ଭୁବନେଶ୍ୱର: ଏମ୍ଏମ୍ଡିଆର୍ ସଂଶୋଧନ ବିଲ୍ ୨୦୨୬କୁ ନେଇ ବିଜେପି ଓ ବିଜେଡି ମଧ୍ୟରେ ବାଦବିବାଦ ତୀବ୍ର ହୋଇଛି। ନବୀନ ପଟ୍ଟନାୟକଙ୍କ ମନ୍ତବ୍ୟକୁ ଧର୍ମେନ୍ଦ୍ର ପ୍ରଧାନ ଓ ଖଣିମନ୍ତ୍ରୀ ବିଭୂତି ଭୂଷଣ ଜେନା ସମାଲୋଚନା କରିବା ପରେ ବିଜେଡି ପାଲଟା ଜବାବ ଦେଇଛି।
ଶଙ୍ଖ ଭବନରେ ସାମ୍ବାଦିକ ସମ୍ମିଳନୀ କରି ବରିଷ୍ଠ ନେତା ଅରୁଣ ସାହୁ ଧର୍ମେନ୍ଦ୍ରଙ୍କ ବୟାନକୁ ‘ପିଲାଳିଆମି ଓ ହାସ୍ୟାସ୍ପଦ’ ବୋଲି କହିଛନ୍ତି। ନବୀନ ସରକାର ସମୟରେ ଓଡ଼ିଶାର ଋଣ ଭାର ଦେଶରେ ସର୍ବନିମ୍ନ ଥିଲା ବୋଲି ସେ ଦାବି କରିଛନ୍ତି। ଏହାସହ ଏମ୍ଏମ୍ଡିଆର୍ ସଂଶୋଧନ ବିଲ୍କୁ ନେଇ ବିଜେପିକୁ ଖୋଲା ବିତର୍କ ପାଇଁ ଆହ୍ୱାନ ଦେଇଛନ୍ତି।
ଅରୁଣ ସାହୁ କହିଛନ୍ତି, ଖଣିରୁ ବକେୟା ରାଜସ୍ୱ ଭାବେ ଓଡ଼ିଶା ପ୍ରାୟ ଦେଢ଼ ଲକ୍ଷ କୋଟି ଟଙ୍କା ଓ ପ୍ରତିବର୍ଷ ଅତିରିକ୍ତ ୧୨ ହଜାର କୋଟି ପାଇବାର ଥିଲା। କିନ୍ତୁ ଏମ୍ଏମ୍ଡିଆର୍ ସଂଶୋଧନ ବିଲ୍ ମାଧ୍ୟମରେ ରାଜ୍ୟର ନ୍ୟାର୍ଯ୍ୟ ପ୍ରାପ୍ୟକୁ କେନ୍ଦ୍ର ହଡ଼ପ କରିନେଇଛି ବୋଲି ବିଜେଡି ଅଭିଯୋଗ କରିଛି।
ସେହିପରି ବିଜେଡି ନେତା ଭୃଗୁ ବକ୍ସିପାତ୍ର କହିଛନ୍ତି, ବିଲ୍ ଯୋଗୁଁ ଓଡ଼ିଶାର କ୍ଷତି ହେବ ନାହିଁ ବୋଲି ବିଜେପିର ଦାବି ବାସ୍ତବତାଠାରୁ ଦୂରରେ। ଏନେଇ ବିଜେପି ନିଜ ଆଭିମୁଖ୍ୟ ସ୍ପଷ୍ଟ କରୁ ବୋଲି ସେ ଦାବି କରିଛନ୍ତି।