ଭୁବନେଶ୍ବର: ରାଜ୍ୟର ଅଗ୍ରଣୀ ସାମାଜିକ ସାଂସ୍କୃତିକ ଅନୁଷ୍ଠାନ ‘ଶବରୀ’ ପକ୍ଷରୁ ଇଂରାଜୀ ଖବରକାଗଜ ‘ଦି ପାୟୋନିଅର’ର ଓଡ଼ିଶା ସଂସ୍କରଣର ଆବାସିକ ସମ୍ପାଦକ ଶାରଦା ପ୍ରସନ୍ନ ନନ୍ଦଙ୍କୁ ‘ପ୍ରଭାଦୀପ୍ତ’ ସମ୍ମାନରେ ସମ୍ବର୍ଧିତ କରାଯାଇଛି । ଅନୁଷ୍ଠାନର କର୍ମକର୍ତ୍ତା ଶ୍ରୀଯୁକ୍ତ ନନ୍ଦଙ୍କୁ ତାଙ୍କ ନୟାପଲ୍ଲୀ ସ୍ଥିତ ବାସଭବନରେ ସାକ୍ଷାତ୍ କରି ମାନପତ୍ର, ଉତ୍ତରୀୟ ଓ ଉପଢୈାକନ ପ୍ରଦାନ କରିଥିଲେ।
ଏହି ନିରାଡ଼ମ୍ବର କାର୍ଯ୍ୟକ୍ରମରେ ଅନୁଷ୍ଠାନର ସମ୍ପାଦିକା ସଂଘମିତ୍ରା ପରିଡ଼ା, ସାହିତ୍ୟିକ ସମରେନ୍ଦ୍ର ବଳିଆରସିଂହ, କର୍ପୋରେଟର ଶିବ ନାରାୟଣ ରାୟ, ସାମ୍ବାଦିକ ବଦ୍ରି ନାରାୟଣ ଦାସ, ସପର୍ଯ୍ୟା ପରିଡ଼ା ପ୍ରମୁଖ ଉପସ୍ଥିତ ରହି ଶ୍ରୀଯୁକ୍ତ ନନ୍ଦଙ୍କୁ ସମ୍ବର୍ଧିତ କରିଥିଲେ। ଏହି ଅବସରରେ ଶ୍ରୀଯୁକ୍ତ ନନ୍ଦଙ୍କ ଧର୍ମପତ୍ନୀ କିରଣବାଳା ନନ୍ଦ ଉପସ୍ଥିତ ଥିଲେ।ସୂଚନାଯୋଗ୍ୟ, ଶ୍ରୀଯୁକ୍ତ ନନ୍ଦ ଗତ ଛ’ ଦଶନ୍ଧି ଧରି ଗଣମାଧ୍ୟମ ଜଗତରେ ସକ୍ରିୟ ଅଛନ୍ତି।
ସମାଜର ସହ ସମ୍ପାଦକ ଭାବେ ସେ କାର୍ଯ୍ୟ ଆରଂଭ କରିଥିଲେ। ପରବର୍ତ୍ତୀ ସମୟରେ ହିନ୍ଦୁସ୍ତାନ ଷ୍ଟାଣ୍ଡାର୍ଡ, ଟେଲିଗ୍ରାଫ୍, ସନଡେ, ସମ୍ବାଦ, ଏସିଆନ୍ ଏଜ୍ ଓ ୨୦୦୫ ମସିହାରୁ ଦି ପାୟୋନିଅରର ଆବାସିକ ସମ୍ପାଦକ ଭାବେ କାର୍ଯ୍ୟ କରୁଛନ୍ତି ।
୧୯୪୨ ମସିହା ମାର୍ଚ୍ଚ ୨୨ ତାରିଖରେ ଜନ୍ମିତ ଶ୍ରୀଯୁକ୍ତ ନନ୍ଦ ଉଭୟ ଓଡ଼ିଆ ଓ ଇଂରାଜୀ ସାମ୍ବାଦିକତା କ୍ଷେତ୍ରରେ ପ୍ରସିଦ୍ଧି ଲାଭ କରିଛନ୍ତି।