ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ଜବରଦଖଲକାରୀଙ୍କ ବିରୋଧରେ ଏବେ କଡ଼ା ଆଭିମୁଖ୍ୟ ଗ୍ରହଣ କରିଛି ବିଏମ୍ସି ଓ ବିଡିଏ। ନୀଳାଦ୍ରି ବିହାର ଅଞ୍ଚଳରେ ଥିବା ଟ୍ରାଂଜିଟ୍ ହାଉସ୍ରୁ ଜବରଦଖଲ ଉଚ୍ଛେଦ ପାଇଁ ପ୍ରସ୍ତୁତି ଶେଷ ହୋଇଛି। ଏହି ଅଭିଯାନରେ ୩୩୦ରୁ ଅଧିକ ଘର ଭଙ୍ଗାଯିବାକୁ ଥିବା ଜଣାପଡ଼ିଛି।
ସୂଚନା ଅନୁସାରେ, ନୀଳାଦ୍ରି ବିହାର ଅଞ୍ଚଳର ଟ୍ରାଂଜିଟ୍ ହାଉସ୍ରେ ପ୍ରାୟ ୮୯୦ଟି ଘର ରହିଛି। ଦୀର୍ଘଦିନ ଧରି ଏଠାରେ ଅନେକ ପରିବାର ବସବାସ କରୁଥିଲେ। ତେବେ ସେମାନଙ୍କ ମଧ୍ୟରୁ ଅନେକଙ୍କୁ ସରକାରଙ୍କ ପକ୍ଷରୁ ନିକଟସ୍ଥ ବୁଧବିହାର ଅଞ୍ଚଳର ହାଉସିଂ ପ୍ରୋଜେକ୍ଟରେ ଥଇଥାନ କରାଯାଇଛି।
ଥଇଥାନ ପାଇଁ ନୂଆ ଘର ମିଳିବା ପରେ ମଧ୍ୟ କିଛି ଲୋକ ଟ୍ରାଂଜିଟ୍ ହାଉସ୍ ଖାଲି କରିନଥିବା ଅଭିଯୋଗ ହୋଇଛି। ଫଳରେ ଜବରଦଖଲ ଉଚ୍ଛେଦ ପାଇଁ ବିଏମ୍ସି ଓ ବିଡିଏ ପକ୍ଷରୁ ପଦକ୍ଷେପ ନିଆଯାଇଛି।
ଉଚ୍ଛେଦ ପ୍ରକ୍ରିୟା ସମୟରେ ଆଇନଶୃଙ୍ଖଳା ପରିସ୍ଥିତି ଏଡ଼ାଇବା ପାଇଁ ଚନ୍ଦ୍ରଶେଖରପୁର ଥାନା ପୁଲିସ ମଧ୍ୟ ଉପସ୍ଥିତ ରହିବ। ପ୍ରଶାସନିକ ଟିମ୍ ଓ ପୁଲିସ ଉପସ୍ଥିତିରେ ୩୩୦ରୁ ଅଧିକ ଘର ଉଚ୍ଛେଦ କରାଯିବାକୁ ଥିବାରୁ ନୀଳାଦ୍ରି ବିହାର ଅଞ୍ଚଳରେ ଏବେ ଚର୍ଚ୍ଚା ଜୋର ଧରିଛି।
ଅନ୍ୟପକ୍ଷରେ, ଥଇଥାନ ପରେ ମଧ୍ୟ ସରକାରୀ ଜମି କିମ୍ବା ଟ୍ରାଂଜିଟ୍ ହାଉସ୍ ଖାଲି ନକରିଥିବା ଲୋକଙ୍କ ବିରୋଧରେ ଆଗକୁ ମଧ୍ୟ କଡ଼ା ପଦକ୍ଷେପ ନିଆଯାଇପାରେ। ଏହି ଉଚ୍ଛେଦ ଅଭିଯାନ ପରେ ଅଞ୍ଚଳରେ ଜବରଦଖଲ ସମସ୍ୟାରେ କେତେଦୂର ରୋକ୍ ଲାଗିବ, ତାହା ଉପରେ ନଜର ରହିଛି।