ରେଢ଼ାଖୋଲ (କନ୍ଦର୍ପ ବେହେରା): ରେଢ଼ାଖୋଲ ଉପଖଣ୍ଡ ସ୍ୱାସ୍ଥ୍ୟ କେନ୍ଦ୍ର ପରିସରରେ ଦୀର୍ଘ ସାତ ମାସ ହୋଇ ପଡିରହିଥିବା ରକ୍ତ ଭଣ୍ଡାରକୁ ତୁରନ୍ତ କାର୍ଯ୍ୟକ୍ଷମ ଦାବିରେ ଆଜି ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ସ୍ଥାନୀୟ ଜନ ସାଧାରଣ ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ। ରେଢ଼ାଖୋଲ ରକ୍ତ ଭଣ୍ଡାର ଦୀର୍ଘ ଦିନ ହେଲା ବନ୍ଦ ରହିବା ଫଳରେ ରୋଗୀମାନେ ରକ୍ତ ପାଇଁ ସମ୍ବଲପୁର, ଅନୁଗୁଳ ଦୌଡିବାକୁ ପଡୁଛି। ବିଶେଷ କରି ଗର୍ଭବତୀ ମହିଳା ଓ ଦୁର୍ଘଟଣାଗ୍ରସ୍ତ ରୋଗୀ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ରକ୍ତ ଭଣ୍ଡାର କାର୍ଯ୍ୟକ୍ଷମ ନହେବା ପର୍ଯ୍ୟନ୍ତ ଧାରଣା ଜାରି ରହିବ ବୋଲି ଧାର ଣା ରେ ବସିଥିବା ବ୍ୟକ୍ତିମାନେ ପ୍ରକାଶ କରିଛନ୍ତି।
ଦୀର୍ଘ ଦିନ ହେଲା ବନ୍ଦ ହୋଇ ପଡ଼ିଥିବା ରକ୍ତ ଭଣ୍ଡାରକୁ ତୁରନ୍ତ କାର୍ଯ୍ୟକ୍ଷମ କରିବା ପାଇଁ ରେଢ଼ାଖୋଲ ମାନ୍ୟବର ଜିଲ୍ଲାପାଳଙ୍କୁ ପୂର୍ବରୁ ଦାବିପତ୍ର ଦିଆଯାଇଥିଲା। ପ୍ରଶାସନକୁ ଅଗଷ୍ଟ ୨୪ ତାରିଖ ସୁଦ୍ଧା ସମସ୍ୟାର ସମାଧାନ ପାଇଁ ସମୟ ଦିଆଯାଇଥିଲା, ହେଲେ ଦୁଃଖର ବିଷୟ ପ୍ରଶାସନ ରକ୍ତ ଭଣ୍ଡାର ଚାଲୁ କରିବାରେ ସମ୍ପୂର୍ଣ୍ଣ ବିଫଳ ହୋଇଥିବା ନେଇ ଆଜି ଜନପ୍ରତିନିଧି ଠାରୁ ଆରମ୍ଭ କରି ଜନସାଧାରଣ ଧାରଣାରେ ବସିଥିଲେ।
ଏପରିକି ଲାଇସେନ୍ସ ନବୀକରଣ (Licence Renewal) ଅବହେଳା ଯୋଗୁଁ ରକ୍ତ ଭଣ୍ଡାର ବନ୍ଦ ରହିବା ଫଳରେ ଆମ ଅଞ୍ଚଳର ଗରୀବ ରୋଗୀ, ଗର୍ଭବତୀ ମହିଳା, ଦୁର୍ଘଟଣାଗ୍ରସ୍ତ ଏବଂ ଜରୁରୀକାଳୀନ ରୋଗୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏହି ଧାରଣାରେ ବ୍ଲକ ଅଧ୍ୟକ୍ଷ ପ୍ରଦୀପ ପ୍ରଧାନ, ସମିତିସଭ୍ୟ ପ୍ରବୀଣ କୁମାର ପ୍ରଧାନ, ଯୁବ ନେତା ଉମେଶ ଦେହୁରୀ ପ୍ରମୁଖ ଧାରଣାରେ ବସିଥିଲେ। ଧାରଣା ସ୍ଥଳକୁ ରେଢ଼ାଖୋଲ ଉପଜିଲ୍ଲାପାଳ ରଶ୍ମିରଂଜନ ମହନ୍ତ ପହଂଚି ପ୍ରତିଶ୍ରୁତି ଦେବା ପରେ ଧାରଣା ସ୍ଥଗୀତ ହୋଇଥିଲା।