ନୂଆଦିଲ୍ଲୀ: ଡିଜିଟାଲ୍ ଆର୍ଥିକ କାରବାର କ୍ଷେତ୍ରରେ କେନ୍ଦ୍ର ସରକାରଙ୍କ ଏକ ବଡ଼ ନିଷ୍ପତ୍ତି ଏବେ ଆଇନଗତ କାଠଗଡ଼ାରେ। ଗତ ୬ ବର୍ଷ ଧରି ସମ୍ପୂର୍ଣ୍ଣ ମାଗଣାରେ ଚାଲୁଥିବା ୟୁପିଆଇ (UPI) କାରବାର ଉପରେ ୦.୪% MDR ଶୁଳ୍କ ଲଗାଇବା ନିଷ୍ପତ୍ତିକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ୍ କରାଯାଇଛି। ଭାରତର ପ୍ରଧାନ ବିଚାରପତି (CJI) ଜଷ୍ଟିସ ସୂର୍ଯ୍ୟକାନ୍ତଙ୍କ ନେତୃତ୍ୱାଧୀନ ତିନିଜଣିଆ ଖଣ୍ଡପୀଠ ଆଜି ଏହି ଗୁରୁତ୍ୱପୂର୍ଣ୍ଣ ଜନସ୍ୱାର୍ଥ ମାମଲାର ଶୁଣାଣି କରିବେ।
ସରକାରଙ୍କ ଦ୍ୱାରା ଜାରି ବିଜ୍ଞପ୍ତି ଅନୁଯାୟୀ, ୨,୦୦୦ ଟଙ୍କାରୁ ଊର୍ଦ୍ଧ୍ୱ ସାଧାରଣ ବ୍ୟବସାୟୀ କାରବାର ଉପରେ ୦.୪% ଏମ୍ଡିଆର୍ ଲାଗୁ ହେବ, ଯାହା ୭୫,୦୦୦ ଟଙ୍କା କିମ୍ବା ତା’ଠାରୁ ଅଧିକ କାରବାର ପାଇଁ ସର୍ବାଧିକ ୩୦୦ ଟଙ୍କା ପର୍ଯ୍ୟନ୍ତ ସୀମିତ ରହିବ। ତଥାପି, ଏହି ନୀତିରେ ଦୈନନ୍ଦିନ ପର୍ସନ-ଟୁ-ପର୍ସନ (ପିଟୁପି/ ବ୍ୟକ୍ତି-ବ୍ୟକ୍ତି ମଧ୍ୟରେ) କାରବାର ଏବଂ ଛୋଟ ଅଙ୍କର କାରବାରକୁ ସୁରକ୍ଷିତ ରଖାଯାଇଛି, ଯେଉଁଥିପାଇଁ କୌଣସି ଶୁଳ୍କ ଲାଗିବ ନାହିଁ। କିନ୍ତୁ କେତେକ ନିର୍ଦ୍ଦିଷ୍ଟ କ୍ଷେତ୍ର ପାଇଁ ମଧ୍ୟ ସ୍ୱତନ୍ତ୍ର ନିୟମ ଲାଗୁ କରାଯାଇଛି। ଯେପରିକି ଅତ୍ୟାବଶ୍ୟକ ତଥା କମ୍ ଲାଭ ଥିବା କ୍ଷେତ୍ର ଅର୍ଥାତ୍ ରେଳବାଇ, ଟେଲିକମ୍, ବୀମା, ଇନ୍ଧନ ଏବଂ କୃଷି ସାମଗ୍ରୀ କ୍ଷେତ୍ରରେ ୨,୦୦୦ ଟଙ୍କାରୁ ଅଧିକ କାରବାର ପାଇଁ ଫ୍ଲାଟ୍ ୫ ଟଙ୍କା ଏମ୍ଡିଆର୍ ଲାଗୁ ହେବା, ମ୍ୟୁଚୁଆଲ୍ ଫଣ୍ଡ, ସିକ୍ୟୁରିଟିଜ୍ ଏବଂ ଷ୍ଟକ୍ ବ୍ରୋକରଙ୍କ ଜରିଆରେ ହେଉଥିବା ପେମେଣ୍ଟ ଉପରେ ୦.୦୨% ଏମ୍ଡିଆର୍ ଲାଗୁ ହେବ (ସର୍ବାଧିକ ସୀମା ୩୦୦ ଟଙ୍କା), ପିଟୁପି କାରବାର (ଯାହା ସମୁଦାୟ କାରବାର ସଂଖ୍ୟାର ୩୭% ଏବଂ ମୂଲ୍ୟର ୭୦% ଅଟେ) ଏବଂ ଛଜ କୋଡ୍ ମାଧ୍ୟମରେ ମାସକୁ ସର୍ବାଧିକ ୧ ଲକ୍ଷ ଟଙ୍କା ପର୍ଯ୍ୟନ୍ତ ଗ୍ରହଣ କରୁଥିବା ଛୋଟ ବ୍ୟବସାୟୀମାନଙ୍କୁ ସମ୍ପୂର୍ଣ୍ଣ ଶୁଳ୍କମୁକ୍ତ ରଖାଯାଇଛି।
