ରାଞ୍ଚି: ଝାଡ଼ଖଣ୍ଡର ପାଲାମୁ ଜିଲ୍ଲାରେ କରମ୍ ପୂଜା ଉତ୍ସବବେଳେ ଏକ ଗଭୀର ଦୁଃଖଦ ଘଟଣା ଘଟିଯାଇଛି। କରମ ଡାଳ ବିସର୍ଜନ କରିବା ସମୟରେ ବୁଧବାର ପୃଥକ୍ ପୃଥକ୍ ସ୍ଥାନରେ ପାଣିରେ ବୁଡ଼ି ୬ ଜଣ ଶିଶୁଙ୍କର ମୃତ୍ୟୁ ଘଟିଛି। ଏହି ଅଭାବନୀୟ ଘଟଣା ପରେ ସମଗ୍ର ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି।
ବୋକ୍ୟା ଅଞ୍ଚଳରେ କୋଏଲ ନଦୀ ନିକଟସ୍ଥ ଏକ ପୋଖରୀରେ କରମ ଡାଳ ବିସର୍ଜନ କରୁଥିବା ସମୟରେ ୫ ଜଣ ଶିଶୁ ଗଭୀର ପାଣିକୁ ଚାଲିଯାଇ ବୁଡ଼ି ଯାଇଥିଲେ। ଅନ୍ୟ ଏକ ପୃଥକ୍ ଘଟଣାରେ ନାନି ଝରିଆ ଅଞ୍ଚଳରେ କରମ ଡାଳ ବିସର୍ଜନ ବେଳେ ଜଣେ ୧୫ ବର୍ଷୀୟା କିଶୋରୀଙ୍କର ମଧ୍ୟ ପାଣିରେ ବୁଡ଼ି ପ୍ରାଣହାନି ଘଟିଛି।
ପୂଜା ଶେଷରେ କରମ ଡାଳ ବିସର୍ଜନ ହେଉଛି ଏହି ପର୍ବର ଅନ୍ତିମ ଓ ଗୁରୁତ୍ୱପୂର୍ଣ୍ଣ ପରମ୍ପରା। କରମ ପର୍ବ ମୁଖ୍ୟତଃ ଝାଡ଼ଖଣ୍ଡ, ଓଡ଼ିଶା, ପଶ୍ଚିମବଙ୍ଗ, ଛତିଶଗଡ଼, ଆସାମ ଓ ବିହାର ଆଦି ରାଜ୍ୟରେ ଆଦିବାସୀ ଓ କୃଷିଜୀବୀ ସମ୍ପ୍ରଦାୟ ଦ୍ୱାରା ଫସଲ ଏବଂ ପ୍ରକୃତିର ପୂଜା ଉଦ୍ଦେଶ୍ୟରେ ଆନନ୍ଦ ସହକାରେ ପାଳନ କରାଯାଇଥାଏ। ଶିଶୁମାନେ ପାଣିରେ ବୁଡ଼ିଯିବା ଖବର ପ୍ରଚାରିତ ହେବା ପରେ ସ୍ଥାନୀୟ ଅଞ୍ଚଳରେ ଭୟ ଓ ଆତଙ୍କର ବାତାବରଣ ସୃଷ୍ଟି ହୋଇଥିଲା। ଖବର ପାଇ ପୁଲିସ ଓ ସ୍ଥାନୀୟ ପ୍ରଶାସନ ତୁରନ୍ତ ଘଟଣାସ୍ଥଳରେ ପହଞ୍ଚି ଗ୍ରାମବାସୀଙ୍କ ସହାୟତାରେ ବ୍ୟାପକ ଉଦ୍ଧାରକାର୍ଯ୍ୟ ଆରମ୍ଭ କରିଥିଲେ। ସୂଚନା ଅନୁସାରେ, ବର୍ତ୍ତମାନ ସୁଦ୍ଧା ୪ ଜଣ ଶିଶୁଙ୍କ ମୃତଦେହ ଉଦ୍ଧାର କରାଯାଇଥିବା ବେଳେ ଅନ୍ୟ ଜଣେ ନିଖୋଜ ଶିଶୁର ସନ୍ଧାନ ପାଇଁ ସନ୍ଧାନ ଅଭିଯାନ ଜାରି ରହିଛି। ପ୍ରଶାସନ ପକ୍ଷରୁ ପ୍ରଭାବିତ ଅଞ୍ଚଳରେ ଆବଶ୍ୟକୀୟ ପଦକ୍ଷେପ ଗ୍ରହଣ କରାଯାଉଛି।