ନୂଆଦିଲ୍ଲୀ/ବ୍ରହ୍ମପୁର: ବ୍ରହ୍ମପୁର ସଂସଦୀୟ କ୍ଷେତ୍ରର ସର୍ବାଙ୍ଗୀନ ବିକାଶ ତଥା ଦକ୍ଷିଣ ଓଡ଼ିଶାର ଶିଳ୍ପ ଓ ସାଂସ୍କୃତିକ ପ୍ରଗତିକୁ ଆହୁରି ବେଗବାନ କରିବା ପାଇଁ ଏକ ପ୍ରମୁଖ ପଦକ୍ଷେପ ନେଇଛନ୍ତି ସାଂସଦ ଡ. ପ୍ରଦୀପ କୁମାର ପାଣିଗ୍ରାହୀ। କେନ୍ଦ୍ର ବନ୍ଦର, ଜାହାଜ ଚଳାଚଳ ଓ ଜଳପଥ ମନ୍ତ୍ରଣାଳୟର ପରାମର୍ଶଦାତା କମିଟି ବୈଠକରେ ଉପସ୍ଥାପିତ ହୋଇଥିବା ପ୍ରସ୍ତାବ ଆଧାରରେ ସେ କେନ୍ଦ୍ର କ୍ୟାବିନେଟ ମନ୍ତ୍ରୀ ସର୍ବାନନ୍ଦ ସୋନୋୱାଲ ଏବଂ ମନ୍ତ୍ରଣାଳୟର ରାଷ୍ଟ୍ରମନ୍ତ୍ରୀ ଶାନ୍ତନୁ ଠାକୁରଙ୍କୁ ବ୍ରହ୍ମପୁରଠାରେ ଏକ ଆଧୁନିକ ଜାହାଜ ନିର୍ମାଣ କାରଖାନା (Shipbuilding Unit) ପ୍ରତିଷ୍ଠା ଏବଂ ଐତିହାସିକ ପାଲୁର ବନ୍ଦରର ବିକାଶ ପାଇଁ ଏକ ସ୍ମାରକପତ୍ର ପ୍ରଦାନ କରିଛନ୍ତି।
ଏହି ଅବସରରେ ସାଂସଦ ଡ. ପାଣିଗ୍ରାହୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜୀଙ୍କ ‘ମେରିଟାଇମ୍ ଅମୃତ କାଳ ଭିଜନ ୨୦୪୭’ ଓ ଓଡ଼ିଶାରେ ଚାଲିଥିବା ସାଗରମାଳା ପ୍ରକଳ୍ପର ସଫଳତା ପାଇଁ କେନ୍ଦ୍ର ମନ୍ତ୍ରୀଦ୍ୱୟଙ୍କୁ ଧନ୍ୟବାଦ ଜଣାଇଛନ୍ତି।
ଗଞ୍ଜାମ ଜିଲ୍ଲାର ବାହୁଦା ମୁହାଣଠାରେ ୨୧,୫୦୦ କୋଟି ଟଙ୍କା ବ୍ୟୟରେ ନିର୍ମାଣ ହେବାକୁ ଥିବା ସାଟେଲାଇଟ ମେଜର ପୋର୍ଟ ଏବଂ ଛତ୍ରପୁର ନିକଟରେ ୨,୧୦୦ କୋଟି ଟଙ୍କାର ଟାଇଟାନିୟମ୍ ପ୍ରକଳ୍ପ ପାଇଁ ସେ କେନ୍ଦ୍ର ସରକାରଙ୍କୁ କୃତଜ୍ଞତା ଜଣାଇବା ସହ ଅଞ୍ଚଳର ଅଧିକ ପ୍ରଗତି ପାଇଁ ଦୁଇଟି ପ୍ରମୁଖ ଦାବି ଉପସ୍ଥାପନ କରିଛନ୍ତି:
୧. ଆଧୁନିକ ଜାହାଜ ନିର୍ମାଣ କାରଖାନା (Shipbuilding Unit) ପ୍ରତିଷ୍ଠା:
