କଟକ: ନିଶା କାରବାର ବିରୋଧରେ ଅବକାରୀ ବିଭାଗର ଜୋରଦାର ଅଭିଯାନ ଜାରି ରହିଥିବା ବେଳେ କଟକରୁ ସାମ୍ନାକୁ ଆସିଛି ଏକ ବଡ଼ ସଫଳତା। ଜିଲ୍ଲା ଅବକାରୀ ଟିମ୍ ଦୁଇଟି ଭିନ୍ନ ଅପରେସନରେ ମୋଟ ୮୦ କେଜି ଗଞ୍ଜେଇ ଜବତ କରିବା ସହ ୩ ଜଣ ଗଞ୍ଜେଇ ମାଫିଆଙ୍କୁ ଗିରଫ କରିଛି। ଜବତ ଗଞ୍ଜେଇର ଆନୁମାନିକ ବଜାର ମୂଲ୍ୟ ୧୮ ଲକ୍ଷ ଟଙ୍କାରୁ ଅଧିକ ହେବ ବୋଲି ଅବକାରୀ ବିଭାଗ ସୂଚନା ଦେଇଛି।
ମିଳିଥିବା ସୂଚନା ଆଧାରରେ ଅବକାରୀ ଟିମ୍ ସଦର ଥାନା ଅଞ୍ଚଳର କୁଆଖାଇ ବ୍ରିଜ ନିକଟରେ ଚଢ଼ାଉ କରିଥିଲା। ଏହି ସମୟରେ ଏକ ଦାମୀ କାରକୁ ଅଟକାଇ ଯାଞ୍ଚ କରିବା ପରେ ସେଥିରୁ ୭୦ କେଜି ଗଞ୍ଜେଇ ଜବତ ହୋଇଥିଲା। ଘଟଣାସ୍ଥଳରୁ ରାକେଶ ବେହେରା ଓ ବାବିନା ସାହୁଙ୍କୁ ଗିରଫ କରାଯାଇଛି।
ପ୍ରାଥମିକ ତଦନ୍ତରୁ ଏହି ଗଞ୍ଜେଇକୁ ରାଜ୍ୟ ବାହାରକୁ ଚାଲାଣ କରିବାକୁ ଯୋଜନା ଥିବା ସନ୍ଦେହ କରାଯାଉଛି। ଏହି ଚକ୍ର ପଛରେ ଆଉ କିଏ କିଏ ସଂପୃକ୍ତ ଅଛନ୍ତି, ସେନେଇ ତଦନ୍ତ ଜାରି ରହିଛି।
ସେହିପରି ଆଉ ଏକ ଅଭିଯାନରେ ଜଗତପୁର ଥାନା ଅନ୍ତର୍ଗତ ଜଗତପୁର ଗୋଲେଇ ଛକ ନିକଟରେ ଚଢ଼ାଉ କରି ଅବକାରୀ ଟିମ୍ ୧୦ କେଜି ଗଞ୍ଜେଇ ଜବତ କରିଥିଲା। ଏହି ମାମଲାରେ ଅନାମ ସାହୁ ନାମକ ଜଣେ ଅଭିଯୁକ୍ତଙ୍କୁ ଗିରଫ କରାଯାଇଛି। ଚୋରା ଗଞ୍ଜେଇ କାରବାରରେ ବ୍ୟବହୃତ ଏକ ବାଇକକୁ ମଧ୍ୟ ଜବତ କରାଯାଇଛି।
ଲଗାତାର ଚଢ଼ାଉ ଓ ଜବତରୁ ସ୍ପଷ୍ଟ ହେଉଛି ଯେ କଟକ ଓ ଏହାର ଆଖପାଖ ଅଞ୍ଚଳରେ ଗଞ୍ଜେଇ କାରବାରକୁ ନେଇ ଅବକାରୀ ବିଭାଗ ସତର୍କ ରହିଛି। ବିଶେଷକରି ଜାତୀୟ ରାଜପଥ ଓ ସହର ସଂଲଗ୍ନ ଅଞ୍ଚଳଗୁଡ଼ିକୁ ଚୋରା ଚାଲାଣକାରୀମାନେ ଟ୍ରାଞ୍ଜିଟ୍ ରୁଟ୍ ଭାବେ ବ୍ୟବହାର କରୁଥିବାରୁ ନଜରଦାରୀ ବଢ଼ାଯାଇଛି।
ଅବକାରୀ ଅଧିକାରୀମାନଙ୍କ କହିବା ଅନୁଯାୟୀ, ନିଶା କାରବାର ବିରୋଧରେ ଆଗାମୀ ଦିନରେ ମଧ୍ୟ ଏଭଳି ସ୍ୱତନ୍ତ୍ର ଅଭିଯାନ ଜାରି ରହିବ ଏବଂ ଏହାସହ ଜଡ଼ିତ ଅନ୍ୟ ଲୋକଙ୍କୁ ଚିହ୍ନଟ କରିବାକୁ ତଦନ୍ତକୁ ତ୍ୱରାନ୍ୱିତ କରାଯାଇଛି।