ଭୁବନେଶ୍ବର: ଲଘୁଚାପ ପ୍ରଭାବରେ ମାଲକାନଗିରି ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ଲାଗିରହିଥିବାରୁ ସାଧାରଣ ଜନଜୀବନ ସମ୍ପୂର୍ଣ୍ଣ ଅସ୍ତବ୍ୟସ୍ତ ହୋଇପଡ଼ିଛି। ଦିନରାତି ଅବିଶ୍ରାନ୍ତ ଗତିରେ ବର୍ଷା ଜାରି ରହିଥିବାରୁ ଲୋକଙ୍କ ପାଇଁ ଘରୁ ବାହାରକୁ ଯିବା ଆସିବା ଅତ୍ୟନ୍ତ କଷ୍ଟସାଧ୍ୟ ହୋଇପଡ଼ିଛି। ପ୍ରବଳ ବର୍ଷା ହେତୁ ଜିଲ୍ଲାର ସମସ୍ତ ନଈ, ନାଳ ଓ ଛୋଟବଡ଼ ଜଳାଶୟଗୁଡ଼ିକରେ ଜଳପତ୍ତନ ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି।
ବର୍ତ୍ତମାନ ଚାଲାଣଗୁଡ଼ା, ପାଙ୍ଗାମ, ପଟେରୁ, କାଙ୍ଗୁରକୋଣ୍ଡା, କନ୍ୟାଶ୍ରମର ସାବେରୀ, ଏମଭି-୯୦ ଏବଂ ପଡ଼ିଆ ଆଦି ସ୍ଥାନରେ ଥିବା ପ୍ରମୁଖ ନଦୀ ପୋଲଗୁଡ଼ିକ ଉପରେ ୨ରୁ ୩ ଫୁଟ୍ ଉଚ୍ଚତାର ବନ୍ୟାଜଳ ପ୍ରବାହିତ ହେଉଛି। ଫଳରେ ସମ୍ପୃକ୍ତ ରାସ୍ତାଗୁଡ଼ିକରେ ଯାତାୟାତ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଛି। ପୋଲ ଉପରେ ଜଳ ପ୍ରବାହିତ ହେଉଥିବାରୁ ଉଭୟ ପାର୍ଶ୍ୱରେ ଶହ ଶହ ଯାନବାହାନ ଅଟକି ରହିବା ସହ ଅନେକ ଯାତ୍ରୀ ଅସହାୟ ଭାବେ ବନ୍ଦୀ ଅବସ୍ଥାରେ ଦୀର୍ଘ ସମୟ ଧରି ରହିଛନ୍ତି। ଏହାସହିତ ନଦୀ ତଟବର୍ତ୍ତୀ ଅଞ୍ଚଳଗୁଡ଼ିକରେ ବନ୍ୟାଜଳ ପଶିଯିବା ଫଳରେ ଏକର ଏକର ଧାନ ଜମି ଜଳମଗ୍ନ ହୋଇରହିଛି, ଯାହା ଚାଷୀଙ୍କ ମଧ୍ୟରେ ଚିନ୍ତା ବଢ଼ାଇଦେଇଛି।
ସରକାରୀ ତଥ୍ୟ ଅନୁଯାୟୀ, ମାଲକାନଗିରି ଜିଲ୍ଲାରେ ସର୍ବମୋଟ ୮୦୪.୧ ମିଲିମିଟର ବର୍ଷା ହୋଇଥିବା ରେକର୍ଡ କରାଯାଇଛି ଏବଂ ବିଗତ ୨୪ ଘଣ୍ଟା ମଧ୍ୟରେ ଜିଲ୍ଲାର ହାରାହାରି ବର୍ଷା ପରିମାଣ ୧୧୪.୮୭ ମିଲିମିଟର ରହିଛି। ଜିଲ୍ଲାର ସାତଟି ବ୍ଲକ ମଧ୍ୟରୁ ଚିତ୍ରକୋଣ୍ଡା ବ୍ଲକରେ ସର୍ବାଧିକ ୧୯୨ ମିଲିମିଟର ବର୍ଷା ରେକର୍ଡ କରାଯାଇଥିବା ବେଳେ ଖଇରପୁଟ ବ୍ଲକରେ ୧୮୨ ମିଲିମିଟର, ମାଲକାନଗିରି ବ୍ଲକରେ ୧୩୬.୮ ମିଲିମିଟର, କୋରୁକୋଣ୍ଡା ବ୍ଲକରେ ୧୩୪ ମିଲିମିଟର, ମାଥିଲି ବ୍ଲକରେ ୮୫ ମିଲିମିଟର, କାଲିମେଳା ବ୍ଲକରେ ୮୫ ମିଲିମିଟର ଏବଂ ପଡ଼ିଆ ବ୍ଲକରେ ସର୍ବନିମ୍ନ ୨୯.୩ ମିଲିମିଟର ବର୍ଷା ହୋଇଛି। ପରିସ୍ଥିତିକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ପକ୍ଷରୁ ବନ୍ୟା ପ୍ରଭାବିତ ଓ ଜଳବନ୍ଦୀ ଲୋକଙ୍କ ପାଇଁ ତୁରନ୍ତ ରିଲିଫ୍ କାର୍ଯ୍ୟ ଆରମ୍ଭ କରାଯାଇଛି। ପ୍ରଶାସନ ତରଫରୁ ପଟେରୁ ଅଞ୍ଚଳରେ ଜଳବନ୍ଦୀ ହୋଇ ରହିଥିବା ପ୍ରାୟ ୪୦୦ ଜଣ ଲୋକଙ୍କୁ ରନ୍ଧା ଖାଦ୍ୟ ଯୋଗାଇ ଦିଆଯାଇଛି। ବର୍ତ୍ତମାନ ସୁଦ୍ଧା ସମଗ୍ର ମାଲକାନଗିରି ଜିଲ୍ଲାରେ ବର୍ଷା ଲାଗି ରହିଥିବାରୁ ପ୍ରଶାସନ ପକ୍ଷରୁ ସ୍ଥିତି ଉପରେ ତୀକ୍ଷ୍ଣ ନଜର ରଖାଯାଇଛି।