ନୂଆଦିଲ୍ଲୀ: ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରଣାଳୟ ପକ୍ଷରୁ ମେରା ଯୁବ ଭାରତ (ମାଇଁ ଭାରତ) ଅଧିନରେ ଶନିବାର ବାରାଣସୀସ୍ଥିତ ବନାରସ ହିନ୍ଦୁ ବିଶ୍ୱବିଦ୍ୟାଳୟର ସ୍ୱତନ୍ତ୍ର ଭବନରେ ‘ବିକଶିତ ଭାରତ ପାଇଁ ଯୁବପିଢ଼ି: ଏମଓ୍ବାଇ ଭାରତ ଯୁବ ସମ୍ମିଳନୀ’ ଆୟୋଜିତ ହୋଇଛି। ଏହି ସମ୍ମିଳନୀରେ ବିଭିନ୍ନ କ୍ଷେତ୍ରର ସଫଳ ଯୁବ ପ୍ରତିଭା, କ୍ରୀଡ଼ାବିତ୍, ଡିଜିଟାଲ୍ କଣ୍ଟେଣ୍ଟ କ୍ରିଏଟର ଏବଂ ଯୁବ ନେତୃତ୍ୱମାନେ ଯୋଗଦେଇ ଯୁବପିଢ଼ିର ସଫଳତାକୁ ପାଳନ କରିବା ସହ ରାଷ୍ଟ୍ର ନିର୍ମାଣରେ ଅଧିକ ଭାଗୀଦାରି ପାଇଁ ପ୍ରେରଣା ଦେଇଥିଲେ।
ଏହି କାର୍ଯ୍ୟକ୍ରମରେ କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ ଡ. ମନସୁଖ ମାଣ୍ଡଭୀୟ, ଉତ୍ତରପ୍ରଦେଶ ସରକାରଙ୍କ ଯୁବ କଲ୍ୟାଣ ଓ କ୍ରୀଡ଼ା ବିଭାଗର ରାଷ୍ଟ୍ରମନ୍ତ୍ରୀ (ସ୍ୱାଧୀନ ଦାୟିତ୍ୱ) ଗିରିଶ ଚନ୍ଦ୍ର ଯାଦବ ଏବଂ ଭାରତ ସରକାରଙ୍କ ଯୁବ ବ୍ୟାପାର ବିଭାଗର ସଚିବ ସୁନୀଲ ପାଲିୱାଲ ଯୋଗଦେଇଥିଲେ। ଭାରତୀୟ କ୍ରିକେଟର ଧ୍ରୁବ ଜୁରେଲ ଏବଂ ‘ହନୁମାନ ଅଂଶ’ର ନିର୍ଦ୍ଦେଶକ ବିଶାଳ ଚତୁର୍ବେଦୀ ମଧ୍ୟ ଯୁବପିଢ଼ିଙ୍କ ସହ ଭାବ ବିନିମୟ କରିଥିଲେ।
ସମ୍ମିଳନୀକୁ ସମ୍ବୋଧିତ କରି ଡ. ମାଣ୍ଡଭୀୟ କହିଥିଲେ ଯେ, ଯୁବପିଢ଼ି କେବଳ ଭାରତର ବିକାଶର ସୁଫଳ ପାଉଥିବା ବର୍ଗ ଭାବେ ନୁହେଁ, ବରଂ ବିକଶିତ ଭାରତ ଗଠନର ସକ୍ରିୟ ସହଭାଗୀ ଓ ଦୂତ ଭାବେ ନିଜକୁ ଦେଖିବା ଆବଶ୍ୟକ। ପ୍ରଧାନମନ୍ତ୍ରୀଙ୍କ ‘ବିକଶିତ ଭାରତ@୨୦୪୭’ ଲକ୍ଷ୍ୟ ବିଷୟରେ ଉଲ୍ଲେଖ କରି ସେ କହିଥିଲେ ଯେ, ଆଜିର ଯୁବପିଢ଼ି ହିଁ ୨୦୪୭ରେ ଭାରତର ନେତୃତ୍ୱ ନେବେ ଏବଂ ସେହି ସମୟର ବିକଶିତ ଭାରତର ଅଂଶୀଦାର ହେବେ।
