ନୂଆଦିଲ୍ଲୀ: ଇ-୨୦ ପେଟ୍ରୋଲ ନୀତି ବିରୁଦ୍ଧରେ ପ୍ରସ୍ତାବିତ ପ୍ରତିବାଦ ଶୋଭାଯାତ୍ରା ଏବଂ ଅନଶନ ପୂର୍ବରୁ ସାମାଜିକ କର୍ମୀ ତହସିନ ପୁନାୱାଲା ଦିଲ୍ଲୀ ପୋଲିସ ଉପରେ ଗମ୍ଭୀର ଅଭିଯୋଗ ଆଣିଛନ୍ତି। ତାଙ୍କୁ ପୋଲିସ ଗୃହବନ୍ଦୀ କରିଥିବା ଅଭିଯୋଗ କରିଛନ୍ତି। ଶ୍ରୀ ପୁନାୱାଲା ଶନିବାର ସୋସିଆଲ ମିଡିଆରେ ଅନେକ ଭିଡିଓ ସେୟାର କରିଛନ୍ତି, ଯେଉଁଥିରେ ତାଙ୍କ ଘର ବାହାରେ ବହୁ ସଂଖ୍ୟକ ପୋଲିସ କର୍ମଚାରୀ ନିୟୋଜିତ ହୋଇଥିବାର ଦେଖାଯାଇଛି। ସେ ଦାବି କରିଛନ୍ତି ଯେ, ସରକାର ତାଙ୍କ ପ୍ରତିବାଦକୁ ଭୟ କରୁଛନ୍ତି।
ଏକ ସୋସିଆଲ ମିଡିଆ ପୋଷ୍ଟରେ ତେହସିନ ପୁନାୱାଲା କହିଛନ୍ତି ଯେ, ମହିଳା ପୋଲିସ ଅଧିକାରୀମାନଙ୍କ ସମେତ ଦିଲ୍ଲୀ ପୋଲିସର ଏକ ବଡ଼ ଦଳ ତାଙ୍କୁ ଘରୁ ବାହାରକୁ ଯିବାରୁ ବାରଣ କରିଛନ୍ତି। ସେ ଅଭିଯୋଗ କରିଛନ୍ତି ଯେ, କେନ୍ଦ୍ର ସଡ଼କ ପରିବହନ ଏବଂ ରାଜପଥ ମନ୍ତ୍ରୀ ନୀତିନ ଗଡକରୀ ଇ-୨୦ ପେଟ୍ରୋଲ ପ୍ରତିବାଦକୁ ଭୟ କରୁଛନ୍ତି।
ଅନ୍ୟ ଏକ ଭିଡିଓରେ ଶ୍ରୀ ପୁନାୱାଲା ଜଣେ ପୋଲିସ ଅଧିକାରୀଙ୍କୁ ପଚାରୁଛନ୍ତି ଯେ, ତାଙ୍କୁ କେଉଁ ଆଧାରରେ ଅଟକ ରଖାଯାଇଛି। ସେ ଦାବି କରିଛନ୍ତି ଯେ, ତାଙ୍କୁ କୌଣସି ଲିଖିତ ନିର୍ଦ୍ଦେଶ କିମ୍ବା ଡକ୍ୟୁମେଣ୍ଟ ଦେଖାଯାଇ ନାହିଁ।
ଭିଡିଓରେ ସେ କହୁଛନ୍ତି ଯେ, “କୌଣସି କାଗଜପତ୍ର ନାହିଁ, କିଛି ନାହିଁ… ମୋତେ ଗୃହବନ୍ଦୀ କରାଯାଇଛି। ସ୍ୱାଧୀନତା ଦିବସର ୧୫ ଦିନ ପୂର୍ବରୁ ମୋତେ ଏହିପରି ଅଟକାଯାଉଛି।”