ସମ୍ବଲପୁର : ସହରରେ ଭିଡ ହିଂସାକୁ ନେଇ ଚାଞ୍ଚଲ୍ୟ ସୃଷ୍ଟି ହୋଇଛି । ବଡବଜାରରେ ପିଲାଚୋର ସନ୍ଦେହରେ କେରଳର ଜଣେ ପ୍ରବାସୀ ଶ୍ରମିକକୁ କିଛି ଲୋକ ଆକ୍ରମଣ କରିଛନ୍ତି । ତେବେ ଠିକ ସମୟରେ ପୋଲିସ ପହଞ୍ଚି ଯାଇଥିବାରୁ ପ୍ରବାସୀ ଶ୍ରମିକ ଜଣକ ଅଳ୍ପକେ ରକ୍ଷା ପାଇଯାଇଥିଲେ।
ମିଳିଥିବା ସୂଚନା ଅନୁସାରେ କେରଳର ବିଷ୍ଣୁ କେସ ନାମକ ଜଣେ ଶ୍ରମିକ ବରଗଡର ୱେଲ୍ଡିଂ ଗ୍ଯାରେଜରେ କାମ କରୁଥିଲେ, ମାତ୍ର ନିକଟରେ ସେ ସମ୍ବଲପୁରକୁ କାମ ସନ୍ଧାନରେ ଆସିଥିଲେ । ତାଙ୍କର ଭାଷା ଅଲଗା ଥିବାରୁ ଲୋକେ ତାଙ୍କୁ ପିଲାଚୋର ସନ୍ଦେହରେ ଆକ୍ରମଣ କରିଥିଲେ ।
ଅପରପକ୍ଷରେ ହୀରାକୁଦରେ ଠିକା କାମକୁ ନେଇ ମଧ୍ୟ ଜଣେ ମହିଳା ଏବଂ ତାଙ୍କ ପୁଅ ସମେତ ତିନି ଜଣଙ୍କ ଉପରେ ଆକ୍ରମଣ ହୋଇଥିଲା । ଏବେ ଶୀତଳଷଷ୍ଠୀ ଚାଲିଥିବାବେଳେ ସହରରେ ଏପରି ଭିଡ ହିଂସା ସହରର ଆଇନ ପରିସ୍ଥିତି ଉପରେ ପ୍ରଶ୍ନ ଉଠାଉଛି । ଗୁଜବ କୁ ନେଇ ହେଉଥିବା ହିଂସା କେବଳ ସମ୍ବଲପୁର ସହର ନୁହେଁ, ବରଂ ରାଜ୍ୟର ଅନ୍ୟ ସହରରେ ମଧ୍ୟ ଦେଖା ଯାଉଛି । ଏପରି ସ୍ଥଳେ ସରକାର ଓ ପୋଲିସ ଉଭୟ ଦୃଷ୍ଟାନ୍ତମୂଳକ କାର୍ଯ୍ୟ କରିବାର ଆବଶ୍ୟକତା ରହିଛି ।