“ବିକଶିତ ଭାରତ ଯୁବପିଢ଼ିଙ୍କ ଦ୍ୱାରା, ଯୁବପିଢ଼ିଙ୍କ ପାଇଁ ଏବଂ ଯୁବପିଢ଼ିଙ୍କ ମାଧ୍ୟମରେ ଗଢ଼ାଯିବା ଆବଶ୍ୟକ,” ବୋଲି ସେ କହିଥିଲେ। ବ୍ୟକ୍ତିଗତ ଆକାଂକ୍ଷା ମଧ୍ୟରେ ସୀମିତ ନ ରହି ନିଜ ସମାଜ ଓ ଦେଶ ପାଇଁ ଅର୍ଥପୂର୍ଣ୍ଣ ଅବଦାନ ଦେବାକୁ ସେ ଯୁବପିଢ଼ିଙ୍କୁ ଆହ୍ୱାନ ଦେଇଥିଲେ।
ଭାରତର ସାଂସ୍କୃତିକ ମୂଲ୍ୟବୋଧର ଗୁରୁତ୍ୱ ଉପରେ ଆଲୋକପାତ କରି ମନ୍ତ୍ରୀ କହିଥିଲେ ଯେ, ରାଷ୍ଟ୍ର ନିର୍ମାଣରେ ଶୃଙ୍ଖଳା, ସେବା, ଦାୟିତ୍ୱବୋଧ ଓ ସମ୍ମାନର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ବଡ଼ ଧରଣର ପଦକ୍ଷେପ ବିନା ମଧ୍ୟ ସମାଜରେ ଅର୍ଥପୂର୍ଣ୍ଣ ପରିବର୍ତ୍ତନ ଆଣିହେବ। ଉଦ୍ଦେଶ୍ୟପୂର୍ଣ୍ଣ ଭାବେ ନିରନ୍ତର ଛୋଟ ଛୋଟ ପ୍ରୟାସ ମଧ୍ୟ ବଡ଼ ସଫଳତା ଆଣିପାରିବ। ନିଜ ସମାଜର ଆବଶ୍ୟକତାକୁ ପୂରଣ କରିବା ସହ ନିଜ ଆକାଂକ୍ଷାକୁ ସକାରାତ୍ମକ କାର୍ଯ୍ୟରେ ପରିଣତ କରି ସାମାଜିକ ଦୃଷ୍ଟିରୁ ଉପଯୋଗୀ ହେବାକୁ ସେ ଯୁବପିଢ଼ିଙ୍କୁ ଉତ୍ସାହିତ କରିଥିଲେ।
ଡ. ମାଣ୍ଡଭୀୟ କହିଥିଲେ ଯେ, ମାଇଁ ଭାରତ ମାଧ୍ୟମରେ ଯୁବପିଢ଼ିଙ୍କୁ ସ୍ୱେଚ୍ଛାସେବା, ନେତୃତ୍ୱ, ସମାଜସେବା ଓ ଅଭିଜ୍ଞତାଭିତ୍ତିକ କାର୍ଯ୍ୟରେ ଯୋଗଦେବାର ବିଭିନ୍ନ ସୁଯୋଗ ମିଳୁଛି। ଯୁବପିଢ଼ି ଯେତେବେଳେ ଏକ ବୃହତ୍ତର ଜାତୀୟ ଲକ୍ଷ୍ୟ ସହ ଯୋଡ଼ି ହେବେ, ସେତେବେଳେ ଭାରତର ଜନସାଂଖ୍ୟିକ ଶକ୍ତି ଦେଶର ବିକାଶ ପାଇଁ ଏକ ବଡ଼ ସମ୍ବଳରେ ପରିଣତ ହେବ। “ବିକଶିତ ଭାରତ କେବଳ ଭାରତୀୟ ଯୁବପିଢ଼ିଙ୍କ ପାଇଁ ଏକ ଲକ୍ଷ୍ୟ ନୁହେଁ; ଏହା ଏକ ଜାତୀୟ ଅଭିଯାନ, ଯାହାକୁ ଯୁବ ଭାରତୀୟଙ୍କ ଶକ୍ତି, ଚିନ୍ତାଧାରା, ଶୃଙ୍ଖଳା ଓ ଭାଗୀଦାରି ମାଧ୍ୟମରେ ସାକାର କରିବାକୁ ହେବ,” ବୋଲି ସେ କହିଥିଲେ।
