ରଣପୁର: ରଣପୁର ସ୍ଥିତ ନବୀନ ଯୁଗଳ ଆଇ.ଟି.ଆଇ. ପରିସରରେ ‘ଆମ ସାହିତ୍ୟ ଘର’ ର ଏକ ସାଧାରଣ ବୈଠକ ସଭାପତି ଉମାକାନ୍ତ ଦାସଙ୍କ ସଭାପତିତ୍ୱରେ ସଫଳତାର ସହ ଅନୁଷ୍ଠିତ ହୋଇଯାଇଛି। ବୈଠକରେ ସଂସ୍ଥାର ବିଗତ କାର୍ଯ୍ୟକ୍ରମର ସମୀକ୍ଷା କରାଯିବା ସହ ଆଗାମୀ ଦିନର କାର୍ଯ୍ୟପନ୍ଥା ଓ ସାମାଜିକ ଦାୟିତ୍ୱବୋଧ ସମ୍ପର୍କିତ ବିଭିନ୍ନ ପ୍ରସଙ୍ଗ ଉପରେ ଗୁରୁତ୍ୱର ସହ ଆଲୋଚନା କରାଯାଇଥିଲା।
ବୈଠକରେ ବର୍ତ୍ତମାନର ଜଳବାୟୁ ପରିବର୍ତ୍ତନ, ବିଶ୍ୱତାପମାତ୍ରା ବୃଦ୍ଧି ଓ ଏହାର କୁପ୍ରଭାବ ସ୍ୱରୂପ ବିଭିନ୍ନ ପ୍ରାକୃତିକ ବିପର୍ଯ୍ୟୟକୁ ନେଇ ଚିନ୍ତା ପ୍ରକାଶ କରାଯାଇଥିଲା। ପରିବେଶ ସୁରକ୍ଷା ଓ ସବୁଜ ପୃଥିବୀ ଗଠନରେ ସମସ୍ତଙ୍କ ସହଭାଗିତାକୁ ଗୁରୁତ୍ୱ ଦେଇ ଆସନ୍ତା ଅଗଷ୍ଟ ୧ ତାରିଖରେ କଳିଙ୍ଗ ଲୋଟସ ବିଦ୍ୟାଳୟ ପରିସରରେ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜନ କରିବା ପାଇଁ ସର୍ବସମ୍ମତିକ୍ରମେ ନିଷ୍ପତ୍ତି ଗ୍ରହଣ କରାଯାଇଥିଲା।
ଏହି ବୈଠକରେ ଆବାହକ ବିଶ୍ୱରଞ୍ଜନ ଆଚାର୍ଯ୍ୟ, ଅଶୋକ କୁମାର ଦାଶ, ଶୁଭେନ୍ଦ୍ର କୁମାର ସିଂଦେଓ, ସୁଶୀଲ କୁମାର ରଣା, ବିଭୁ ପ୍ରସାଦ ମଲ୍ଲିକ, ବିଭୂତି କୁମାର ଜେନା, ପ୍ରତାପ କୁମାର ମହାନ୍ତିଙ୍କ ସମେତ ଅନେକ ସଦସ୍ୟ ଉପସ୍ଥିତ ରହି ସଂଗଠନର ଉନ୍ନତି ଓ ସମାଜମଙ୍ଗଳ ପାଇଁ ନିଜ ନିଜର ଗଠନମୂଳକ ମତାମତ ପ୍ରଦାନ କରିଥିଲେ।
ସାହିତ୍ୟ, ସଂସ୍କୃତି ଓ ସାମାଜିକ ସଚେତନତାକୁ ନେଇ ନିରନ୍ତର କାର୍ଯ୍ୟ କରୁଥିବା ‘ଆମ ସାହିତ୍ୟ ଘର’ ର ଏହି ନିଷ୍ପତ୍ତି ପରିବେଶ ସୁରକ୍ଷା ଦିଗରେ ଏକ ପ୍ରଶଂସନୀୟ ପଦକ୍ଷେପ ବୋଲି ଉପସ୍ଥିତ ସଦସ୍ୟମାନେ ମତ ପ୍ରକାଶ କରିଥିଲେ।