ଭୁବନେଶ୍ବର: ଏସୀୟ କ୍ରୀଡ଼ାରେ ଭାରତୀୟ ମହିଳା ହକି ଦଳର ଅଭୂତପୂର୍ବ ଏବଂ ଐତିହାସିକ ସ୍ୱର୍ଣ୍ଣ ପଦକ ବିଜୟ ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସମସ୍ତ ବିଜୟୀ ଖେଳାଳି ଏବଂ ସହାୟକ କର୍ମଚାରୀମାନଙ୍କ ପାଇଁ ବଡ଼ ଆର୍ଥିକ ପୁରସ୍କାର ଘୋଷଣା କରିଛନ୍ତି। ଖବର ଅନୁଯାୟୀ, ଦଳର ପ୍ରତ୍ୟେକ ଖେଳାଳିଙ୍କୁ ଏଗାର ଲକ୍ଷ ଟଙ୍କା ଏବଂ ସମସ୍ତ ସହାୟକ କର୍ମଚାରୀଙ୍କୁ ପ୍ରତ୍ୟେକଙ୍କୁ ସାଢ଼େ ପାଞ୍ଚ ଲକ୍ଷ ଟଙ୍କା ଲେଖାଏଁ ପୁରସ୍କାର ଦିଆଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି।
ଭାରତୀୟ ମହିଳା ହକି ଦଳର ଏହି ଗୌରବଜ୍ଞଜକ ସଫଳତା ଦେଶ ପାଇଁ ଅତ୍ୟନ୍ତ ଗର୍ବର ବିଷୟ ବୋଲି ମୁଖ୍ୟମନ୍ତ୍ରୀ ମତପ୍ରକାଶ କରିଛନ୍ତି। ଦଳର ଖେଳାଳିମାନଙ୍କର ଉତ୍କୃଷ୍ଟ ପ୍ରଦର୍ଶନ, ଅଦମ୍ୟ ଦୃଢ଼ ସଂକଳ୍ପ ଏବଂ ପ୍ରତିବଦ୍ଧତାକୁ ସେ ପ୍ରଶଂସା କରିବା ସହ ସମସ୍ତଙ୍କୁ ଅଭିନନ୍ଦନ ଜଣାଇଛନ୍ତି। କ୍ରୀଡ଼ା ଜଗତରେ ଏପରି ଅସାଧାରଣ ସଫଳତା ଦେଶର ଯୁବପିଢ଼ିଙ୍କୁ ଆଗକୁ ବଢ଼ିବା ପାଇଁ ପ୍ରେରଣା ଯୋଗାଇବ ବୋଲି ସେ କହିଛନ୍ତି।
ଓଡ଼ିଶା ସରକାର ସର୍ବଦା ଭାରତୀୟ ହକି ସହିତ ବେଶ୍ ଦୃଢ଼ ଭାବରେ ଠିଆ ହୋଇ ଆସିଛନ୍ତି ଏବଂ ଆଗାମୀ ଦିନରେ ମଧ୍ୟ କ୍ରୀଡ଼ା ତଥା କ୍ରୀଡ଼ାବିତମାନଙ୍କୁ ସମର୍ଥନ ଏବଂ ପ୍ରୋତ୍ସାହନ ଯୋଗାଇବା ପାଇଁ ସରକାର ସମ୍ପୂର୍ଣ୍ଣ ପ୍ରତିବଦ୍ଧ ଅଛନ୍ତି ବୋଲି ମୁଖ୍ୟମନ୍ତ୍ରୀ ଦୃଢ଼ୋକ୍ତି ପ୍ରକାଶ କରିଛନ୍ତି। ଓଡ଼ିଶା ସରକାରଙ୍କ ଏହି ପ୍ରୋତ୍ସାହନମୂଳକ ପଦକ୍ଷେପ କ୍ରୀଡ଼ାକ୍ଷେତ୍ରକୁ ଆହୁରି ମଜବୁତ କରିବ ଏବଂ ଜାତୀୟ ତଥା ଆନ୍ତର୍ଜାତୀୟ ସ୍ତରରେ ଦେଶର ନାମ ରଖୁଥିବା ଖେଳାଳିମାନଙ୍କ ମନୋବଳକୁ ବହୁଗୁଣିତ କରିବ ବୋଲି ଆଶା କରାଯାଉଛି।