ଆଇନଜୀବୀ ଅଞ୍ଜନ ଦତ୍ତଙ୍କ ଦ୍ୱାରା ଦାୟର ଏହି ଜନସ୍ୱାର୍ଥ ମାମଲାରେ କେନ୍ଦ୍ର ସରକାରଙ୍କ ସେପ୍ଟେମ୍ବର ୧୪ ତାରିଖର ବିଜ୍ଞପ୍ତି ଏବଂ ଏହା ଦ୍ୱାରା ଲାଗୁ ହୋଇଥିବା ଏମ୍ଡିଆର୍ ନିୟମକୁ ଚ୍ୟାଲେଞ୍ଜ କରାଯାଇଛି। ଆବେଦନକାରୀ ଯୁକ୍ତି ବାଢ଼ିଛନ୍ତି ଯେ କୌଣସି ପର୍ଯ୍ୟାପ୍ତ ଆଇନଗତ ସୁରକ୍ଷା, ଜନସାଧାରଣଙ୍କ ସହ ଆଲୋଚନା କିମ୍ବା ସ୍ୱଚ୍ଛତା ବିନା ହିଁ ଏହି ଶୁଳ୍କ ଲାଗୁ କରାଯାଇଛି। ଏଥିସହିତ, ପେମେଣ୍ଟ ଆଣ୍ଡ୍ ସେଟଲମେଣ୍ଟ ସିଷ୍ଟମ୍ସ ଆକ୍ଟ, ୨୦୦୭ର ସଂଶୋଧିତ ଧାରା ୧୦ଏ’ ର ସାମ୍ବିଧାନିକ ବୈଧତା ଉପରେ ମଧ୍ୟ ପ୍ରଶ୍ନ ଉଠାଯାଇଛି; ଆବେଦନରେ ଦର୍ଶାଯାଇଛି ଯେ ଏହା କାର୍ଯ୍ୟନିର୍ବାହୀଙ୍କୁ ବିନା ଦିଗଦର୍ଶନରେ ଅସୀମ କ୍ଷମତା ପ୍ରଦାନ କରୁଛି। ଆବେଦନକାରୀ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ଯେତେବେଳେ କୌଣସି ଆର୍ଥିକ ସୀମା ବିନା ରୂପେ ଡେବିଟ୍ କାର୍ଡ ଉପରେ ଶୂନ୍ୟ-ଶୁଳ୍କ ସୁରକ୍ଷା ମିଳୁଛି, ସେତେବେଳେ ଏହି ନୂତନ ନିୟମ ସମ୍ପୂର୍ଣ୍ଣ ମନମୁଖୀ ଏବଂ ପକ୍ଷପାତପୂର୍ଣ୍ଣ।
ଆବେଦନରେ ବଡ଼ ପରିମାଣର ୟୁପିଆଇ କାରବାର ଉପରେ ଏମ୍ଡିଆର୍ ବ୍ୟବସ୍ଥାକୁ ସମ୍ପୂର୍ଣ୍ଣ ସ୍ଥଗିତ ରଖିବାକୁ କିମ୍ବା ବାସ୍ତବିକ ତଥ୍ୟ, ପ୍ରଭାବ ଆକଳନ ଏବଂ କ୍ଷୁଦ୍ର ତଥା ଅଣୁ ଉଦ୍ୟୋଗଗୁଡ଼ିକ ପାଇଁ ସୁବ୍ୟବସ୍ଥିତ ସୁରକ୍ଷା ସହିତ ଏହାର ପୁନର୍ବିଚାର କରିବାକୁ ଦାବି କରାଯାଇଛି। ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ଏବଂ କେନ୍ଦ୍ର ସରକାରଙ୍କୁ ଏଥିରେ ପ୍ରତିପକ୍ଷ କରାଯାଇଥିବାରୁ, ସୋମବାର ହେବାକୁ ଥିବା ଶୁଣାଣି ଭାରତରେ ଡିଜିଟାଲ୍ ପେମେଣ୍ଟ ନିୟାମକର ଆଇନଗତ ପରିସୀମା ନିର୍ଦ୍ଧାରଣ କରିବାରେ ବେଶ୍ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବ।