେ ଜାହାଜ ଚଳାଚଳ ସାଧାରଣ ଭାବେ ଚାଲିଛି ଏବଂ ପରିସ୍ଥିତି ଉପରେ ନଜର ରଖାଯାଉଛି।
ଇରାନ ପକ୍ଷରୁ କୁହାଯାଇଛି ଯେ ଆମେରିକା ସହିତ ହୋଇଥିବା ଯୁଦ୍ଧବିରତି ଚୁକ୍ତିର କଥିତ ଉଲ୍ଲଂଘନ, ଇସ୍ରାଏଲର ନିରନ୍ତର ସାମରିକ କାର୍ଯ୍ୟକଳାପ ଏବଂ ଦକ୍ଷିଣ ଲେବାନନରେ ଚାଲିଥିବା ଅଭିଯାନକୁ ଦୃଷ୍ଟିରେ ରଖି ଏହି ଘୋଷଣା କରାଯାଇଛି। ଏହା ଫଳରେ ବିଶ୍ୱ ତୈଳ ବଜାର ଓ ଆନ୍ତର୍ଜାତିକ ଜାହାଜ ଚଳାଚଳକୁ ନେଇ ଚିନ୍ତା ବଢ଼ିଛି।
ତେବେ ଏହି ତନାତନି ମଧ୍ୟରେ ଭାରତ ପାଇଁ ଏକ ଆଶ୍ୱସ୍ତିକର ଖବର ଆସିଛି। ୮.୬ ଲକ୍ଷ ଟନ୍ରୁ ଅଧିକ ଅଶୋଧିତ ତେଲ ବୋଝେଇ ତିନିଟି ଭାରତୀୟ ପତାକାଧାରୀ ଟ୍ୟାଙ୍କର ସୁରକ୍ଷିତ ଭାବେ ହର୍ମୁଜ୍ ପ୍ରଣାଳୀ ପାର କରି ଭାରତ ଅଭିମୁଖେ ଯାତ୍ରା କରିଛି। ଏହି ଜାହାଜଗୁଡ଼ିକରେ ମୋଟ ୯୪ ଜଣ ଭାରତୀୟ କ୍ରୁ ସଦସ୍ୟ ଅଛନ୍ତି ଏବଂ ସମସ୍ତେ ସୁରକ୍ଷିତ ଥିବା ସୂଚନା ମିଳିଛି।
କେନ୍ଦ୍ର ମନ୍ତ୍ରୀ ସର୍ବାନନ୍ଦ ସୋନୱାଲ ସୂଚନା ଦେଇ କହିଛନ୍ତି ଯେ ‘ଦେଶ ବୈଭବ’, ‘ଦେଶ ବିଭୋର’ ଏବଂ ‘ସନମାର ହେରାଲ୍ଡ’ ନାମକ ତିନିଟି ଟ୍ୟାଙ୍କର ସଫଳତାର ସହିତ ହର୍ମୁଜ୍ ପ୍ରଣାଳୀ ପାର କରିଛି। ସେ କହିଛନ୍ତି ଯେ ଏହି ଜାହାଜଗୁଡ଼ିକ ଭାରତର ଉର୍ଜା ସୁରକ୍ଷା ପାଇଁ ଗୁରୁତ୍ୱପୂର୍ଣ୍ଣ ପରିମାଣର ଅଶୋଧିତ ତେଲ ବହନ କରୁଛନ୍ତି।
ରିପୋର୍ଟ ଅନୁଯାୟୀ, ‘ଦେଶ ବୈଭବ’ ଜୁନ୍ 24 ତାରିଖରେ ଗୁଜରାଟର ଭାଡିନାର ବନ୍ଦରରେ ପହଞ୍ଚିବ ବୋଲି ଆଶା କରାଯାଉଛି। ‘ଦେଶ ବିଭୋର’ ମଧ୍ୟ ସେହି ଦିନ ସିକ୍କା ବନ୍ଦରରେ ପହଞ୍ଚିବ ବୋଲି ଆଶା କରାଯାଉଛି। ସାନମାର ହେରାଲ୍ଡ ଜୁଲାଇ ୧ ସୁଦ୍ଧା ଓଡ଼ିଶାର ପାରାଦୀପ ବନ୍ଦରରେ ପହଞ୍ଚିବ ବୋଲି ଆଶା କରାଯାଉଛି।str
ହର୍ମୁଜ୍ ପ୍ରଣାଳୀ ବିଶ୍ୱର ସବୁଠାରୁ ବ୍ୟସ୍ତ ତୈଳ ପରିବହନ ପଥ ମଧ୍ୟରୁ ଗୋଟିଏ। ବିଶ୍ୱର ବହୁ ପରିମାଣର ଅଶୋଧିତ ତେଲ ଏହି ଜଳପଥ ଦେଇ ପରିବହନ ହୋଇଥାଏ। ତେଣୁ ଏଠାରେ କୌଣସି ବାଧା ସୃଷ୍ଟି ହେଲେ ବିଶ୍ୱ ତୈଳ ବଜାର, ଇନ୍ଧନ ମୂଲ୍ୟ ଏବଂ ଭାରତ ଭଳି ଆମଦାନୀ-ନିର୍ଭର ଦେଶଗୁଡ଼ିକର ଉର୍ଜା ସୁରକ୍ଷା ଉପରେ ଗଭୀର ପ୍ରଭାବ ପଡ଼ିପାରେ।
ବର୍ତ୍ତମାନ ଇରାନ ଓ ଆମେରିକାର ବିପରୀତ ଦାବି ମଧ୍ୟରେ ହର୍ମୁଜ୍ ପ୍ରଣାଳୀର ସ୍ଥିତିକୁ ନେଇ ଅନିଶ୍ଚିତତା ଜାରି ରହିଥିବା ବେଳେ, ତିନିଟି ଭାରତୀୟ ତୈଳ ଟ୍ୟାଙ୍କରର ସୁରକ୍ଷିତ ଭାବେ ଏହି ଜଳପଥ ପାର ହେବା ଦେଶ ପାଇଁ ଏକ ବଡ଼ ଆଶ୍ୱସ୍ତି ଓ ସକାରାତ୍ମକ ସଙ୍କେତ ଭାବେ ଦେଖାଯାଉଛି।