ବହୁଜନ ସମାଜ ପାର୍ଟି (ବିଏସ୍ପି)ର ଅଧ୍ୟକ୍ଷ ମାୟାବତୀ ଜମ୍ମୁ କାଶ୍ମୀର ବିଷୟକୁ ନେଇ ପୁଣି ଥରେ ମୋଦି ସରକାରଙ୍କୁ ସମର୍ଥନ କରିଥିବାବେଳେ କଂଗ୍ରେସ ସମେତ ଅନ୍ୟ ବିରୋଧୀ ଦଳଙ୍କ ଶ୍ରୀନଗର ଗସ୍ତକୁ ନେଇ କଡ଼ା ସମାଲୋଚନା କରିଛନ୍ତି । ରାହୁଲ ଗାନ୍ଧୀ ଜାମ୍ମୁ ଓ କାଶ୍ମୀର ଯିବା ପୂର୍ବରୁ ଥରେ ଚିନ୍ତା କରିବାର ଥିଲା ବୋଲି ମାୟାବତୀ କହିଛନ୍ତି । ସେ କହିଛନ୍ତି ଯେ ବାବା ସାହେବ ଆମ୍ବେଦକର ସର୍ବଦା ଦେଶରେ ସମାନତା, ଏକତା ଏବଂ ଅଖଣ୍ଡତା ବଜାୟ ରଖିବାକୁ ଜାମ୍ମୁ ଓ କାଶ୍ମୀରରେ ଧାରା ୩୭୦ ଲାଗୁ କରିବାକୁ କେବେବି ସମର୍ଥନ କରୁ ନ ଥିଲେ । ସେଥିପାଇଁ ବିଏସ୍ପି ମଧ୍ୟ ସଂସଦରେ କେନ୍ଦ୍ର ସରକାରଙ୍କ ପ୍ରସ୍ତାବକୁ ସମର୍ଥନ କରିଛି । ଦୀର୍ଘ ୬୯ ବର୍ଷ ପରେ ଧାରା ୩୭୦ ଉଚ୍ଛେଦ ହେବାରୁ ସେଠାରେ ଥିବା ସ୍ଥିତି ସୁଧୁରିବାକୁ ସମୟ ନିଶ୍ଚିତ ଲାଗିବ । ଏଥିପାଇଁ ଅପେକ୍ଷା କରିବାକୁ ସବୁଠାରୁ ଭଲ ହେବ, ଯାହାକୁ କୋର୍ଟ ମଧ୍ୟ କହିଛନ୍ତି । କିନ୍ତୁ ଏଭଳି ସ୍ଥିତି ବିନା ଅନୁମତିରେ କଂଗ୍ରେସ ଓ ଅନ୍ୟ ଦଳର ବିରୋଧୀଙ୍କ କାଶ୍ମୀର ଗସ୍ତକୁ କଡ଼ା ସମାଲୋଚନା କରିଛନ୍ତି ମାୟାବତୀ । ବିରୋଧୀ ଦଳ ସେଠାକୁ ଯିବା ପୂର୍ବରୁ ଥରେ ବିଚାର କରିବା ଉଚିତ ଥିଲା ବୋଲି କହିଛନ୍ତି ମାୟାବତୀ । ଗତ ଶନିବାର ରାହୁଲ ଗାନ୍ଧୀଙ୍କ ସହିତ ରାଜ୍ୟସଭା ସାଂସଦ ଗୁଲାମ ନବୀ ଆଜାଦ, ଆନନ୍ଦ ଶର୍ମା, ଶରଦ ଯାଦବ, କମ୍ୟୁନିଷ୍ଟ ନେତା ସୀତାରାମ ୟେଚୁରୀ, ଡି. ରାଜା, ଡିଏମ୍କେର ଟି. ସିବା, ମନୋଜ ଝା ଏବଂ ଟିଏମ୍ସି ଦିନେଶ ତ୍ରିବେଦୀ ପ୍ରମୁଖ ଶ୍ରୀନଗର ଯାଇଥିଲେ । ମାତ୍ର ପ୍ରଶାସନ ସେମାନଙ୍କୁ ଶ୍ରୀନଗର ବିମାନବନ୍ଦରରୁ ଫେରାଇ ଦେଇଥିଲେ ।
