ଭୁବନେଶ୍ୱର: ଗୃହ ବିଭାଗ କାର୍ଯ୍ୟାଳୟରୁ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ହତ୍ୟା ମାମଲା ସମ୍ବଳିତ ‘ନାଇଡୁ କମିଶନ’ ଫାଇଲ୍ ନିଖୋଜ ଘଟଣାରେ ତଦନ୍ତ ପ୍ରକ୍ରିୟାକୁ ଆଗକୁ ବଢ଼ାଇଛି କ୍ରାଇମବ୍ରାଞ୍ଚ। ଏହି ମାମଲାରେ ନୋଟିସ ପାଇଥିବା ୩ ଜଣ ପ୍ରମୁଖ ବ୍ୟକ୍ତିଙ୍କ ବୟାନ କ୍ରାଇମବ୍ରାଞ୍ଚ ରେକର୍ଡ କରିଥିବା ନେଇ ଆଇଜିପି ସାର୍ଥକ ଷଡ଼ଙ୍ଗୀ ସୂଚନା ଦେଇଛନ୍ତି।
ସୂଚନା ଅନୁଯାୟୀ, ପୂର୍ବତନ ସରକାର ସମୟରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ (ସିଏମ୍ଓ)ରେ କାର୍ଯ୍ୟରତ ଥିବା ଭିକେ ପାଣ୍ଡିୟାନ, ମନୋଜ ମିଶ୍ର ଓ ରାଜେଶ ବର୍ମାଙ୍କୁ କ୍ରାଇମବ୍ରାଞ୍ଚ ପକ୍ଷରୁ ନୋଟିସ କରାଯାଇଥିଲା। ବୟାନ ରେକର୍ଡ ବେଳେ ଉକ୍ତ ଫାଇଲ୍ ଗୃହ ବିଭାଗରୁ ସିଏମ୍ଓରେ ପହଞ୍ଚିବା ପରେ ରିସିଭ୍ ହୋଇଥିବା ନେଇ ସେମାନେ ସ୍ୱୀକାର କରିଛନ୍ତି। ତଦନ୍ତ ବେଳେ ଏହାର ରିସିଭିଂ ରସିଦ ମଧ୍ୟ କ୍ରାଇମବ୍ରାଞ୍ଚ ହାତରେ ଲାଗିଛି। ତେବେ ଫାଇଲ୍ଟି କେଉଁଆଡ଼େ ଗଲା, ସେନେଇ ସସପେନ୍ସ ଜାରି ରହିଛି। ଏପର୍ଯ୍ୟନ୍ତ ଫାଇଲଟି ନିଖୋଜ ଅଛି ବୋଲି କୁହାଯାଇପାରେ, ମାତ୍ର ଏହା ଚୋରି ହୋଇଛି କି ନାହିଁ ସେ ନେଇ ତଦନ୍ତ ଶେଷ ନ ହେବା ଯାଏଁ ସ୍ପଷ୍ଟ କରିବା ଠିକ୍ ହେବନି ବୋଲି କ୍ରାଇମବ୍ରାଞ୍ଚ କହିଛି।
ଉଲ୍ଲେଖଯୋଗ୍ୟ ଯେ, ୨୦୦୮ ମସିହାରେ ହୋଇଥିବା ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ହତ୍ୟା କାଣ୍ଡର ତଦନ୍ତ ବିଚାରପତି ଶରତ ଚନ୍ଦ୍ର ନାଇଡୁ କରିଥିଲେ ଏବଂ ୨୦୧୬ ସେପ୍ଟେମ୍ବର ୧୯ରେ ଏହି ରିପୋର୍ଟ ଗୃହ ବିଭାଗକୁ ଦିଆଯାଇଥିଲା। ସେହିପରି ସମ୍ ହସ୍ପିଟାଲ୍ ଆର୍ଡିସି ତଦନ୍ତ ରିପୋର୍ଟ ମେ’ ୨୩, ୨୦୧୮ରେ ମୁଖ୍ୟ ସଚିବଙ୍କ କାର୍ଯ୍ୟାଳୟରୁ ମେ’ ୨୪ରେ ସିଏମ୍ଓକୁ ଯାଇଥିଲା। ମାତ୍ର ବର୍ତ୍ତମାନର ସରକାରଙ୍କୁ ଏହି ଦୁଇଟି ଯାକ ଗୁରୁତ୍ୱପୂର୍ଣ୍ଣ ଫାଇଲ୍ ମିଳୁ ନଥିବାରୁ ତଦନ୍ତ ଆରମ୍ଭ ହୋଇଛି।