‘ନିଶାମୁକ୍ତ ଯୁବ, ବିକଶିତ ଭାରତ ଅଭିଯାନ’ରେ ଯୁବପିଢ଼ିଙ୍କ ଭାଗୀଦାରିର ଗୁରୁତ୍ୱ ଉପରେ ମଧ୍ୟ ମନ୍ତ୍ରୀ ଆଲୋକପାତ କରିଥିଲେ। ନିଶା ସେବନ ଯୁବପିଢ଼ିଙ୍କ ସାମର୍ଥ୍ୟ, ପାରିବାରିକ ସୁଖଶାନ୍ତି ଓ ଦେଶର ପ୍ରଗତି ପାଇଁ ଏକ ଆହ୍ୱାନ ବୋଲି ସେ କହିଥିଲେ। ନିଶାର କୁପ୍ରଭାବ ସମ୍ପର୍କରେ ସଚେତନତା ସୃଷ୍ଟି, ସକାରାତ୍ମକ ଜୀବନଶୈଳୀ ଆପଣାଇବାକୁ ପ୍ରୋତ୍ସାହନ ଏବଂ ନିଶାମୁକ୍ତ ସମାଜ ଗଠନ ପାଇଁ ସମାଜକୁ ଏକଜୁଟ କରିବା ଦିଗରେ ଯୁବପିଢ଼ି କାର୍ଯ୍ୟ କରିବାକୁ ସେ ଆହ୍ୱାନ ଦେଇଥିଲେ। ସକାରାତ୍ମକ ସାମାଜିକ ପରିବର୍ତ୍ତନ ପାଇଁ ନିଜର ସୃଜନଶୀଳତା ଓ ଡିଜିଟାଲ୍ ମାଧ୍ୟମରେ ଥିବା ପ୍ରଭାବକୁ ଦାୟିତ୍ୱପୂର୍ଣ୍ଣ ଭାବେ ବ୍ୟବହାର କରିବାକୁ ମଧ୍ୟ ସେ କହିଥିଲେ।
ଏହି ସମ୍ମିଳନୀର ଅନ୍ୟତମ ଆକର୍ଷଣ ଥିଲା ବିଭିନ୍ନ କ୍ଷେତ୍ରର ସଫଳ ବ୍ୟକ୍ତିତ୍ୱଙ୍କୁ ସମ୍ବର୍ଦ୍ଧନା। ଏସୀୟ କ୍ରୀଡ଼ାରେ ପଦକ ଜିତିଥିବା ରୋହିତ ଯାଦବ, ପ୍ରାଚୀ ଚୌଧୁରୀ, ପାରୁଲ ଚୌଧୁରୀ, ଜୟ କୁମାର ଓ ରାଜ କୁମାର ପାଲଙ୍କୁ ସେମାନଙ୍କ କ୍ରୀଡ଼ା ସଫଳତା ପାଇଁ ସମ୍ବର୍ଦ୍ଧିତ କରାଯାଇଥିଲା। ସେହିପରି ଜେଇଇରେ ସଫଳତା ହାସଲ କରି ଆଇଆଇଟି (ବିଏଚୟୁ)ରେ ନାମ ଲେଖାଇଥିବା ଅର୍ପିତ ଗିରି, ଆଦିତ୍ୟ ଉପାଧ୍ୟାୟ ଓ ଅବନ୍ତିକାଙ୍କୁ ମଧ୍ୟ ସେମାନଙ୍କ ଶିକ୍ଷାଗତ ସଫଳତା ପାଇଁ ସମ୍ବର୍ଦ୍ଧନା ଦିଆଯାଇଥିଲା।
ଏହାସହ ଡିଜିଟାଲ୍ ମଞ୍ଚରେ ସକ୍ରିୟ ଥିବା ପ୍ରଜ୍ୱଳ ପ୍ରଜାପତି, ଅଭିଷେକ ଚୌରାସିଆ, ଅମିତ କୁମାର ଗୌତମ, ହର୍ଷ ଗୁପ୍ତା, ଶିବମ ପାଣ୍ଡେ, ସୂର୍ଯ୍ୟାଂଶୁ ଶୁକ୍ଳା, ସୌରଭ ଚନ୍ଦ୍ର, ଭୀମ ଯାଦବ, ଶିବାଦିତ୍ୟ, ଦିଶୁ ଖାନ୍ନା ଓ ଆଦିତ୍ୟ ମୌର୍ଯ୍ୟଙ୍କୁ ସମ୍ବର୍ଦ୍ଧିତ କରାଯାଇଥିଲା। ଯୁବପିଢ଼ିଙ୍କ ସହ ଯୋଗାଯୋଗ, ସୃଜନଶୀଳ ଅଭିବ୍ୟକ୍ତି ଏବଂ ସକାରାତ୍ମକ ସାମାଜିକ ପ୍ରଭାବ ସୃଷ୍ଟି କରିବାରେ ଡିଜିଟାଲ୍ ମାଧ୍ୟମର ଭୂମିକାକୁ ଏହି ସମ୍ବର୍ଦ୍ଧନା ମାଧ୍ୟମରେ ସ୍ୱୀକୃତି ଦିଆଯାଇଥିଲା।