କବିସୂର୍ଯ୍ୟନଗର: ସାମାନ୍ୟ କଥାକୁ କେନ୍ଦ୍ର କରି ଜଣେ ଯୁବକଙ୍କୁ ଛୁରାମାଡ଼ ଘଟଣା ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି। ଦ୍ରୁତ ଗତିରେ ବାଇକ୍ ଚଳାଇବାକୁ ପ୍ରତିବାଦ କରିବାରୁ ଏହି ଆକ୍ରମଣ ହୋଇଥିବା ଅଭିଯୋଗ ହୋଇଛି। ଆହତ ଯୁବକ ହେଲେ ବରିଡା ଗ୍ରାମର ପଣ୍ଡା ପ୍ରଧାନ।
ସୂଚନା ଅନୁଯାୟୀ, ସନ୍ଧ୍ୟା ସମୟରେ ପଣ୍ଡା ପ୍ରଧାନ ରାସ୍ତାକଡ଼ରେ ଠିଆ ହୋଇଥିଲେ। ଏହି ସମୟରେ କିଛି ଯୁବକ ଦୁଇଚକିଆ ଯାନରେ ଦ୍ରୁତ ଗତିରେ ସେହି ରାସ୍ତା ଦେଇ ଯାଉଥିଲେ। ବିପଦଜନକ ଭାବେ ଗାଡ଼ି ଚଳାଇବାକୁ ପଣ୍ଡା ପ୍ରଧାନ ପ୍ରତିବାଦ କରିଥିଲେ। ଏହାକୁ ନେଇ ତାଙ୍କ ସହ ଯୁବକମାନଙ୍କର ବଚସା ହୋଇଥିଲା।
କିଛି ସମୟ ପରେ ବଚସା ଉଗ୍ର ରୂପ ନେଇଥିବା ବେଳେ ଯୁବକମାନଙ୍କ ମଧ୍ୟରୁ ଜଣେ ପଣ୍ଡା ପ୍ରଧାନଙ୍କୁ ଛୁରୀରେ ଆକ୍ରମଣ କରିଥିବା ଅଭିଯୋଗ ହୋଇଛି। ଛୁରାମାଡ଼ରେ ସେ ଗୁରୁତର ଆହତ ହୋଇଥିଲେ।
ଘଟଣା ପରେ ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ତୁରନ୍ତ ଆସ୍କା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ତାଙ୍କର ଚିକିତ୍ସା ଚାଲିଛି।
ଅନ୍ୟପକ୍ଷରେ, ଛୁରାମାଡ଼ ଖବର ପ୍ରଚାର ହେବା ପରେ ବରିଡା ଗ୍ରାମରେ ଉତ୍ତେଜନା ପ୍ରକାଶ ପାଇଥିଲା। ଖବର ପାଇ ପୁରୁଷୋତ୍ତମପୁର ଉପଖଣ୍ଡ ପୁଲିସ ଅଧିକାରୀ ଏବଂ କବିସୂର୍ଯ୍ୟନଗର ଥାନା ପୁଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତି ନିୟନ୍ତ୍ରଣ କରିଥିଲେ।
ପୁଲିସ ଘଟଣାରେ ଜଣେ ସନ୍ଦିଗ୍ଧଙ୍କୁ ଅଟକ ରଖି ପଚରାଉଚରା କରୁଛି। ଛୁରାମାଡ଼ର ପ୍ରକୃତ କାରଣ ଏବଂ ଘଟଣାରେ ଅନ୍ୟ କେହି ସମ୍ପୃକ୍ତ ଅଛନ୍ତି କି ନାହିଁ, ସେନେଇ ତଦନ୍ତ ଜାରି ରହିଛି।