ପୁରୀ: ପବିତ୍ର କାର୍ତ୍ତିକ ମାସ ପାଇଁ ପୁରୀରେ ରାଜ୍ୟ ସରକାରଙ୍କ ପକ୍ଷରୁ ହବିଷିଆଳି ଯୋଜନା ଆସନ୍ତା ଅକ୍ଟୋବର ୨୬ ତାରିଖରୁ ଆରମ୍ଭ ହୋଇ ନଭେମ୍ବର ୨୪ ତାରିଖ ପର୍ଯ୍ୟନ୍ତ ଚାଲିବ। ଏହି ଯୋଜନାରେ ସାମିଲ ହେବା ପାଇଁ ଆସନ୍ତା ୬ ତାରିଖରୁ ଅନଲାଇନ୍ ଆବେଦନ ପ୍ରକ୍ରିୟା ଆରମ୍ଭ ହେବାକୁ ଯାଉଛି। ରାଜ୍ୟର ୩୦ଟି ଜିଲ୍ଲାରୁ ଆଶାୟୀ ହବିଷିଆଳିମାନେ https://edistrict.odisha.gov.in ପୋର୍ଟାଲ ମାଧ୍ୟମରେ ସିଧାସଳଖ ଆବେଦନ କରିପାରିବେ। ଏଥର କେବଳ ଅନଲାଇନ୍ ରେଜିଷ୍ଟ୍ରେସନ୍ ଗ୍ରହଣ କରାଯିବ ଏବଂ ନୂଆ ଆବେଦନକାରୀଙ୍କୁ ପ୍ରାଥମିକତା ଦିଆଯିବ।
ଚଳିତ ବର୍ଷ ପୁରୀର ବୃନ୍ଦାବତୀ ନିବାସ, ପୌର କଲ୍ୟାଣ ମଣ୍ଡପ ଏବଂ ରେଲୱେ ଟୁରିଷ୍ଟ କମ୍ପ୍ଲେକ୍ସ – ଏହି ୩ଟି ସ୍ଥାନରେ ମୋଟ ୨୫୦୦ ହବିଷିଆଳିଙ୍କ ରହଣି ପାଇଁ ବ୍ୟବସ୍ଥା କରାଯାଉଛି। ସେଠାରେ ସେମାନଙ୍କ ପାଇଁ ନିଃଶୁଳ୍କ ରହଣି, ମାଗଣା ମହାପ୍ରସାଦ ସେବନ, ଶ୍ରୀମନ୍ଦିରରେ ସ୍ୱତନ୍ତ୍ର ଶୃଙ୍ଖଳିତ ଦର୍ଶନ ଏବଂ ପ୍ରାତଃ ଓ ସନ୍ଧ୍ୟା ପୂଜା ଅର୍ଚ୍ଚନା ପାଇଁ ସମସ୍ତ ବ୍ୟବସ୍ଥା କରାଯିବ। ପ୍ରତିବର୍ଷ ପରି ଏଥର ମଧ୍ୟ ହବିଷିଆଳି ମା’ମାନଙ୍କ ସେବା ପାଇଁ ସ୍ୱେଚ୍ଛାସେବୀ ମୁତୟନ ସହ ଭଜନ-କୀର୍ତ୍ତନ ଓ ଆଧ୍ୟାତ୍ମିକ ପରିବେଶ ସୃଷ୍ଟି ପାଇଁ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି ଚାଲିଛି।