ଭାରତକୁ ବିଶ୍ୱର ଶୀର୍ଷ ୫ଟି ଜାହାଜ ନିର୍ମାଣକାରୀ ଦେଶ ମଧ୍ୟରେ ସାମିଲ କରିବା ପାଇଁ କେନ୍ଦ୍ର ସରକାରଙ୍କ ଯେଉଁ ଲକ୍ଷ୍ୟ ରହିଛି, ସେଥିପାଇଁ ଗଞ୍ଜାମର ଉପକୂଳବର୍ତ୍ତୀ ଅଞ୍ଚଳ ସବୁଠାରୁ ଉପଯୁକ୍ତ ସ୍ଥାନ। ବାହୁଦା ବନ୍ଦରର ନିକଟବର୍ତ୍ତୀ ଅଞ୍ଚଳ ଏବଂ ଛତ୍ରପୁରର ରେୟାର ଆର୍ଥସ୍ (Rare Earths) ପ୍ଲାଣ୍ଟ ଭଳି ଶିଳ୍ପ ଭିତ୍ତିଭୂମି ଯୋଗୁଁ ଏଠାରେ ଜାହାଜ ନିର୍ମାଣ ପାଇଁ ଆବଶ୍ୟକୀୟ କଞ୍ଚାମାଲ ଏବଂ ସାମଗ୍ରୀ ସହଜରେ ଉପଲବ୍ଧ ହୋଇପାରିବ। ଏହି ପ୍ରକଳ୍ପ ଦ୍ୱାରା ଦକ୍ଷିଣ ଓଡ଼ିଶାର ହଜାର ହଜାର କୁଶଳୀ ଯୁବକଯୁବତୀଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହେବ।
୨. ପ୍ରାଚୀନ ପାଲୁର ବନ୍ଦରର ପୁନରୁଦ୍ଧାର:
ଇତିହାସ ପ୍ରସିଦ୍ଧ ପାଲୁର ବନ୍ଦର (ପ୍ରାଚୀନ ପାଲୌରା) ଦିନେ କଳିଙ୍ଗର ନୌବାଣିଜ୍ୟର ଏକ ପ୍ରମୁଖ କେନ୍ଦ୍ର ଥିଲା। ପ୍ରଧାନମନ୍ତ୍ରୀଙ୍କ ‘ବିକାଶ ଭି, ବିରାସତ ଭି’ ଭିଜନ ଅନୁଯାୟୀ, ଗୁଜରାଟର ଲୋଥାଲ ଭଳି ପାଲୁରଠାରେ ମଧ୍ୟ ଏକ ‘ରାଷ୍ଟ୍ରୀୟ ସାମୁଦ୍ରିକ ଐତିହ୍ୟ କମ୍ପ୍ଲେକ୍ସ’ (National Maritime Heritage Complex) ପ୍ରତିଷ୍ଠା କରାଯିବା ଉଚିତ, ଯାହା ଓଡ଼ିଶାର ଗୌରବମୟ ଇତିହାସକୁ ବିଶ୍ୱ ଦରବାରରେ ପ୍ରଦର୍ଶିତ କରିବ ଏବଂ ପର୍ଯ୍ୟଟନର ବିକାଶ ଘଟାଇବ।
ଯୁଗ୍ମ ବୈଷୟିକ ଟିମ୍କୁ ଓଡ଼ିଶା ଗସ୍ତ ପାଇଁ ନିମନ୍ତ୍ରଣ:
ଏହି ସମସ୍ତ ପ୍ରସ୍ତାବର କ୍ଷେତ୍ର ପରିଦର୍ଶନ ଓ ବୈଷୟିକ ଅନୁଧ୍ୟାନ ପାଇଁ ସାଂସଦ ଡ. ପ୍ରଦୀପ କୁମାର ପାଣିଗ୍ରାହୀ ଉଭୟ ମାନ୍ୟବର କେନ୍ଦ୍ର ମନ୍ତ୍ରୀ ସର୍ବାନନ୍ଦ ସୋନୋୱାଲ, ରାଷ୍ଟ୍ରମନ୍ତ୍ରୀ ଶାନ୍ତନୁ ଠାକୁର, ମନ୍ତ୍ରଣାଳୟର ସଚିବ (Secretary) ଏବଂ ଉଚ୍ଚସ୍ତରୀୟ ବୈଷୟିକ ଦଳ (Technical Team) କୁ ବ୍ରହ୍ମପୁର ସଂସଦୀୟ କ୍ଷେତ୍ର ଗସ୍ତ କରିବା ପାଇଁ ଆନୁଷ୍ଠାନିକ ଭାବେ ନିମନ୍ତ୍ରଣ କରିଛନ୍ତି। ଏହି ମେଗା ପ୍ରକଳ୍ପଗୁଡ଼ିକ କାର୍ଯ୍ୟକାରୀ ହେଲେ ଓଡ଼ିଶାର ସାମୁଦ୍ରିକ ଅର୍ଥନୀତି (Blue Economy) ରେ ଏକ ନୂତନ ବିପ୍ଳବ ଆସିବ ବୋଲି ସେ ଆଶା ବ୍ୟକ୍ତ କରିଛନ୍ତି।