ୱାସିଂଟନ୍: ମଧ୍ୟପ୍ରାଚ୍ୟରେ ଉତ୍ତେଜନା ସର୍ବୋଚ୍ଚ ସ୍ତରରେ ପହଞ୍ଚିଛି। ଆମେରିକା ସେନା ଏକ ବଡ଼ ସାମରିକ ଅଭିଯାନ ଚଲାଇ ଇରାନ୍ର ୫ଟି ଅଶୋଧିତ ତୈଳ ଟ୍ୟାଙ୍କର୍କୁ ଆକ୍ରମଣ କରି ସମ୍ପୂର୍ଣ୍ଣ ନଷ୍ଟ କରିଦେଇଛି। ଗତ ଦୁଇ ଦିନ ମଧ୍ୟରେ ଇରାନ୍ର ‘ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କୋର୍’ (ଆଇଆରଜିସି) ଆମେରିକୀୟ ଯୁଦ୍ଧପୋତ ଉପରେ ବାଲିଷ୍ଟିକ୍ କ୍ଷେପଣାସ୍ତ୍ର ମାଡ଼ କରିବାକୁ ଚେଷ୍ଟା କରିଥିବାରୁ ଏହାର ଜବାବରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ଆମେରିକାର କେନ୍ଦ୍ରୀୟ କମାଣ୍ଡ ସ୍ପଷ୍ଟ କରିଛି।
ଆମେରିକା କେନ୍ଦ୍ରୀୟ କମାଣ୍ଡର ସୂଚନା ଅନୁଯାୟୀ, ଆକ୍ରମଣ କରାଯାଇଥିବା ଟ୍ୟାଙ୍କର୍ଗୁଡ଼ିକ ମଧ୍ୟରୁ ୪ଟି ଓମାନ ଉପସାଗରରେ ଏବଂ ଗୋଟିଏ ଖାର୍ଗ ଦ୍ୱୀପ ନିକଟରେ ରହିଥିଲା। ତେବେ କ୍ଷେପଣାସ୍ତ୍ର ମାଡ଼ ପୂର୍ବରୁ ଆମେରିକୀୟ ସେନା ଟ୍ୟାଙ୍କର୍ର କର୍ମଚାରୀମାନଙ୍କୁ ଜାହାଜ ଛାଡ଼ି ପଳାଇବାକୁ ନିର୍ଦ୍ଦେଶ ଦେଇଥିଲେ। ଏହି ଆକ୍ରମଣ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନୂତନ ସାମରିକ ଓ ଅର୍ଥନୈତିକ ରଣନୀତିର ଅଂଶବିଶେଷ, ଯାହାଦ୍ୱାରା ହର୍ମୁଜ୍ ପ୍ରଣାଳୀ ନିକଟରେ ଇରାନ୍ର ଆର୍ଥିକ ସମ୍ବଳ ପ୍ରବାହକୁ ନିରୁତ୍ସାହିତ କରାଯାଇ ପାରିବ।
ଅନ୍ୟପଟେ, ଆମେରିକାର ଏହି ବୃହତ୍ ଆକ୍ରମଣର ଜବାବରେ ଇରାନ୍ ତୁରନ୍ତ ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ତେହେରାନ ପକ୍ଷରୁ ଜୋର୍ଡାନରେ ଥିବା ଆମେରିକାର ଅଲ୍-ଅଜରାକ୍ ସାମରିକ ଘାଟିକୁ ଲକ୍ଷ୍ୟ କରି ଏକାଧିକ ବାଲିଷ୍ଟିକ୍ କ୍ଷେପଣାସ୍ତ୍ର ମାଡ଼ କରାଯାଇଛି। ଏହାସହ ସମୁଦ୍ରରେ ଥିବା ଆମେରିକୀୟ ଯୁଦ୍ଧପୋତଗୁଡ଼ିକୁ ମଧ୍ୟ ଟାର୍ଗେଟ୍ କରାଯାଇଥିବା ବେଳେ ଉଭୟ ଦେଶ ମଧ୍ୟରେ ଆକ୍ରମଣ ଓ ପ୍ରତ୍ୟାକ୍ରମଣ ତୀବ୍ର ହେବା ପରେ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ବୃଦ୍ଧି ପାଇଛି।